ଖିରି ଡେକଚିରେ ପଡି ଶିଶୁ ଗୁରୁତର

ନୂଆପଡ଼ା/ଖଡ଼ିଆଳ,୨୫।୫: ନୂଆପଡ଼ା ଜିଲ୍ଲା ଖଡ଼ିଆଳ ବ୍ଲକ ରାନିମୁଣ୍ଡା ଗାଁରେ ଏକ ଅଭାବନୀୟ ଘଟଣା ଘଟିଛି । ଦଶାହ ଗଙ୍ଗା ଭୋଜି ପାଇଁ ରନ୍ଧା ଚାଲିଥିବାବେଳେ ଖିରି ପାତ୍ରରେ ପଡି ଜଣେ ଶିଶୁ ଗୁରୁତର ଆହତ ହୋଇଛନ୍ତି । ଶିଶୁ ଜଣକ ବିକାଶ ହେର୍ଣ୍ଣା(୪) । ଅପରାହ୍ନରେ ଶିଶୁଙ୍କ ଅବସ୍ଥା ସଙ୍କଟାପନ୍ନ ହେବାରୁ ରାୟପୁର ସ୍ଥାନାନ୍ତର ହୋଇଛନ୍ତି ।

ରାନିମୁଣ୍ଡା ଗାଁରେ ଏକ ଦଶାହ ଗଙ୍ଗାଭୋଜି ଚାଲିଥିଲା । ଏହି ସମୟରେ ଗାଁର ହୁତେଶ ହେର୍ଣ୍ଣାଙ୍କ ଚାରି ବର୍ଷର ପୁଅ ବିକାଶ ଭୋଜି ପାଖରେ ଖେଳୁଥିଲେ । ଏତିକିବେଳେ ଖିରି ଡେକଚି ଖୋଲା ହୋଇଥିବାରୁ  ବିକାଶ ସେଥିରେ ପଡି ଯାଇଥିଲେ । ଏହି ସମୟରେ ଗାଁର ଧନସିଂ ନାଗ ବିକାଶଙ୍କୁ ଖିରି ଡେକଚି ଭିତରୁ ଉଦ୍ଧାର କରିଥିଲେ । ତେବେ ଶିଶୁର ଦେହ ସାରା ପୋଡି ଯାଇଥିବା ବେଳେ ଧନସିଂଙ୍କ ଦୁଇ ହାତ ମଧ୍ୟ ପୋଡି ଯାଇଛି । ପ୍ରଥମେ ଏହି ଶିଶୁଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଖଡ଼ିଆଳ ମିଶନ ହସ୍ପିଟାଲରେ ଭର୍ତ୍ତି କରି ପ୍ରାଥମିକ ଚିକିତ୍ସା କରିଥିଲେ । ସେଠାରେ ଶିଶୁଙ୍କ ସ୍ବାସ୍ଥ୍ୟବସ୍ଥା ସଙ୍କଟାପନ୍ନ ହେବାରୁ ରାୟପୁରର ଏକ ଘରୋଇ ହସ୍ପିଟାଲକୁ ସ୍ଥାନାନ୍ତର କରିଛନ୍ତି ।