ସ୍ୱାସ୍ଥ୍ୟ ପାଇଁ ଲାଭଦାୟକ ଡାର୍କ ଚକୋଲେଟ୍, ଚାପ କମାଇବା ସହ ଦେଇଥାଏ ଏହି ସବୁ ଫାଇଦା

ନୂଆଦିଲ୍ଲୀ ୦୯/୦୨: ଚକୋଲେଟ୍ ଖାଇବାକୁ ସମସ୍ତେ ପସନ୍ଦ କରନ୍ତି। କିନ୍ତୁ ମନରେ ଅନେକ ସମୟରେ ପ୍ରଶ୍ନ ଥାଏ, ଚକୋଲେଟ୍ ସ୍ୱାସ୍ଥ୍ୟ ପାଇଁ ଭଲ ନା ଖରାପ। ଚକୋଲେଟ୍ ପ୍ରତିଦିନ ଖାଇ ପାରିବା କି ନାହିଁ? ତେବେ ଉତ୍ତରଟି ହଁ । ଚକୋଲେଟ୍ ସ୍ୱାସ୍ଥ୍ୟ ପାଇଁ ବହୁତ ଲାଭଦାୟକ। କିନ୍ତୁ ମିଲ୍କ ଚକୋଲେଟ୍ ବଦଳରେ ଆପଣ ଡାଏଟରେ ଡାର୍କ ଚକୋଲେଟ୍ ଅନ୍ତର୍ଭୁକ୍ତ କରିବା ଉଚିତ୍। ଡାର୍କ ଚକୋଲେଟ୍ ସ୍ୱାସ୍ଥ୍ୟ ପାଇଁ ଅତ୍ୟନ୍ତ ଲାଭଦାୟକ। ଏଥିରେ ଥୋବ୍ରୋମାଇନ୍ ଏବଂ ଫେନିଲଥାଇଲାମାଇନ୍ ଉପାଦାନ ମିଳିଥାଏ, ଯାହା ମସ୍ତିଷ୍କ ପାଇଁ ଜରୁରୀ ହୋଇଥାଏ। ଏହା ବ୍ୟତୀତ ଡାର୍କ ଚକୋଲେଟରେ ଫାଇବର, ଆଇରନ୍, ମ୍ୟାଗ୍ନେସିୟମ୍, ଜିଙ୍କ୍, ପୋଟାସିୟମ୍, ଏବଂ ସେଲେନିୟମ୍ ମିଳିଥାଏ। ତେବେ ଚାଲନ୍ତୁ ଜାଣିବା ଡାର୍କ ଚକୋଲେଟର ଫାଇଦା ବିଷୟରେ…

ଚିନ୍ତା ଦୂର କରିଥାଏ :

ଯେତେବେଳେ ବି ଆପଣ ଚାପରେ ଥାଆନ୍ତି, ଡାର୍କ ଚକୋଲେଟ୍ ଖାଇବାକୁ ଚେଷ୍ଟା କରନ୍ତୁ। ଏହା ମନୋବଳକୁ ସୁଦୃଢ କରିବାରେ ସାହାଯ୍ୟ କରିଥାଏ। ଡାର୍କ ଚକୋଲେଟ୍ ଷ୍ଟ୍ରେସ୍ ହରମୋନ୍ ହ୍ରାସ କରି ହାପି ହରମୋନ୍ ରିଲିଜ୍ କରିଥାଏ। ଯାହା ଆପଣଙ୍କୁ ଚାପରୁ ମୁକ୍ତି ଦେଇଥାଏ।

ହୃଦୟ ପାଇଁ ସୁସ୍ଥ :

ଡାର୍କ ଚକୋଲେଟ୍ ଖାଇବା ହୃଦୟ ରୋଗୀଙ୍କ ପାଇଁ ଲାଭଦାୟକ ହୋଇଥାଏ। ଡାର୍କ ଚକୋଲେଟରେ ମିଳୁଥିବା ଆଣ୍ଟିଅକ୍ସିଡାଣ୍ଟ ହୃଦୟକୁ ସୁସ୍ଥ ରଖିବାରେ ସାହାଯ୍ୟ କରିଥାଏ ।ଏହାକୁ ଖାଇବା ଦ୍ୱାରା ରକ୍ତଚାପ ନିୟନ୍ତ୍ରଣରେ ରହିଥାଏ। ଡାର୍କ ଚକୋଲେଟ୍ ଖାଇବା ଦ୍ୱାରା ହୃଦରୋଗ ହେବାର ଆଶଙ୍କା କମିଥାଏ। ଯଦି ଆପଣ ହୃଦଘାତର ସମ୍ମୁଖୀନ ହେଉଛନ୍ତି, ତେବେ ଏହାକୁ ବିଶେଷଜ୍ଞଙ୍କ ପରାମର୍ଶରେ ଖାଆନ୍ତୁ।

ଓଜନ କମାଇଥାଏ :

ଓଜନ ହ୍ରାସ କରିବାରେ ଡାର୍କ ଚକୋଲେଟ୍ ମଧ୍ୟ ପ୍ରଭାବଶାଳୀ ହୋଇଥାଏ। ଏଥିରେ କମ୍ କ୍ୟାଲୋରୀ ରହିଥାଏ। ଏଥିସହିତ ସୁଗାର ମାତ୍ରା ମଧ୍ୟ ସୀମିତ ରହିଥାଏ। ଯଦି ଆପଣ ଓଜନ ହ୍ରାସ କରିବାକୁ ଚାହାଁନ୍ତି, ତେବେ ଆପଣ ଏହାକୁ ନିଜ ଖାଦ୍ୟରେ ଅନ୍ତର୍ଭୁକ୍ତ କରିପାରିବେ।