ୱାଶିଂଟନ,୦୨/୧୨: ଆମେରିକାରେ ରାଷ୍ଟ୍ରପତି ନିର୍ବାଚନ ଜିତିଥିବା ଡୋନାଲ୍ଡ ଟ୍ରମ୍ପ୍ ନିଜ ସମୁଦି ଚାର୍ଲସ କୁଶନରଙ୍କୁ ଫ୍ରାନ୍ସରେ ଆମେରିକୀୟ ରାଷ୍ଟ୍ରଦୂତ ଭାବେ ନିଯୁକ୍ତି ଦେବା ପାଇଁ ଘୋଷଣା କରିଛନ୍ତି । ଚାର୍ଲସଙ୍କୁ ଟ୍ରମ୍ପ୍ ଜଣେ ଚମତ୍କାର ବ୍ୟବସାୟିକ ମ୍ୟାଗ୍ନେଟ, ପରୋପକାରୀ ଏବଂ ଡିଲ୍ ମେକର ଅଭିହିତ କରିଛନ୍ତି । ରିଅଲ ଇଷ୍ଟେଟ ବ୍ୟବସାୟରୁ ଟ୍ରମ୍ପ୍ ଓ ଚାର୍ଲସ ପରସ୍ପରକୁ ଜାଣିଥିଲେ । ଏହାପରେ ୨୦୦୯ରେ ଟ୍ରମ୍ପ୍ଙ୍କ ଝିଅ ଇଭାଙ୍କା ଏବଂ ଚାର୍ଲସଙ୍କ ପୁଅ ଜ୍ୟାରେଡଙ୍କ ବିବାହ ହୋଇଥିଲା । ଫଳରେ ଉଭୟ ପରିବାର ପରସ୍ପରର ବନ୍ଧୁ ହୋଇଥିଲେ ।
ରିପୋର୍ଟ ମୁତାବକ, ୨୦୦୫ରେ ମିଥ୍ୟା ଟିକସ ରିଟର୍ନ ପ୍ରସ୍ତୁତ କରିବା ଏବଂ ଫେଡେରାଲ ନିର୍ବାଚନ କମିଶନଙ୍କୁ ମିଥ୍ୟା ବୟାନ ଦେବାକୁ ନେଇ ଚାର୍ଲସଙ୍କୁ ଦୋଷୀ ସାବ୍ୟସ୍ତ କରାଯାଇଥିଲା । ଏହି ମାମଲାରେ ସେ ୧୬ ମାସରୁ ଅଧିକ ସମୟ ଜେଲଦଣ୍ଡ ଭୋଗିଥିଲେ । ୨୦୨୦ରେ ଟ୍ରମ୍ପ୍ ନିଜ ରାଷ୍ଟ୍ରପତି କ୍ଷମତା ବ୍ୟବହାର କରି ତାଙ୍କୁ ଜେଲରୁ ମୁକୁଳାଇଥିଲେ ।
ଚାର୍ଲସଙ୍କୁ ରବିବାର ଫ୍ରାନ୍ସ ରାଷ୍ଟ୍ରଦୂତ ଭାବେ ଘୋଷଣା କରି ଟ୍ରମ୍ପ୍ ସୋସିଆଲ ମିଡିଆରେ ଲେଖିଛନ୍ତି, ଚାର୍ଲସ କୁଶନରଙ୍କୁ ରାଷ୍ଟ୍ରଦୂତ ଭାବେ ମନୋନୀତ କରି ମୁଁ ଖୁସି । ସେ ଜଣେ ପରୋପକାରୀ, ଚମତ୍କାର ବ୍ୟବସାୟୀ ଏବଂ ଡିଲ୍ ମେକର । ଚାର୍ଲସ କୁଶନର ଗ୍ରୁପ କମ୍ପାନିଗୁଡ଼ିକର ପ୍ରତିଷ୍ଠାତା ଓ ଅଧ୍ୟକ୍ଷ । ତାଙ୍କ ସଂସ୍ଥା ବିଶ୍ୱର ଜଣାଶୁଣା ତଥା ସଫଳ ଘରୋଇ ରିଅଲ୍ ଇଷ୍ଟେଟ ମଧ୍ୟରେ ଅନ୍ୟତମ । ତାଙ୍କୁ ଅର୍ନଷ୍ଟ ଆଣ୍ଡ ୟଙ୍ଗ ପକ୍ଷରୁ ନ୍ୟୁ ଜର୍ସି ଏଣ୍ଟରପ୍ରିନ୍ୟୁର ଅଫ୍ ଦ ଇୟର ଆୱାର୍ଡ ଦିଆଯାଇଥିଲ।
