PRAMEYA

Prameya News Portal, Prameya Daily, Odisha Latest News, Odisha Current Headlines, Odisha News Online

ପ୍ରମୁଖ ଖବର
  • କେନ୍ଦୁଝର ସଦର : ମଦ୍ୟପଙ୍କ ଉନ୍ମୁକ୍ତ କାଣ୍ଡ, ବାପାକୁ ପିଟିପିଟି ହତ୍ୟା କଲା ପୁଅ
  • ||
  • ଭୁବନେଶ୍ଵର : ଅକ୍ଟୋବର ୨ରୁ ଏକ ମାସ ବ୍ୟାପି ପଦଯାତ୍ରା କରିବ ବିଜେଡି, ୨୯ ଏବଂ ୩୦ ତାରିଖରେ ବସିବ ପ୍ରସ୍ତୁତି ବୈଠକ
  • ||
  • ବାରିପଦା : ବ୍ୟାଙ୍କ୍‌ରେ ଭୟାବହ ଅଗ୍ନିକାଣ୍ଡ, ଜଳିଗଲା ଏଟିଏମ୍
  • ||
  • ଭୁବନେଶ୍ଵର : ରାଜଧାନୀରେ ଚାଞ୍ଚଲ୍ୟ, ବାର୍‌ରେ ୩ଟି ବୋମାମାଡ଼ କଲେ ୨ ଦୁର୍ବୃତ୍ତ
  • ||

ପ୍ରତ୍ନତତ୍ତ୍ୱ ବିଭାଗ ଖାମଖିଆଲ୍‌, ସ୍ୱରାଜ ଆଶ୍ରମ ଅବହେଳିତ

କଟକ,୧୫/୮ : ଦିନେ ଓଡ଼ିଶା ସ୍ୱାଧୀନତା ସଂଗ୍ରାମର ଥିଲା ଅନ୍ତୁଡ଼ିଶାଳ । ଯେଉଁ ଆଶ୍ରମ ଦିନେ ସମସ୍ତଙ୍କୁ ଆଶ୍ରୟ ଦେଉଥିଲା ଆଜି ସେହି ଆଶ୍ରମ ଅବହେଳିତ ହୋଇପଡ଼ିଛି । ସମଗ୍ର ଦେଶ ଏବେ ସ୍ୱାଧୀନତାର ଅମୃତ ମହୋତ୍ସବ ପାଳନ କରୁଥିବାବେଳେ ଦୟନୀୟ ସ୍ଥିତି ଦେଇ ଗତି କରୁଛି କଟକସ୍ଥିତ ସ୍ୱରାଜ ଆଶ୍ରମ ।  ସ୍ୱରାଜ ଆଶ୍ରମକୁ ଜାତିର ପିତା ମହାତ୍ମା ଗାନ୍ଧି ୧୯୨୧ ମସିହା ମାର୍ଚ୍ଚ ୨୩ ତାରିଖରେ ଆସିଥିଲେ ।

ଏଠାରେ ମଧ୍ୟ ବିଭିନ୍ନ ସମୟରେ କଂଗ୍ରେସର ବୈଠକ ବସୁଥିଲା । ଉତ୍କଳ କେଶରୀ ହରେକୃଷ୍ଣ ମହତାବଙ୍କର ଏହାଥିଲା କର୍ମସ୍ଥଳୀ । ୧୯୮୬ ମସିହାରେ ଏହି ଆଶ୍ରମକୁ ରାଜ୍ୟ ସରକାର ପ୍ରତ୍ନତତ୍ତ୍ୱ ବିଭାଗ ହାତକୁ ଟେକି ଦେଇଥିଲେ । ତାହା ପୂର୍ବରୁ ଏହି ଆଶ୍ରମରେ ୪୦/୫୦ ଜଣ ପିଲା ସୂତା କାଟି ଜୀବିକା ଅର୍ଜନ କରୁଥିଲେ । ମହତାବଙ୍କ ଉଦ୍ୟମକ୍ରମେ ସେମାନଙ୍କୁ ଷ୍ଟାଇପେଣ୍ଡ ଦିଆଯିବାର ବ୍ୟବସ୍ଥା କରାଯାଇଥିଲା । ଖଦୀର ଏକ ଦୋକାନ ମଧ୍ୟ ଚାଲୁଥିଲା । ଶିମିଳିପାଳର ବନ୍ୟଜାତ ସାମଗ୍ରୀ ଏଠାରେ ବିକ୍ରି କରାଯାଉଥିଲା । ଏଠାରେ ଏକ ତନ୍ତରେ ଲୁଗାବୁଣା ଶିଖା ଯାଉଥିଲା ।

କିନ୍ତୁ ପ୍ରତ୍ନତତ୍ତ୍ୱ ବିଭାଗ ହାତକୁ ନେବା ପରେ ଏ ସବୁ ବନ୍ଦ । ଏହି ଆଶ୍ରମକୁ ସ୍ୱାଧୀନତା ସଂଗ୍ରାମୀଙ୍କ ସଂଗ୍ରହାଳୟ କରାଯିବାକୁ ଘୋଷଣା କରାଯାଇଥିଲା । କିନ୍ତୁ ଏଠାରେ ଏବେ ମହାତ୍ମାଗାନ୍ଧିଙ୍କ ଓଡ଼ିଶା ଗସ୍ତର କେବଳ କିଛି ଫଟୋ ରହିଛି । ଉତ୍କଳ କେଶରୀ ବସୁଥିବା ଘରକୁ ମହତାବ କୁଟୀର ଘୋଷଣା କରାଯାଇଛି । କିନ୍ତୁ ଏହି କୁଟୀର ଛାତରେ ପଡ଼ିଥିବା ଟାଇଲ୍‌ ମଧ୍ୟରୁ ଏବେ ଅଧାରୁ ଅଧିକ ଗଳି ପଡ଼ିଲାଣି । ଏତେ ବଡ଼ ଆଶ୍ରମର ସଫେଇ ଲାଗି ପ୍ରତ୍ନତତ୍ତ୍ୱ ବିଭାଗ ପକ୍ଷରୁ ଝାଡ଼ୁଟିଏ କିଣିବା ଲାଗି ଟଙ୍କାଟିଏ ଦିଆଯାଉ ନାହିଁ । ଏହି ଆଶ୍ରମର ବିଦ୍ୟୁତ୍‌ ନିକଟରେ ଥିବା ପାଠାଗାର ପାଇଁ ଦିଆଯାଇଥିବା ବିଦ୍ୟୁତ ସଂଯୋଗ ଯୋଗୁଁ ଚାଲୁଛି ଯାହା ସଂସ୍କୃତି ବିଭାଗ ପକ୍ଷରୁ ଦିଆଯାଉଛି । ଆଶ୍ରମର ପାଇଖାନା ସଫେଇ ପାଇଁ ମଧ୍ୟ ସହାୟତା ନାହିଁ । ଆଶ୍ରମର ପରିଚାଳନା ପାଇଁ ଗୋଟେ କଣ୍ଟିଜେନ୍ସି ଫଣ୍ଡ ମଧ୍ୟ ନାହିଁ । ତେବେ ଏ ସଂକ୍ରାନ୍ତରେ ପ୍ରତ୍ନତତ୍ତ୍ୱ ଅଧୀକ୍ଷକ ଅଶ୍ୱିନୀ ଶତପଥୀଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ସେ ଫୋନ୍‌ ଉଠାଇନଥିଲେ ।