ଅବକାରୀ ନୀତି ମାମଲାରେ ୧୪ ଦିନ ବଢିଲା ସିସୋଦିଆଙ୍କ ନ୍ୟାୟିକ ହେପାଜତ ଅବଧି, ୧ ଜୁନ୍ ପର୍ଯ୍ୟନ୍ତ ତିହାରରେ ରହିବେ

ନୂଆଦିଲ୍ଲୀ,୨୩।୫: ଦିଲ୍ଲୀର ପୂର୍ବତନ ଉପ-ମୁଖ୍ୟମନ୍ତ୍ରୀଙ୍କ ଅଡୁଆ କମିବାର ନାହିଁ। ଦିଲ୍ଲୀ ଅବକାରୀ ନୀତି ମାମଲାରେ ଇଡି ଦ୍ବାରା ଗିରଫ ହୋଇଥିବା ମନୀଷ ସିସୋଦିଆଙ୍କ ନ୍ୟାୟିକ ହେପାଜତ ଆଜି ଶେଷ ହେଉଥିଲା, କିନ୍ତୁ କିନ୍ତୁ କୋର୍ଟରେ ହାଜର ହେବା ପରେ ତାଙ୍କ ନ୍ୟାୟିକ ହେପାଜତ ଅବଧି. ପୁଣି ଥରେ ବୃଦ୍ଧି କରାଯାଇଛି।  ଦିଲ୍ଲୀ ରାଉଜ ଏଭିନ୍ୟୁ କୋର୍ଟ ଆପ୍ ନେତା ଓ ଦିଲ୍ଲୀର ପୂର୍ବତନ ଉପମୁଖ୍ୟମନ୍ତ୍ରୀଙ୍କ ସିସୋଦିଆଙ୍କ ନ୍ୟାୟିକ ହେପାଜତକୁ ୧ ଜୁନ୍ ପର୍ଯ୍ୟନ୍ତ ବୃଦ୍ଧି କରିଛନ୍ତି। ଏହା ସହିତ ତିହାର ଜେଲ୍‌ ଅଧିକାରୀଙ୍କୁ ନିର୍ଦେଶ ଦିଆଯାଇଛି ସେ ପଢାପଢି ପାଇଁ ଚୌକି ଓ ଟେବଲ ଦିଆଯିବା ନେଇ ଯେଉଁ ଅନୁରୋଧ କରିଥିଲେ ତା ଉପରେ ବିଚାର କରାଯାଉ।

କୋର୍ଟ ଗତ ୩୧ ମାର୍ଚ୍ଚରେ ସିସୋଦିଆଙ୍କ ଜାମିନ୍ ଆବେଦନକୁ ଖାରଜ କରି କହିଥିଲେ, ସିସୋଦିଆ ଏହି ମାମଲାରେ ଅପରାଧିକ ଷଡଯନ୍ତ୍ରର ପ୍ରଥମ ସୁତ୍ରଧର ଥିଲେ ଓ ସେ ଦିଲ୍ଲୀ ସରକାରରେ ନିଜର ଓ ନିଜର ସହଯୋଗୀଙ୍କ ପାଇଁ ପ୍ରାୟ ୯୦-୧୦୦ କୋଟି ଟଙ୍କାର ଅଗ୍ରୀମ ଲାଞ୍ଚ ଦେବା ସମ୍ପର୍କିତ ଅପରାଧିକ ଷଡଯନ୍ତ୍ରରେ ‘ ସବୁଠାରୁ ଗୁରୁତ୍ବପୂର୍ଣ୍ଣ ଓ ପ୍ରମୁଖ ଭୂମିକା’ ଗ୍ରହଣ କରିଥିଲେ। ଉଲ୍ଲେଖନୀୟ ଯେ, ସିବିଆଇ କଥିତ ଅବକାରୀ ନୀତି ଦୁର୍ନୀତି ମାମଲାରେ ବହୁବାର ପଚରା ଉଚରା ପରେ ୨୬ ଫେବୃଆରୀରେ ଗିରଫ କରିଥିଲା। ସେ ଏବେ ନ୍ୟାୟିକ ହେପାଜତରେ ଅଛନ୍ତି।