କରାଚୀ,୦୧/୦୩: ଚଳିତ ଚାମ୍ପିଅନ୍ସ ଟ୍ରଫିର ଗ୍ରୁପ୍-ବି’ରେ ଶନିବାର ଦକ୍ଷିଣ ଆଫ୍ରିକା ଓ ଇଂଲଣ୍ଡ ପରସ୍ପରକୁ ଭେଟିବେ । ଇଂଲଣ୍ଡ ସେମି ଫାଇନାଲ୍ ଦୌଡ଼ରୁ ବାଦ ପଡ଼ିସାରିଛି । ତେଣୁ ଏହି ମ୍ୟାଚ ସେଭଳି କୌଣସି ଗୁରୁତ୍ୱ ରଖୁନାହିଁ । ତଥାପି ସ୍ୱଦେଶ ଫେରିବା ପୂର୍ବରୁ ଏକ ବିଜୟ ସହ ସମ୍ମାନ ବଞ୍ଚାଇବାକୁ ଇଂଲଣ୍ଡ ଉଦ୍ୟମ କରିବ । ଦକ୍ଷିଣ ଆଫ୍ରିକା ୩ ପଏଣ୍ଟ ହାସଲ କରିସାରିଥିଲେ ହେଁ ମ୍ୟାଚ୍ ବିଜୟ ସହ ପଏଣ୍ଟ ତାଲିକାର ଶୀର୍ଷ ସ୍ଥାନ ବଜାୟ ରଖିବାକୁ ପ୍ରୟାସ କରିବ ।
ଦକ୍ଷିଣ ଆଫ୍ରିକା ୨୧ ତାରିଖରେ ପ୍ରଥମ ମ୍ୟାଚ୍ ଖେଳିଥିଲା ଓ ଆଫଗାନିସ୍ତାନକୁ ୧୦୭ ରନ୍ରେ ହରାଇଥିଲା । ଏହାପରେ ଦଳ ପରବର୍ତ୍ତୀ ମ୍ୟାଚ ପାଇଁ ଅପେକ୍ଷା କରି ରହିଛି । ୨୫ ତାରିଖରେ ହେବାକୁ ଥିବା ଅଷ୍ଟ୍ରେଲିଆ ବିପକ୍ଷ ମ୍ୟାଚ୍ ବର୍ଷା ଯୋଗୁଁ ବାତିଲ ହୋଇ ଯାଇଥିଲା । ୭ ଦିନର ବିଶ୍ରାମ ସମୟ ମିଳିଥିଲେ ହେଁ ଖେଳାଳିମାନେ ମାନସିକ ସ୍ତରରେ ସେଭଳି ଉତ୍ସାହିତ ନାହାନ୍ତି । କାରଣ ବର୍ଷା ଯୋଗୁଁ ଯଥେଷ୍ଟ ଅଭ୍ୟାସ ସମୟ ମିଳିପାରି ନାହିଁ ।
ଇଂଲଣ୍ଡ ବିପକ୍ଷ ମ୍ୟାଚ୍ ଦକ୍ଷିଣ ଆଫ୍ରିକା ପାଇଁ ଶକ୍ତି ପରୀକ୍ଷା ହେବ । ଭାରତ କିମ୍ବା ନ୍ୟୁଜିଲାଣ୍ଡକୁ ସେମି ଫାଇନାଲ୍ରେ ଭେଟିବା ପୂର୍ବରୁ ଦକ୍ଷିଣ ଆଫ୍ରିକା ଏହି ମ୍ୟାଚ୍ ଜରିଆରେ ଛୋଟ ମୋଟ ତ୍ରୁଟି ସବୁ ସୁଧାରିବାକୁ ପ୍ରୟାସ କରିବ । ଅବଶ୍ୟ ଦଳର ବ୍ୟାଟିଂ ବିଭାଗ ବେଶ୍ ଶକ୍ତିଶାଳୀ । ବୋଲିଂ ବିଭାଗ ସାମାନ୍ୟ ଅସନ୍ତୁଳିତ ମନେ ହେଉଛି । ମାର୍କୋ ଜାନସେନ, କାଗିସୋ ରାବାଡା ଓ ଲୁଙ୍ଗି ଏନ୍ଗିଡ଼ି ପେସ ବିଭାଗ ସମ୍ଭାଳୁଥିଲେ ହେଁ ମଧ୍ୟ ଓଭରଗୁଡ଼ିକରେ ବୋଲିଂ କରିବା ଭଳି ବୋଲରଙ୍କ ଅଭାବ ସ୍ପଷ୍ଟ ବାରି ହୋଇପଡ଼ୁଛି । ଦିନିକିଆ କ୍ରିକେଟ୍ରେ ସର୍ବାଧିକ ରନ୍ ମଧ୍ୟ ଓଭରଗୁଡ଼ିକରେ ହୋଇଥାଏ ।
ଇଂଲଣ୍ଡ ଗତ ଦିନିକିଆ ବିଶ୍ୱକପ୍ ପରାଜୟର ପ୍ରତିଶୋଧ ନେବାକୁ ପ୍ରୟାସ କରିବ । ଶେଷ ଥର ପାଇଁ ଉଭୟ ଦଳ ଦିନିକିଆ ବିଶ୍ୱକପ୍ରେ ପରସ୍ପରକୁ ଭେଟିଥିଲେ । ଇଂଲଣ୍ଡ ୨୨୯ ରନ୍ରେ ଉକ୍ତ ମ୍ୟାଚ୍ ହାରିଥିଲା ।
ଦକ୍ଷିଣ ଆଫ୍ରିକାକୁ ହରାଇବାକୁ ହେଲେ ଇଂଲଣ୍ଡର ମଧ୍ୟକ୍ରମ ବ୍ୟାଟରମାନଙ୍କୁ ବଡ଼ ସ୍କୋର କରିବାକୁ ହେବ । ହ୍ୟାରୀ ବ୍ରୁକ୍, ଜୋସ ବଟଲର, ଲାଏମ ଲିଭିଙ୍ଗଷ୍ଟୋନଙ୍କ ବ୍ୟାଟ୍ରୁ ଦଳ ବଡ଼ ଇନିଂସ ଆବଶ୍ୟକ କରିବ ।
କରାଚୀ ଷ୍ଟାଡ଼ିୟମ୍ ପିଚ୍ ବ୍ୟାଟିଂ ପାଇଁ ଅନୁକୂଳ ରହିଥିଲେ ହେଁ ପାଗ ଉପରେ ସବୁ କିଛି ନିର୍ଭର କରିବ । ବର୍ଷା ନହେଲେ ଏକ ରୋମାଞ୍ଚକର ମ୍ୟାଚ୍ ଦେଖିବାକୁ ମିଳିବ । ଟସ୍ ସେଭଳି ଗରୁତ୍ୱ ବହନ କରୁନାହିଁ । ତଥାପି ଟସ ବିଜୟୀ ଦଳ ବ୍ୟାଟିଂ କରିବା ଆଶା କରାଯାଉଛି ।
ସମ୍ଭାବ୍ୟ ଦଳ
ଇଂଲଣ୍ଡ: ବେନ ଡକେଟ୍, ଫିଲ ସଲ୍ଟ, ଜାମି ସ୍ମିଥ୍, ଜୋ ରୁଟ୍, ହ୍ୟାରୀ ବ୍ରୁକ, ଜୋସ ବଟଲର(ଅଧିନାୟକ), ଲାଏମ ଲିଭିଙ୍ଗଷ୍ଟୋନ, ଜାମି ଓଭରଟନ, ଜୋଫ୍ରା ଆର୍ଚର, ଆଦିଲ ରସିଦ, ମାର୍କ ଉଡ୍ ।
ଦକ୍ଷିଣ ଆଫ୍ରିକା: ର୍ୟାନ ରିକେଲଟନ, ତେମ୍ବା ବଭୁମା(ଅଧିନାୟକ), ରାଶି ଭାନ ଡର ଡୁସେନ, ଆଡେନ ମାରକ୍ରମ, ହେନରିକ କ୍ଲାସେନ, ଡେଭିଡ୍ ମିଲର, ମାର୍କୋ ଜାନସେନ, ୱିଆନ ମୋଲ୍ଡର, କେଶବ ମହାରାଜ, କାଗିସୋ ରାବାଡା, ଲୁଙ୍ଗି ଏନଗିଡ଼ି ।
