ମୁମ୍ବାଇ,୨୩/୦୧: ପୁଣି ପରଦାରେ ନିଜ ଯାଦୁ ଦେଖାଇବାକୁ ଯାଉଛନ୍ତି ବିକି କୌଶଲ । ଖୁବ୍ ଶୀଘ୍ର ରିଲିଜ ହେବାକୁ ଯାଉଛି ବିକି କୌଶଲ ଏବଂ ରଶ୍ମିକା ମନ୍ଦାନାଙ୍କ ଅଭିନୀତ ଫିଲ୍ମ 'ଛାବା' । ଫିଲ୍ମ "ଛାବା" ଆସନ୍ତା ମାସ୧୪ ତାରିଖରେ ରିଲିଜ ହେବାକୁ ଯାଉଛି । ଏହାରି ମଧ୍ୟରେ ପିଲ୍ମର ଟ୍ରେଲର ରିଲିଜ କରିଛନ୍ତି ନିର୍ମାତା। ଟ୍ରେଲରରେ ବିକି କୌଶଲ ଏବଂ ରଶ୍ମିକା ମନ୍ଦାନାଙ୍କ ଦମଦାର ଲୁକ ଦେଖିବାକୁ ମିଳିଥିବା ବେଳେ ଅକ୍ଷୟ ଖନ୍ନାଙ୍କୁ ମଧ୍ୟ ନଜର ଆସିଛନ୍ତି।
ତେବେ "ଛାବା"ର ନିର୍ମାତା ମାଡୋକ ତାଙ୍କ ଅଫିସିଆଲ୍ ଇନଷ୍ଟାଗ୍ରାମରେ ଫିଲ୍ମର ଟ୍ରେଲର ରିଲିଜ କରିଛନ୍ତି । ବିକି କୌଶଳ ଦମଦାର ଲୁକ ସହ ଆକ୍ସନ ଅବତାରରେ ଦେଖିବାକୁ ମିଳିଛି । ଗତକାଲି ମୁମ୍ବାଇରେ ଫିଲ୍ମର ଟ୍ରେଲର ଲଞ୍ଚ କରାଯାଇଥିଲା। ଟ୍ରେଲରର ଆରମ୍ଭରୁ ଶେଷ ପର୍ଯ୍ୟନ୍ତ ଅନେକ ଶକ୍ତିଶାଳୀ ସଂଳାପ ଶୁଣିବାକୁ ମିଳୁଛି । ଗୋଟିଏ ସିନରେ, ବିକି ଶତ୍ରୁର ଛାତିରେ ତାଙ୍କ ପାଦ ରଖି କହୁଥିବାର ଦେଖାଯାଇଛି, "ଆମେ ଶବ୍ଦ କରୁନାହୁଁ, ଆମେ ସିଧାସଳଖ ଶିକାର କରୁ ।" ଟ୍ରେଲରରେ ରଶ୍ମିକା ମନ୍ଦାନା ମଧ୍ୟ ନଜର ଆସିଛନ୍ତି । ଏଥିରେ ମରାଠା ଏବଂ ମୋଗଲମାନଙ୍କ ମଧ୍ୟରେ ତୀବ୍ର ଯୁଦ୍ଧ ଦେଖାଯାଇଛି । ମରାଠାମାନେ ସ୍ୱରାଜ ପ୍ରତିଷ୍ଠା ପାଇଁ ସଂଘର୍ଷ କରନ୍ତି, ସ୍ୱାଧୀନତା ଏବଂ ସୁରକ୍ଷାର ଏକ ସ୍ୱପ୍ନ, ଯେତେବେଳେ ମୋଗଲ ସାମ୍ରାଜ୍ୟ ନିଜର ଶକ୍ତି ବଜାୟ ରଖିବା ପାଇଁ ଯେକୌଣସି ବିଦ୍ରୋହକୁ ଦମନ କରିବାକୁ ପ୍ରତିଜ୍ଞା କରେ । ଫିଲ୍ମର ସଂଳାପଗୁଡ଼ିକ ଆପଣଙ୍କ ହୃଦୟ ଜିତିବ ।
ତେବେ ଏହି ଚଳଚ୍ଚିତ୍ରରେ ବିକି କୌଶଲ ମରାଠା ସାମ୍ରାଜ୍ୟର ପ୍ରତିଷ୍ଠାତା ଛତ୍ରପତି ଶିବାଜୀ ମହାରାଜଙ୍କ ଜ୍ୟେଷ୍ଠପୁତ୍ର ଛତ୍ରପତି ସମ୍ୱାଜୀ ମହାରାଜ ଭୂମିକାରେ ନଜର ଆସିବେ। ତାଙ୍କ ପତ୍ନୀ ୟଶୁଭାଇ ଭୂମିକାରେ ଅଭିନୟ କରିବେ ରଶ୍ମିକା । ନିର୍ଦ୍ଦେଶକ ଲକ୍ଷ୍ମଣ ଉତ୍ତେକର ଛାବା ଚଳଚ୍ଚିତ୍ରର ନିର୍ଦ୍ଦେଶନା ଦେଇଛନ୍ତି । ଯିଏକି ବିକି କୌଶଲଙ୍କ ସହ ଫିଲ୍ମ 'ଜରା ହଟକେ ଜରା ବଚକେ' ନିର୍ଦ୍ଦେଶନା ଦେଇଥିଲେ । ନିର୍ଦ୍ଦେଶକଙ୍କ ସହ ଏହା ବିକିଙ୍କ ଦ୍ୱିତୀୟ ଫିଲ୍ମ ହୋଇଥିବା ବେଳେ ଉଭୟଙ୍କ ସହ ରଶ୍ମିକାଙ୍କ ଏହା ପ୍ରଥମ ଫିଲ୍ମ ।
