‘ଗଣତନ୍ତ୍ରକୁ ମଜାକ୍ରେ ପରିଣତ କରି ସାରିଲେଣି କେନ୍ଦ୍ର ସରକାର’: ଅଧ୍ୟାଦେଶ ବିରୋଧରେ ବର୍ଷିଲେ କେଜରିଓ୍ବାଲ ଓ ମମତା
ନୂଆଦିଲ୍ଲୀ ୨୩/ ୦୫: କେନ୍ଦ୍ର ସରକାରଙ୍କ ବିରୁଦ୍ଧରେ ମୋର୍ଚ୍ଚା ଆରମ୍ଭ କରି ଦେଇଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲ । କେନ୍ଦ୍ର ପକ୍ଷରୁ ଆଗତ ଜାତୀୟ ରାଜଧାନୀ ପ୍ରଶାସନିକ ସେବା ପ୍ରାଧିକରଣ (NCCSA) ଅଧ୍ୟାଦେଶ ବିରୁଦ୍ଧରେ ମଙ୍ଗଳବାର ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଭେଟିଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ । ଗତ ଶୁକ୍ରବାର କେନ୍ଦ୍ର ପକ୍ଷରୁ ଏଭଳି ଅଧ୍ୟାଦେଶ ଅଣାଯିବା ପରେ ତୀବ୍ର ବିରୋଧ କରିଥିଲେ କେଜରିଓ୍ବାଲ । ପରେ ସେ ପଶ୍ଚିମବଙ୍ଗ ସିଏମ୍ ମମତା ବାନାର୍ଜୀଙ୍କୁ ଭେଟି ଅଧ୍ୟାଦେଶ ବିରୁଦ୍ଧରେ ସମର୍ଥନ ଦେବାକୁ ଅନୁରୋଧ କରିଛନ୍ତି ।
ସୂଚନା ଯେ, ଦିଲ୍ଲୀରେ ପ୍ରଶାସନିକ ଅଧିକାରୀଙ୍କ ଉପରେ କେଜରିଓ୍ବାଲ ସରକାରଙ୍କ ନିୟନ୍ତ୍ରଣ ରହିବା ସପକ୍ଷରେ ରାୟ ପ୍ରକାଶ କରିଥିଲେ ସର୍ବୋଚ୍ଚ ନ୍ୟାୟାଳୟ । ତେଣୁ ଅମଲା ମାନଙ୍କ ଉପରେ ଅନୁଶାସନାତ୍ମକ କାର୍ଯ୍ୟାନୁଷ୍ଠାନ ପାଇଁ ଗତ ଶୁକ୍ରବାର ଜାତୀୟ ରାଜଧାନୀ ପ୍ରଶାସନିକ ସେବା ପ୍ରାଧିକରଣ (NCCSA) ଅଧ୍ୟାଦେଶ ଜାରି କରିଥିଲେ କେନ୍ଦ୍ର ସରକାର । ଏହା ବିରୁଦ୍ଧରେ ଦିଲ୍ଲୀ ସରକାର ବିରୋଧୀଙ୍କ ସମର୍ଥନ ଜୁଟାଇବା ଆରମ୍ଭ କରିଦେଇଛନ୍ତି ।
କେନ୍ଦ୍ରର ଅଧ୍ୟାଦେଶ ବିରୁଦ୍ଧରେ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲ କହିଛନ୍ତି, ‘ଦିଲ୍ଲୀର ଆମର ସରକାର ଆସିବା ପରେ କେନ୍ଦ୍ର ସରକାର ସମସ୍ତ କ୍ଷମତା ନିଜ ହାତକୁ ନେଇଯାଇଥିଲେ । ୮ ବର୍ଷ ଧରି ଲଢେଇ କରିବା ପରେ ସୁପ୍ରିମକୋର୍ଟରେ ଆମର ବିଜୟ ହୋଇଥିଲା । କିନ୍ତୁ ଏବେ ସେମାନେ ଅଧ୍ୟାଦେଶ ଆଣିଛନ୍ତି । ଯେତେବେଳେ କି ସୁପ୍ରିମକୋର୍ଟ ବନ୍ଦ ରହିଥିଲା । ସେମାନେ ଗଣତନ୍ତ୍ରକୁ ମଜାକ୍ରେ ପରିଣତ କରିଦେଇଛନ୍ତି । ଦେଶର ଯେଉଁଠି ବି ବିଜେପି ସରକାରରେ ନାହିଁ ସେଠାରେ ସେମାନେ ବିଧାୟକମାନଙ୍କୁ କିଣି ନେଉଛନ୍ତି ନଚେତ୍ ରାଜ୍ୟ ସରକାର ଗୁଡିକୁ ହଇରାଣ କରିବା ପାଇଁ ତଦନ୍ତକାରୀ ସଂସ୍ଥାଗୁଡିକୁ ବ୍ୟବହାର କରୁଛନ୍ତି ନଚେତ୍ ରାଜ୍ୟପାଳଙ୍କ କାର୍ଯ୍ୟାଳୟକୁ ଲଗାଇ ଦେଉଛନ୍ତି । ତେଣୁ ଆମେ ଯଦି ରାଜ୍ୟସଭାରେ ତାଙ୍କୁ ପରାସ୍ତ କରିପାରିବା ତେବେ ଯାଇ ଆଗାମୀ ଲୋକସଭା ନିର୍ବାଚନ ପୂର୍ବରୁ ସେମି-ଫାଇନାଲ ହେବ’।
ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି, ‘ଆମେ ସର୍ବୋଚ୍ଚ ନ୍ୟାୟାଳୟଙ୍କୁ ସମ୍ମାନ କରୁ ଏବଂ କେବଳ ସର୍ବୋଚ୍ଚ ନ୍ୟାୟାଳୟ ହିଁ ଏ ଦେଶକୁ ରକ୍ଷା କରିପାରିବେ । ସୁପ୍ରିମକୋର୍ଟଙ୍କ ରାୟ ସତ୍ତ୍ବେ କେନ୍ଦ୍ର ଏଭଳି ଅଧ୍ୟାଦେଶ ଆଣିଛି । ମୁଁ ସମସ୍ତ ଦଳଙ୍କୁ ଅପିଲ୍ କରୁଛି, ସମସ୍ତେ ଏକାଠି ହୋଇ ଆସନ୍ତା ଲୋକସଭା ନିର୍ବାଚନରେ ବିଜେପିକୁ ପରାସ୍ତ କରନ୍ତୁ । ଏହା ଏକ ବଡ ସୁଯୋଗ । କେନ୍ଦ୍ର ସରକାର ଆଣିଥିବା ଅଧ୍ୟାଦେଶକୁ ଆମ ଦଳ (ତୃଣମୂଳ କଂଗ୍ରେସ) ରାଜ୍ୟସଭାରେ ବିରୋଧ କରିବ ।
#WATCH | This government has become a government 'of the agency, by the agency and for the agency'. We fear the Central govt might change the Constitution, they might change the name of the country… They don't even respect the Supreme Court verdicts: WB CM Mamata Banerjee pic.twitter.com/JHisRxfUUB
— ANI (@ANI) May 23, 2023
