କୋଲକାତା,୧୮/୦୨: ଯଦି ସ୍କୁଲ ବ୍ୟାଗରେ ଡ୍ରଗ୍ସ ରଖି ଦିଆଯାଏ ତେବେ କ’ଣ ହେବ? ପୁଲିସକୁ ଠକିବା ପାଇଁ ଏହାଠାରୁ ଭଲ ଉପାୟ ଆଉ କ'ଣ ହୋଇପାରେ ? ମାଲଦାରେ ଛୋଟ ପିଲାଙ୍କ ମାଧ୍ୟମରେ ଏକ ବିରାଟ ଡ୍ରଗ୍ସ ରିଙ୍ଗ୍ ଗଠିତ ହୋଇଛି । ମାଲଦା ଆମ୍ୱ ପାଇଁ ଜଣାଶୁଣା କିନ୍ତୁ ଏହା ଏବେ ଡ୍ରଗ୍ସ ହବ୍ ପାଲଟିଛି । ଉତ୍ତରବଙ୍ଗରେ ଡ୍ରଗ୍ସ ଚାଲାଣ ଏକ ଶିଳ୍ପର ରୂପ ନେଇଛି । ଅନ୍ୟ ରାଜ୍ୟରୁ କଞ୍ଚାମାଲ ଆଣି ମାଲଦାରେ ଡ୍ରଗ୍ସ ତିଆରି କରାଯାଉଛି ।
ଇଂରାଜୀ ବଜାର ଅଞ୍ଚଳର କୁମାରପୁର । ଏହି ସ୍ଥାନଟି ଅନ୍ୟ ଗ୍ରାମାଞ୍ଚଳ ପରି । କିନ୍ତୁ କିଏ ଭାବିଥିଲା ଯେ କୁମାରପୁରରେ ଏକ ବିରାଟ ନିଶା ବଳୟ ବିକଶିତ ହୋଇଛି । ସମ୍ପ୍ରତି ମାଲଦା ଜିଲ୍ଲା ପୁଲିସ ତଦନ୍ତ ସମୟରେ କୁମାରପୁରର ଏକ କାରଖାନାରୁ ୧୭ କୋଟି ଟଙ୍କାର ବ୍ରାଉନସୁଗାର ଜବତ କରିଛି । ଉତ୍ତରପୂର୍ବ ରାଜ୍ୟ ଆସାମ, ମଣିପୁର, ମେଘାଳୟ, ମିଜୋରାମ ଏବଂ ନାଗାଲାଣ୍ଡରୁ ନିଶା ତିଆରି ପାଇଁ କଞ୍ଚାମାଲ ଉତ୍ତରବଙ୍ଗର ମାଲଦାରେ ପହଞ୍ଚେ । ତା'ପରେ, ସେହି କଞ୍ଚାମାଲରୁ ବିଭିନ୍ନ ଡ୍ରଗ୍ସ ତିଆରି କରାଯାଏ । ଆମ୍ୱ ଉତ୍ପାଦନ ପାଇଁ ପ୍ରସିଦ୍ଧ ମାଲଦା ଏବେ ନିଶା ଉତ୍ପାଦନ କରୁଛି ।
କୁମାରପୁରରେ ଗୁପ୍ତ କାରଖାନା:
କୁମାରପୁର ପରି ଗୁପ୍ତ କାରଖାନାରେ ନିଶା ତିଆରି କରିବା ପରେ ଏହା ସିଧାସଳଖ ପୂର୍ବ ଭାରତକୁ ଯାଉଛି । ବଙ୍ଗଳାରେ ଅନ୍ତଃରାଜ୍ୟ ଡ୍ରଗ୍ସ ଗ୍ୟାଙ୍ଗର ଜଣେ କିଙ୍ଗପିନ୍ ଏନାରୁଲ ଶେଖ୍ ଅଛନ୍ତି । ଗତ ଜାନୁଆରୀରେ ପୁଲିସ କୋଲକାତାର ଏଣ୍ଟାଲି ଥାନା ଅଞ୍ଚଳରେ ଚଢ଼ଉ କରି ତାଙ୍କୁ ଗିରଫ କରିଥିଲା । ଅଭିଯୁକ୍ତ ଏହି ଡ୍ରଗ୍ସ ବ୍ୟବସାୟରୁ ହଜାର ହଜାର କୋଟି ଟଙ୍କା ଲାଭ କରିଛି । ପୁଲିସ ତାଙ୍କୁ ପଚରାଉଚରା କରିବା ପରେ ଅନ୍ୟ ଅନେକ ଅଭିଯୁକ୍ତଙ୍କୁ ଗିରଫ କରିଛି । ଅଭିଯୁକ୍ତମାନଙ୍କୁ ଗୋଆରୁ ଗିରଫ କରାଯାଇଛି । ମାଲଦା ଜିଲ୍ଲା ପୁଲିସ ଅଧିକ୍ଷକ ଅଭିଜିତ ବାନାର୍ଜୀ କହିଛନ୍ତି, "ବାହକମାନେ ମଧ୍ୟ ଛୋଟ ଛୋଟ ପ୍ୟାକେଟ୍ କରି ସ୍ଥାନୀୟ ଅଞ୍ଚଳରେ ଡ୍ରଗ୍ସ ବିକ୍ରି କରୁଛନ୍ତି । ଆମେ ଚଢ଼ଉ କରି ସେମାନଙ୍କ ମଧ୍ୟରୁ ଅନେକଙ୍କୁ ଗିରଫ ମଧ୍ୟ କରିଛୁ ।’ ମାଲଦା ଜିଲ୍ଲା ପୁଲିସ ସୂତ୍ର ଅନୁଯାୟୀ, ନିଶାଦ୍ରବ୍ୟ ତିଆରି କରିବା ପରେ, ଛୋଟ ସ୍କୁଲ ଛାତ୍ରମାନେ ସ୍ଥାନୀୟ ଅଞ୍ଚଳରେ ବିକ୍ରି କରିବା ପାଇଁ ବାହକ ଭାବରେ କାମ କରୁଛନ୍ତି । ଚାଲାଣକାରୀମାନେ ୧୨ରୁ ୧୪ ବର୍ଷ ବୟସର ନାବାଳକମାନଙ୍କୁ ବାଛି ଏହି ଉଦ୍ଦେଶ୍ୟରେ ବ୍ୟବହାର କରୁଛନ୍ତି । ବହି ଏବଂ ଖାତାରେ ହଜାର ହଜାର ଟଙ୍କାର ନିଶାଦ୍ରବ୍ୟ ଚୋରା ଚାଲାଣ ହେଉଛି । ମହିଳାମାନେ ମଧ୍ୟ ବାହକ ଭାବରେ କାମ କରୁଛନ୍ତି । ଶିଶୁ ଖାଦ୍ୟ ଆଢୁଆଳରେ ନିଶାଦ୍ରବ୍ୟ ଚୋରା ଚାଲାଣ ହେଉଛି । କେତେକ ଟଙ୍କା ପାଇଁ ଏହା କରନ୍ତି । କେତେକ ନିଶା ପାଇଁ ଏହା କରନ୍ତି । ଏହି ଚାଲାଣକାରୀ ଦଳରୁ ଉଦ୍ଧାର ଜଣେ ନାବାଳକକୁ ଏ ବିଷୟରେ ପଚରାଯାଇଥିଲା । ସେ କହିଥିଲେ, "ସେମାନେ ଆମକୁ ଟଙ୍କା ଦେବେ ନାହିଁ, ବରଂ ସେମାନେ ଆମକୁ ଡଗ୍ସ ଦେବେ ।’ ଶୈଷବ ନଷ୍ଟ ହେଉଛି, ସମାଜ କ୍ଷତିଗ୍ରସ୍ତ ହେଉଛି । କିନ୍ତୁ ଏହି ଡ୍ରଗ୍ସ ଶିଳ୍ପ ଜାଲ କିପରି ସୃଷ୍ଟି ହେଲା ପୁଲିସ ତା’ର ଉତ୍ତର ଖୋଜୁଛି ।
ଅଧିକ ପଢ଼ନ୍ତୁ-ଗ୍ରାହାମ୍ ଷ୍ଟେନ୍ସଙ୍କ ହତ୍ୟା ମାମଲା, ଆସନ୍ତା ୨୦ରେ ସୁପ୍ରିମକୋର୍ଟରେ ଦାରା ମାମଲାର ଶୁଣାଣି
