ବାଣପୁର,୧୭।୯ : ଖୋର୍ଦ୍ଧା ଜିଲ୍ଲା ବାଣପୁର ବ୍ଲକ ସାନ ହନ୍ତୁଆଡ଼ ଗ୍ରାମରେ ଏକ ଅଭାବନୀୟ ଘଟଣା ଘଟିଛି l ସାପ କାମୁଡ଼ାରେ ୪ବର୍ଷର ଶିଶୁ ପୁତ୍ରର ମୃତ୍ୟୁ ଘଟିଛି l ମୃତ ଶିଶୁପୁତ୍ର ଜଣଙ୍କ ହେଲେ ପବିତ୍ର ରାଉଳଙ୍କ ପୁଅ ରାମ ପ୍ରସାଦ ରାଉଳ ।
ପବିତ୍ର ପରିବାର ପ୍ରତିପୋଷଣ ନିମନ୍ତେ ବିଦେଶ ଯାଇଥିବା ବେଳେ ତାଙ୍କ ପତ୍ନୀ ଓ ଚାରିବର୍ଷର ପୁଅ କିଛି ମାସ ହେବ ବାପଘର ତେନ୍ତୁରୁଡିହ ଗ୍ରାମରେ ରହୁଛନ୍ତି l ମଙ୍ଗଳବାର ବିଳମ୍ବିତ ରାତିରେ ରାମ ଓ ତାଙ୍କ ମା’ ବେକରେ ଏକ ବିଷଧର ରଣା ସାପ ଗୁଡେଇ ହେଉଥିଲା। ବେକରେ କଣ ଗୋଟାଏ ସଲସଲ ହେଉଛି ଭାବି ରାମଙ୍କ ମା’ ହାତ ମାରିଥିଲେ ଓ ହଠାତ ତାଙ୍କ ବେକରୁ ଭିଡି ଫୋପାଡ଼ି ଦେଇ ଲାଇଟ ଲଗାଇଥିଲେ l ଏକ ରଣା ସାପକୁ ଦେଖି ମା’ ଛୁଆ ଚିତ୍କାର କରିଥିଲେ l ଚିତ୍କାର ଶୁଣି ପରିବାର ଲୋକେ ଉଠିପଡ଼ି ସାପଟିକୁ ଘରୁ ଖୋଜି ବାହାର କରିଥିଲେ l ପରେ ସାପ କାମୁଡି ଦେଇଛି ବୋଲି ରାମ କହିଥିଲା। ଏହାଶୁଣି ରାମଙ୍କୁ ତୁରନ୍ତ ବାଣପୁର ସରକାରୀ ଡାକ୍ତରଖାନାରେ ଭର୍ତ୍ତି କରିଥିଲେ l ସେଠାରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଥିଲା। ଏନେଇ ବାଣପୁର ଥାନାରେ ଅଭିଯୋଗ ପରେ ପୁଲିସ ଏକ ଅପମୃତ୍ୟୁ ମାମଲା ରୁଜୁ କରିବା ସହ ମୃତଦେହ ବ୍ୟବଛେଦ କରି ପରିବାର ଲୋକଙ୍କୁ ହସ୍ତାନ୍ତର କରିଛି।
