କଟକ,୦୩/୧୦: ସାଧାରଣ ଖାଉଟି ବଣ୍ଟନ ବ୍ୟବସ୍ଥା କ୍ରମଶଃ ଜଟିଳ ହେବାରେ ଲାଗିଛି । ପ୍ରଥମେ ପ୍ରତ୍ୟେକ ଡିଲର ପଏଣ୍ଟରେ ପିଓଏସ୍(ପଏଣ୍ଟ ଅଫ୍ ସେଲ୍) ମେସିନ୍ ଲଗାଗଲା । ଏବେ ଅତ୍ୟାଧୁନିକ ଓଜନ ମେସିନ୍କୁ ପିଓଏସ୍ ମେସିନ୍ ସହ ସଂଯୋଗ କରାଯାଇଛି । ଏହାକୁ ନେଇ ଉଭୟ ଡିଲର ଏବଂ ଖାଉଟିଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲାବେଳେ ଏବେ ରାଜ୍ୟ ଖାଦ୍ୟ ଏବଂ ଖାଉଟି କଲ୍ୟାଣ ବିଭାଗ ପକ୍ଷରୁ ପ୍ରତ୍ୟେକ ଡିଲର ପଏଣ୍ଟରେ ସିସି କ୍ୟାମେରା ଲଗାଯିବା ପାଇଁ ଯୋଜନା ଆରମ୍ଭ ହୋଇଛି । ଏହି କ୍ୟାମେରା ଜରିଆରେ ଡିଲର୍ ପଏଣ୍ଟକୁ ଆସୁଥିବା ଜାଲ୍ ହିତାଧିକାରୀଙ୍କୁ ଧରିବା ପାଇଁ ଯୋଜନା ହେଉଥିବା କୁହାଯାଉଛି ।
ଖାଉଟି ବଣ୍ଟନ ବ୍ୟବସ୍ଥାରେ ଦୀର୍ଘବର୍ଷ ଧରି ପିଓଏସ୍ ମେସିନ୍ଜନିତ ସମସ୍ୟା ଲାଗିରହିଛି । ପିଓଏସ୍ ମେସିନ୍ ଇଣ୍ଟରନେଟ୍ ସହାୟତାରେ ଚାଲିଥାଏ । ରାଜ୍ୟର ଅନେକ ଗ୍ରାମାଞ୍ଚଳରେ ଇଣ୍ଟରନେଟ୍ ସୁବିଧା ସହଜରେ ଉପଲବ୍ଧ ହେଉନାହିଁ । ସେହିସବୁ ସ୍ଥାନରେ ଯଦି ଘଣ୍ଟେ ଇଣ୍ଟରନେଟ୍ ରହୁଛି ୪ଘଣ୍ଟା କଟିଯାଏ । ଫଳରେ ଜଣେ ଜଣେ ଖାଉଟିଙ୍କୁ ଚାଉଳ ୧୦/୧୫ କେଜି ପାଇଁ ଗୋଟେ ଗୋଟେ ଦିନ ଅପେକ୍ଷା କରିବାକୁ ପଡ଼େ । ଶହେ/୨ଶହ ଟଙ୍କାର ଚାଉଳ ପାଇଁ ୫ଶହ ଟଙ୍କାର ଦୈନିକ ମଜୁରୀ ହାତଛଡ଼ା କରାଇବାକୁ ପଡ଼ିଥାଏ । ସବୁଠାରୁ ବଡ଼କଥା, ଓଡ଼ିଶାରେ ଯେଉଁସବୁ ପିଓଏସ୍ ମେସିନ୍ ଦିଆଯାଇଛି ତାହା ୨-ଜି । କିନ୍ତୁ ଏବେ ଚାରିଆଡ଼େ ୫-ଜି ଚାଲୁଛି । ଫଳରେ ପିଓଏସ୍ ମେସିନ୍ ଠିକ୍ ଭାବେ କାମ କରିପାରୁନି ।
ଏଭଳି ସ୍ଥିତିରେ ଏବେ ପିଓଏସ୍ ମେସିନ୍ ସହ ଅତ୍ୟାଧୁନିକ ଓଜନ ମାପ ଯନ୍ତ୍ରକୁ ସଂଯୋଗ କରି ଦିଆଯାଇଛି । ଏହି ମେସିନ୍ ସଂଯୋଗ ପରେ ଖାଉଟି ନାହିଁନଥିବା ସମସ୍ୟାର ସମ୍ମୁଖୀନ ହେଉଛନ୍ତି । ଜଣେ ଜଣେ ଖାଉଟିଙ୍କୁ ଏଥିପାଇଁ ଘଣ୍ଟାଘଣ୍ଟା ଧରି ଅପେକ୍ଷା କରିବାକୁ ପଡ଼ୁଛି । ତିନିମାସର ସାମଗ୍ରୀକୁ ତିନିଥର କରି ଓଜନ କରି ଦେବାକୁ ପଡ଼ୁଛି । ଫଳରେ ଯଦି ମଝିରେ ଇଣ୍ଟରନେଟ୍ ସଂଯୋଗ କଟିଯାଉଛି ତାହେଲେ ସମ୍ପୃକ୍ତ ଖାଉଟିଙ୍କୁ ପୁଣି ନେଟ୍ ଆସିବା ପର୍ଯ୍ୟନ୍ତ ଅପେକ୍ଷା କରିବାକୁ ପଡ଼ୁଛି । ଏହାକୁ ନେଇ ଉଭୟ ଡିଲର ଏବଂ ଖାଉଟିଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲାବେଳେ ଏବେ ପ୍ରତ୍ୟେକ ଡିଲର ପଏଣ୍ଟରେ ସିସିଟିଭି କ୍ୟାମେରା ଲଗାଇବା ଯୋଜନା ଆହୁରି ଅସନ୍ତୋଷକୁ ତେଜିବା ଆରମ୍ଭ କରିଛି ।
