ପୁରୀ,୨୯/୦୯: ସ୍ୱାମୀ ସମ୍ମୁଖରେ ମହିଳାଙ୍କୁ ବିବସ୍ତ୍ର କଲେ ଦୁଇ ଭାଇ । ଦାଦାବଟି ମାଗି ୨ ଭାଇ ଏଭଳି କାଣ୍ଡ ଘଟାଇଥିବା ବେଳେ ଜଣକୁ ଗିରଫ କରିଛି ବଳିଆପଣ୍ଡା ଥାନା ପୁଲିସ । ଗିରଫ ଅଭିଯୁକ୍ତ ହେଲା ବଳିଆପଣ୍ଡା ସିପସରୁବାଲିର ସୁରେଶ ସାହୁ (୨୪) । ତାକୁ ବୁଧବାର କୋର୍ଟ ଚାଲାଣ କରିଛି ପୁଲିସ ।

ଆଇଆଇସି ସୁଶାନ୍ତ ସାହୁ କହିଛନ୍ତି ଯେ, ବେଳାଭୂମିରେ ପୀଡ଼ିତାଙ୍କ ଏକ ପାନ ଦୋକାନ ରହିଛି । ସୋମବାର ରାତି ୭ଟାରେ ତାଙ୍କ ସ୍ୱମୀଙ୍କ ସହ ପୀଡ଼ିତା ପାନ ଦୋକାନରେ ବସିଥିଲେ । ସେହି ସମୟରେ ସୁରେଶ, ତା’ ଭାଇ ରାଜେଶ ସହ ଆଉ ୨ ଜଣ ଦୋକାନରେ ପହଞ୍ଚି ୧୦ ହଜାର ଟଙ୍କା ଦାଦାବଟି ମାଗିଥିଲେ ।

ପ୍ରତି ମାସରେ ୧୦ ହଜାର ଟଙ୍କା ଲେଖାଏଁ ଦେଲେ ଏଠାରେ ଦୋକାନ ଖୋଲିବୁ ବୋଲି କହି ଦମ୍ପତିଙ୍କୁ ଧମକ ଦେଇଥିଲେ । ବାରଣ କରିବାରୁ ମହିଳାଙ୍କୁ ଆକ୍ରମଣ କରି ତାଙ୍କୁ ବିବସ୍ତ୍ର କରିଥିବା ଅଭିଯୋଗ ହୋଇଛି । ଏପରିକି ମହିଳାଙ୍କ ସ୍ୱାମୀ ପ୍ରତିବାଦ କରିବା ବେଳେ ତାଙ୍କୁ ମଧ୍ୟ ପିଟିଥିଲେ ଆକ୍ରମଣକାରୀ । ଏନେଇ ମଙ୍ଗଳବାର ପୂର୍ବାହ୍ନରେ ଏତଲା ଦେଇଥିଲେ ମହିଳା । ପୁଲିସ ମାମଲା ରୁଜୁ କରି ସୁରେଶକୁ ଗିରଫ କରିଛି । ରାଜେଶ ଓ ଆଉ ୨ ଜଣ ଏବେ ଫେରାର୍‌ ଥିବା ପୁଲିସ କହିଛି ।