କଟକ,୦୧/୦୬: କଟକ ଜିଲ୍ଲା ମୁଖ୍ୟ ଚିକିତ୍ସାଧିକାରୀ (ସିଡିଏମ୍ଓ) କାର୍ଯ୍ୟାଳୟରେ ଜାଲ୍ ପ୍ରମାଣପତ୍ର ଦେଇ ନିଯୁକ୍ତି ବିବାଦ ଥମିବା ନାଁ ଧରୁନି । ଜାଲ୍ ନିଯୁକ୍ତି ଘଟଣାରେ କେନ୍ଦ୍ରାଞ୍ଚଳ ରାଜସ୍ୱ ଆୟୁକ୍ତ ସିଡିଏମ୍ଓଙ୍କ ରିପୋର୍ଟ ଦାଖଲ ପରେ ଉକ୍ତ ୩ ଜଣଙ୍କୁ କାରଣ ଦର୍ଶାଅ ନୋଟିସ୍ ଜାରି କରିଥିଲେ । ମିଳିଥିବା ସୂଚନା ମୁତାବକ, କାରଣ ଦର୍ଶାଅ ନୋଟିସ୍ର ଉତ୍ତର ବି କର୍ମଚାରୀମାନେ ଦାଖଲ କରିସାରିଛନ୍ତି । ଖୁବ୍ଶୀଘ୍ର ଏନେଇ ତଦନ୍ତ ରିପୋର୍ଟ ଚୂଡାନ୍ତ ହେବ ବୋଲି କୁହାଯାଉଛି ।
ସିଡିଏମ୍ଓ କାର୍ଯ୍ୟାଳୟରେ ଦୀର୍ଘ ବର୍ଷ ଧରି ନିଯୁକ୍ତି କେଳେଙ୍କାରୀ ଜାରି ରହିଛି । ଚାକିରି କରିଥିବା ସମୟରେ ଦାଖଲ କରିଥିବା ରିପୋର୍ଟ ଏବଂ ବର୍ତ୍ତମାନର ତଥ୍ୟରେ ତାଳମେଳ ରହୁନଥିବାରୁ ବିବାଦ ଅଧିକ ଜଟିଳ ହୋଇଛି । ଏନେଇ ଆର୍ଡିସିଙ୍କ କାର୍ଯ୍ୟାଳୟ ତରଫରୁ ମଧ୍ୟ ତଦନ୍ତ ଜାରି ରହିଛି । ସିଡିଏମ୍ଓ କାର୍ଯ୍ୟାଳୟରେ ନିଯୁକ୍ତ ୩ କର୍ମଚାରୀ ଚାକିରି କରିବା ସମୟରେ ଏସ୍ସି ଏସ୍ଟି ପ୍ରମାଣପତ୍ର ଦେଇଥିଲେ । କିନ୍ତୁ ପରବର୍ତ୍ତୀ ପର୍ଯ୍ୟାୟରେ ଏନେଇ ଅଭିଯୋଗ ହେବାରେ କର୍ମଚାରୀଙ୍କ ଅଞ୍ଚଳ ଅର୍ଥାତ୍ ନରସିଂହପୁର, ତିଗିରିଆ ଓ ଆଠଗଡ ତହସିଲଦାରଙ୍କୁ ସେମାନଙ୍କ ଜାତିଗତ ପ୍ରମାଣପତ୍ର ମଗାଯାଇଥିଲା । ଏଥିରେ ସେମାନେ ଖଣ୍ଡାୟତ ଓ ଚଷା ବୋଲି ଦର୍ଶାଯାଇଛି । ଯାହାକୁ ନେଇ ଆର୍ଡିସିଙ୍କ କାର୍ଯ୍ୟାଳୟ ତରଫରୁ ସିଡିଏମ୍ଓ କାର୍ଯ୍ୟାଳୟକୁ ରିପୋର୍ଟ ମଗାଯାଇଥିଲା । ସିଡିଏମ୍ଓ ରିପୋର୍ଟ ଦାଖଲ ପରେ ଆର୍ଡିସିଙ୍କ ନିର୍ଦ୍ଦେଶରେ ସିଡିଏମ୍ଓ କାର୍ଯ୍ୟାଳୟ ତରଫରୁ ଉକ୍ତ ତିନି କର୍ମଚାରୀଙ୍କୁ କାରଣ ଦର୍ଶାଅ ନୋଟିସ୍ ଜାରି କରାଯାଇଥିଲା । ସେମାନେ କାରଣ ଦର୍ଶାଅର ଉତ୍ତର ଫେରାଇଥିବା ଜଣାପଡିଛି । କିନ୍ତୁ ଏବେ ଯାଏ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନଥିବା ଜଣାପଡିଛି ।
ସୂଚନାଯୋଗ୍ୟ, କଟକ ଜିଲ୍ଲା ଚିକିତ୍ସା ଅଧିକାରୀଙ୍କ କାର୍ଯ୍ୟାଳୟରେ ଆଜି ପର୍ଯ୍ୟନ୍ତ ଯେତେ ପ୍ରକାରର ବେଆଇନ୍ ନିଯୁକ୍ତି ଓ ପଦୋନ୍ନତି ହୋଇଛି ସେ ସବୁ ଅଭିଯୋଗର ତଦନ୍ତ କରାଯିବ ବୋଲି କହିଆସିଛନ୍ତି କର୍ତ୍ତୃପକ୍ଷ । କିନ୍ତୁ ଆଶ୍ଚର୍ଯ୍ୟ ଯେ, ଆଜି ପର୍ଯ୍ୟନ୍ତ କୌଣସି ତଦନ୍ତ ରିପୋର୍ଟ ଆସିନି କି କାର୍ଯ୍ୟାନୁଷ୍ଠାନ ହୋଇନାହିଁ । ଅଭିଯୋଗ ଆସିବା ପରେ ତଦନ୍ତ କମିଟି ଗଠନ ହେବା ଏବଂ କାଗଜପତ୍ର ଯାଞ୍ଚ୍ ହେବାରେ ସମୟ ଗଡ଼ାଇ ଚାଲିବାରୁ ବର୍ଷ ବର୍ଷ ବିତିଯାଉଛି । ଶେଷରେ ଅଧିକାରୀ ବଦଳିଯାଉଛନ୍ତି । ତଦନ୍ତ ବାଟବଣା ହେଉଛି । ପୁନର୍ବାର ଅଭିଯୋଗ ନଆସିବା ଯାଏ ତଦନ୍ତ ପ୍ରକ୍ରିୟା ଆଗକୁ ଗଡ଼ୁନାହିଁ । ଫଳରେ ବେଆଇନ୍ ନିଯୁକ୍ତି ଓ ପଦୋନ୍ନତି ଘଟଣାରେ ସମ୍ପୃକ୍ତ କର୍ମଚାରୀମାନେ ନିଧଡ଼କ ସ୍ୱଭାବ ପ୍ରଦର୍ଶନ କରୁଛନ୍ତି ।
୨୦୦୫ ମସିହାରେ ନିଯୁକ୍ତି ପାଇଥିବା କର୍ମଚାରୀଙ୍କ ପଦୋନ୍ନତିରେ କେଳେଙ୍କାରୀ ସାମ୍ନାକୁ ଆସିଛି । ଗ୍ରେଡେସନ୍ ତାଲିକାରେ ୩ ବଦଳରେ ୪୧ ଜଣ ରହିବା ଘଟଣାକୁ ନେଇ ଜିଲ୍ଲାପାଳ ତଦନ୍ତ ନିର୍ଦ୍ଦେଶ ଦେଇଥିଲେ । ଜବାବରେ ସିଡିଏମ୍ଓ ମଧ୍ୟ ଏହାର ଉତ୍ତର ଦେଇ ଚିଠି କରିଥିଲେ । ଯେଉଁଥିରେ ସେ ଉଲ୍ଲେଖ କରିଛନ୍ତି ଯେ, ତଦନ୍ତ କମିଟି ଗଠନ କରାଯାଇ ଏହାର ତଦନ୍ତ ଜାରି ରହିଛି । ରିପୋର୍ଟ ଦାଖଲ କରାଯିବ । କିନ୍ତୁ ଏ ଯାଏ ଏ ବାବଦରେ କୌଣସି କମିଟି ଗଠନ କରାଯାଇନାହିଁ । ସେହିପରି ଏ ବିବାଦରେ ସିଡିଏମ୍ଓ କାର୍ଯ୍ୟାଳୟ ନିକଟରେ ବିଶେଷ କାଗଜପତ୍ର ନାହିଁ ବୋଲି ଜଣାପଡିଛି ।
