ନୂଆଦିଲ୍ଲୀ: ଆସନ୍ତା ଗୁରୁବାର ଭାରତୀୟ ବୋଲର ୟୁଜବେନ୍ଦ ଚହଲଙ୍କ ଛାଡପତ୍ର ମାମଲାର ଶୁଣାଣି କରିବେ କୋର୍ଟ। ଏନେଇ ବମ୍ବେ ହାଇକୋର୍ଟ ବାନ୍ଦ୍ରା ମାଜିଷ୍ଟ୍ରେଟ କୋର୍ଟକୁ ଆଦେଶ ପ୍ରଦାନ କରିଛନ୍ତି। ମାର୍ଚ୍ଚ ୨୦ ତାରିଖରେ ଜଷ୍ଟିସ୍ ମାଧବ ଜମଦାରଙ୍କ ନେତୃତ୍ୱରେ ଗଠିତ ଖଣ୍ଡପିଠ ଫ୍ୟାମିଲି କୋର୍ଟରେ ଏହି ମାମଲାର ଶୁଣାଣି କରିବ ବୋଲି ଜଣାପଡିଛି। ଆଗକୁ ଆଇପିଏଲ ଭଳି ସିରିଜ ଆସିବାକୁ ଯାଉଥିବାରୁ ଏହି ମାମଲାର ବିଚାର ଫାଷ୍ଟଟ୍ରାକରେ କରାଯିବ ବୋଲି ଜଣାପଡିଛି।
ଚଳିତ ବର୍ଷର ଆଇପିଏଲ ସିଜନରେ ଚହଲ ପଞ୍ଜାବ କିଙ୍ଗ ଏକାଦଶ ପାଇଁ ଖେଳୁଛନ୍ତି। ମାର୍ଚ୍ଚ ୨୨ ତାରିଖରେ ପଞ୍ଜାବ କିଙ୍ଗସ ହାଇଦ୍ରାବାଦଠାରେ ନିଜର ପ୍ରଥମ ମ୍ୟାଚ ଗୁଜୁରାଟ ଟାଇଟନ ବିପକ୍ଷରେ ଖେଳିବାକୁ ଯାଉଛି। ତେବେ ଚହଲ ମାର୍ଚ୍ଚ ମାସ ଦ୍ୱିତିୟ ସପ୍ତାହରୁ ନିଜ ଟିମ ସହ ଚଣ୍ଡିଗଡରେ ଅଭ୍ୟାଲ କରୁଥିବା ଜଣାପଡିଛି। ତେବେ ତାଙ୍କୁ ପୂର୍ବରୁ ଚାମ୍ପିୟନ ଟ୍ରଫି ଫାଇନାଲ ମ୍ୟାଚରେ ଦେଖିବାକୁ ମିଳିଥିଲା। ସେ ନିଜ ଦଳକୁ ସମର୍ଥନ କରିବାକୁ ଫାଇନାଲ ମ୍ୟାଚ ଦେଖିବାକୁ ଯାଇଥିଲେ। ତେବେ ତାଙ୍କୁ ଆରଜେ ମହଭାଶଙ୍କ ସହ ଏକାଠି ବସିଥିବା ଦେଖିବାକୁ ମିଳିଥିଲା।
ସୂଚନା ମୁତାବକ ଉଭୟ ଚହଲ ଓ ଧନଶ୍ରୀ ଗତ ଫେବୃଆରୀ ୫ ତାରିଖରେ ନିଜଆଡୁ ଫ୍ୟାମିଲି କୋର୍ଟରେ ଛାଡପତ୍ରପାଇଁ ଆବେଦନ କରିଥିଲେ। ତେବେ ଏହି ଛାଡପତ୍ରରେ ଉଭୟଙ୍କ ସହମତି ଥିବା ଜଣାପଡିଛି। ତେବେ ଫ୍ୟାମିଲି କୋର୍ଟ ଫେବୃଆରୀ ୨୦ ତାରିଖରେ ଶୁଣାଣି କରି ପ୍ରାରମ୍ଭିକ ପର୍ଯ୍ୟାୟରେ 6 ମାସପାଇଁ ଏନେଇ ଉଭୟଙ୍କୁ ଚିନ୍ତା କରିବାକୁ ଆଦେଶ ଦେଇଥିଲେ। ଆପଣଙ୍କୁ ଜଣାଇରଖୁ ଯେ ବିବାହ ପରେ ୨୦୨୨ ମସିହା ଜୁନ ମାସଠୁ ଉଭୟ ଚହଲ ଓ ଧନଶ୍ରୀ ସାଙ୍ଗରେ ରହୁଥିଲେ। ତେବେ ବିବାହର ୧୮ ମାସ ପରେ ଉଭୟଙ୍କ ମଧ୍ୟରେ ଫାଟ ସୃଷ୍ଟି ହେବାରୁ ସେମାନେ ଅଲଗା ହେବାକୁ ନିଷ୍ପତ୍ତି ନେଇଥିଲେ।
ପରେ ଉଭୟ ଚହଲ ଓ ଧନଶ୍ରୀ ଫ୍ୟାମିଲି କୋର୍ଟର ରାୟ ବିରୁଦ୍ଧରେ ମୁମ୍ୱାଇ ହାଇକୋର୍ଟରେ ମିଳିତ ଭାବେ ଏକ ପିଟିସନ ଦାଏର କରିଥିଲେ। ତେବେ ହିନ୍ଦୁ ବିବାହ ଆଇନର ଧାରା ୧୩ଖ ଅନୁସାରେ ଛାଡପତ୍ର ନବା ପୂର୍ବରୁ ଉଭୟ ସ୍ୱାମିସ୍ତ୍ରୀଙ୍କୁ ୬ ମାସର ମହଲତ ଦିଆଯାଇଥାଏ। ଏହି ସମୟକାଳ ମଧ୍ୟରେ ଉଭୟ ପକ୍ଷ ମନ ମିଶାଇ ଆଗକୁ ଚଳିବାକୁ ନିଷ୍ପତ୍ତି ନେବାକୁ ସମୟ ଦିଆଯାଇଥାଏ। ତେବେ ଯେଉଁଠି ଏପରି ହେବାର ସମ୍ଭାବନା ଆଦୈ ନଥାଏ ସେଠାରେ ଏହି ନିୟମ ବିପରିତରେ ଯାଇ ଏ ଦିଗରେ ତ୍ୱରିତ ନିଷ୍ପତ୍ତି ଗ୍ରହଣ କରାଯାଇଥାଏ।
ଉଭୟ ପକ୍ଷ ଅଢେଇ ବର୍ଷ ହେବ ସାଥିରେ ରହୁନଥିବାରୁ ଜଷ୍ଟିସ ଜମାଦାର ଏହି 6 ମାସର ମହଲତକୁ ରଦ୍ଧ କରି ଏହି ମାମଲାର ଶୁଣାଣି କରିବାକୁ ତାରିଖ ସ୍ଥିର କରିଛନ୍ତି। ଆଗରୁ ଏହି ମାମଲାର ଶୁଣାଣି କରି କୋର୍ଟ ଚହଲଙ୍କୁ ଧନଶ୍ରୀଙ୍କ ଭରଣପୋଷଣ ବାବଦକୁ ୪.୭୫ କୋଟି ଟଙ୍କା ପ୍ରଦାନ କରିବାକୁ ଆଦେଶ ଦେଇଥିଲେ। ପ୍ରଥମ ପର୍ଯ୍ୟାୟରେ ଚହଲ ଧନଶ୍ରୀଙ୍କୁ ୨.୩୭ କୋଟି ଟଙ୍କା ଦେଇଥିବା ଜଣାପଡିଛି। ତେବେ ଆସନ୍ତାକାଲିର ଶୁଣାଣିରେ ଏନେଇ ଚୂଡାନ୍ତ ନିଷ୍ପତ୍ତି ଆସିବ ବୋଲି ସୂଚନା ମିଳିଛି।
