ନୂଆଦିଲ୍ଲୀ,୨୮/୧୦: ବିହାର ପରେ ଏବେ ଦେଶର ଆଉ ୧୨ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ଭୋଟର ତାଲିକା ସଂଶୋଧନ ହେବ । ଆଜିଠାରୁ ହିଁ ଏହି ସ୍ୱତନ୍ତ୍ର ବ୍ୟାପକ ସଂଶୋଧନ ଆରମ୍ଭ ହୋଇଛି  । ଫେବ୍ରୁଆରୀ ୭ରେ ଏହା ଶେଷ ହେବ । ରାଜସ୍ଥାନ, ଉତ୍ତରପ୍ରଦେଶ, ମଧ୍ୟପ୍ରଦେଶ, ଗୁଜରାଟ, କେରଳ, ଛତିଶଗଡ଼, ପଶ୍ଚିମବଙ୍ଗ, ତାମିଲନାଡୁ, ଗୋଆ, ଆଣ୍ଡାମାନ ଏବଂ ନିକୋବର, ଲାକ୍ଷାଦ୍ୱୀପ ଓ ପୁଡୁଚେରି ରାଜ୍ୟରେ ଏସ୍‌ଆଇଆର ଆରମ୍ଭ ହୋଇଛି । ଏହାକୁ ନେଇ ନିର୍ବାଚନ କମିଶନକୁ ଟାର୍ଗେଟ କରିଛି କଂଗ୍ରେସ । ବିହାରରେ ଏସ୍‌ଆଇଆରକୁ ନେଇ ଉଠିଥିବା ପ୍ରଶ୍ନ ପ୍ରଥମେ ଉତ୍ତର ଦିଅନ୍ତୁ ନିର୍ବାଚନ କମିଶନ ବୋଲି କହିଛନ୍ତି କଂଗ୍ରେସ ନେତା ପବନ ଖେଡା ।

୧୨ ରାଜ୍ୟରେ ଭୋଟର ତାଲିକା ସଂଶୋଧନକୁ ନେଇ ନିର୍ବାଚନ କମିଶନଙ୍କୁ ଟାର୍ଗେଟ କରିଛି କଂଗ୍ରେସ । ପବନ ଖେଡ଼ା କହିଛନ୍ତି, ଏବେ ପୁଣି ୧୨ ରାଜ୍ୟରେ ଏସ୍ଆଇଆର ଆରମ୍ଭ ହୋଇଛି । ଏବେ ଯାଏଁ ବିହାରରେ ହୋଇଥିଲା ଏସ୍‌ଆଇର ସହ ଜଡ଼ିତ ପ୍ରଶ୍ନର ଉତ୍ତର ମିଳିନାହିଁ । ପରିସ୍ଥିତି ଏପରି ହୋଇଥିଲା ଯେ SIR ସଂଶୋଧନ କରିବା ପାଇଁ ସୁପ୍ରିମକୋର୍ଟଙ୍କୁ ହସ୍ତକ୍ଷେପ କରିବାକୁ ପଡିଲା । ବିହାର ଏସ୍‌ଆଇର ମାଧ୍ୟମରେ ନିର୍ବାଚନ କମିଶନ ଏବଂ ବିଜେପିର ଉଦ୍ଦେଶ୍ୟ ସମଗ୍ର ଦେଶ ପାଖରେ ଅଛପା ନାହିଁ । ଯେତେବେଳେ SIR କରାଯାଏ, ନିର୍ବାଚନ କମିଶନର କର୍ମଚାରୀମାନେ ପ୍ରତ୍ୟେକ ଘରକୁ ଯାଆନ୍ତି, ନୂଆ ଭୋଟରଙ୍କୁ ଯୋଡନ୍ତି ଏବଂ ଯେଉଁମାନଙ୍କୁ ବାଦ ଦେବାକୁ ପଡ଼ିଥାଏ ସେମାନଙ୍କୁ ବାଦ୍ ଦିଅନ୍ତି । ଆଲାଣ୍ଡ ବିଧାନସଭା ନିର୍ବାଚନମଣ୍ଡଳୀରେ ରାହୁଲ ଗାନ୍ଧୀ ଭୋଟ୍ ଚୋରି ସମ୍ପର୍କରେ ପ୍ରକାଶ କରିଥିଲେ । ଭୋଟର ତାଲିକାରୁ ନାମ ବାଦ ଦେବା ପାଇଁ ଏକ କେନ୍ଦ୍ରୀୟ ଅଭିଯାନ ଚାଲିଥିବା କହିଛି ଏସଆଇଟି । ଏ ମାମଲା ଭିତରେ ନିର୍ବାଚନ କମିଶନ ପୁଣି ଏସ୍ଆଇଆର କରିବା ସନ୍ଦେହ ଘେରରେ ରହିଛି । ଉଦ୍ଦେଶ୍ୟ କିଛି ଠିକ ଲାଗୁ ନାହିଁ । ବିରୋଧୀ ଏବଂ ଭୋଟର ଉଭୟ ସନ୍ତୁଷ୍ଟ ନାହାନ୍ତି ।''

ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାର ସୋମବାର ସାମ୍ବାଦିକ ସମ୍ମିଳନୀରେ ଏସ୍‌ଆଇଆର ୨.୦ ବାବଦରେ ଘୋଷଣା କରିଥିଲେ । ସେ  କହିଥିଲେ ଯେ, ଡିସେମ୍ବର ୯ରେ ଏହି ୧୨ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ଚିଠା ସଂଶୋଧନ ଭୋଟର ତାଲିକା ଜାରି କରାଯିବ । ମୋଟ ୧୦୩ ଦିନର ପ୍ରକ୍ରିୟା ଚାଲିବ । ଅକ୍ଟୋବର ୨୮ରୁ ନଭେମ୍ବର ୩ ପର୍ଯ୍ୟନ୍ତ ଫର୍ମ ଛପା ଓ ତାଲିମ ଦିଆଯିବ । ନଭେମ୍ବର ୪ରୁ ଡିସେମ୍ବର ୪ ପର୍ଯ୍ୟନ୍ତ ଘରକୁ ଘର ବୁଲି ମତଦାତାଙ୍କର ସିଧାସଳଖ ଯାଞ୍ଚ ଓ ଗଣନା କରିହେ । ଡିସେମ୍ବର ୯ରେ ଚିଠା ଭୋଟର ତାଲିକା ଜାରି ହେବ । ଏହାପରେ ଡିସେମ୍ବର ୯ରୁ ୨୦୨୬ ଜାନୁଆରୀ ୮ ପର୍ଯ୍ୟନ୍ତ ଆପତ୍ତି ଓ ଦାବି ଉପସ୍ଥାପନ କରାଯିବ । ୨୦୨୬ ଫେବ୍ରୁଆରୀ ୭ରେ ଚୂଡ଼ାନ୍ତ ଭୋଟର ତାଲିକା ଜାରି କରାଯିବ । ଦ୍ୱିତୀୟ ପର୍ଯ୍ୟାୟରେ ୧୨ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳକୁ ସାମିଲ କରାଯାଇଛି । ଏସ୍‌ଆଇଆର୍‌ କାର୍ଯ୍ୟରେ ୫.୩୩ ଲକ୍ଷ ବିଏଲ୍‌ଓ ନିୟୋଜିତ ହୋଇଛନ୍ତି ।