ଦିଲ୍ଲୀରୁ ବାରାଣସୀ ୩,୫୨୦ ଟଙ୍କା
ନୂଆଦିଲ୍ଲୀ,୧୧ା୨(ଏଜେନ୍ସି): ବନ୍ଦେ ଭାରତ ଏକ୍ସପ୍ରେସ୍ ବା ଟ୍ରେନ୍ ୧୮ରେ ଦିଲ୍ଲୀରୁ ବାରାଣସୀ ଯାତ୍ରା ପାଇଁ ବାତାନୁକୂଳିତ (ଏସି) ଚେୟାର କାର୍ ଟିକେଟ୍ ମୂଲ୍ୟ ୧,୮୫୦ ଟଙ୍କା ପଡ଼ିବ । ସେହିଭଳି ଏକ୍ଜିକ୍ୟୁଟିଭ୍ ଶ୍ରେଣୀ ଟିକେଟ୍ ମୂଲ୍ୟ ୩,୫୨୦ ଟଙ୍କା ରହିବ । ଜଣେ ବରିଷ୍ଠ ରେଳ ଅଧିକାରୀ ଆଜି ଏହି ସୂଚନା ଦେଇଛନ୍ତି ।
ସେହିପରି ଟ୍ରେନ୍ ୧୮ରେ ବାରାଣସୀରୁ ଦିଲ୍ଲୀ ଫେରିବା ସମୟରେ ଏସି ଚେୟାର କାର୍ ଟିକେଟ୍ ମୂଲ୍ୟ ୧,୭୯୫ ଟଙ୍କା ଥିବା ବେଳେ ଏକ୍ଜିକ୍ୟୁଟିଭ୍ ଶ୍ରେଣୀ ଟିକେଟ୍ ମୂଲ୍ୟ ୩,୪୭୦ ଟଙ୍କା ରହିଛି ।
ରେଳ ଅଧିକାରୀଙ୍କ ସୂଚନା ମୁତାବକ, ଟ୍ରେନ୍ ୧୮ର ଚେୟାର କାର୍ ଭଡ଼ା ଦିଲ୍ଲୀ-ବାରାଣସୀ ଯାତ୍ରା କରୁଥିବା ଶତାବ୍ଦୀ ଟ୍ରେନ୍ର ଟିକେଟ୍ ମୂଲ୍ୟ ତୁଳନାରେ ପ୍ରାୟ ଦେଢ଼ ଗୁଣା । ସେହିଭଳି ଏକ୍ଜିକ୍ୟୁଟିଭ୍ ଶ୍ରେଣୀ ଟିକେଟ୍ ମୂଲ୍ୟ ଶତାବ୍ଦୀର ପ୍ରଥମ ଶ୍ରେଣୀ ଏସି ଭଡ଼ା ତୁଳନାରେ ପ୍ରାୟ ୧.୪ ଗୁଣା ।
ସୂଚନା ଥାଉକି, ଫେବ୍ରୁଆରୀ ୧୫ରେ ଭାରତୀୟ ଜ୍ଞାନକୌଶଳରେ ନିର୍ମିତ ଏହି ସେମି-ହାଇସ୍ପିଡ୍ ଟ୍ରେନ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁଭାରମ୍ଭ କରିବେ । ଏହି ଟ୍ରେନ୍ରେ ଚେୟାର କାର୍ ଓ ଏକ୍ଜିକ୍ୟୁଟିଭ୍ ଭଳି ୨ଟି ଶ୍ରେଣୀର ଟିକେଟ୍ ଉପଲବ୍ଧ । ଏହି ଟ୍ରେନ୍ର ଚେୟାର କାର୍ରେ ନୂଆଦିଲ୍ଲୀରୁ ବାରାଣସୀ ଯାତ୍ରା କରୁଥିବା ରେଳଯାତ୍ରୀଙ୍କୁ ସକାଳ ଚା’, ଜଳଖିଆ ଓ ମଧ୍ୟାହ୍ନ ଭୋଜନ ପାଇଁ ୩୯୯ ଟଙ୍କା ଦେବାକୁ ପଡ଼ିବ । ଏକ୍ଜିକ୍ୟୁଟିଭ୍ ଶ୍ରେଣୀ ପାଇଁ ଏହି ଖାଦ୍ୟପେୟ ପାଇଁ ୩୪୪ ଟଙ୍କା ଗଣିବାକୁ ହେବ ।
