ପ୍ରେମିକା ମୁହଁମୋଡି ଦେବାରୁ ଡିପ୍ରେସନରେ ଥିଲେ ଡାକ୍ତର ବାବୁ, ଗାଡି ଭିତରେ ରହି ମର୍ସିଡିଜ୍ କାରରେ ଲଗାଇଦେଲେ ନିଆଁ…
ନୂଆଦିଲ୍ଲୀ: ପ୍ରେମିକା ମୁହଁମୋଡି ଦେବାରୁ ଚିନ୍ତାରେ ଥିଲେ ଯୁବ ଡାକ୍ତର । ପ୍ରେମିକାର ପ୍ରତାରଣାକୁ ସହଜରେ ଗ୍ରହଣ କରିପାରୁନଥିଲେ ଡାକ୍ତର ବାବୁ । ପ୍ରତିଟି ମିନିଟ୍ ତାଙ୍କ ପାଇଁ ସମୟ କାଟିବା ହେଉଥିଲା ଅତ୍ୟନ୍ତ କଷ୍ଟକର । ଉଦାସିନତାରୁ ମୁକ୍ତି ପାଇବା ପାଇଁ ଚିକିତ୍ସା ମଧ୍ୟ ହେଉଥିଲେ । ହେଲେ ଏଥିରୁ କୌଣସି ଉପସମ ତାଙ୍କୁ ମିଳୁନଥିଲା । ଆଉ ଏହାରି ଭିତରେ ମୃତ୍ୟୁର ବାଟକୁ ଚାହିଁ ବସୁଥିଲେ । ଗୁରୁବାର ଦିନ ତାମିଲନାଡୁର କାଞ୍ଚିପୁରାମ ଜିଲ୍ଲାର ଜଣେ ୨୯ ବର୍ଷୀୟ ଡାକ୍ତର ତାଙ୍କର ବିଫଳ ସମ୍ପର୍କକୁ ସହି ନପାରି ଆତ୍ମହତ୍ୟା ଉଦ୍ୟମ କରିଛନ୍ତି । ସେ ତାଙ୍କ ମର୍ସିଡିଜ୍ କାର ଭିତରେ ବସି ନିଆଁ ଲଗାଇ ଦେଇଥିବା ଅଭିଯୋଗ ହୋଇଛି ।
ସୂଚନା ମୁତାବକ ଅନୁସନ୍ଧାନକାରୀ କହିଛନ୍ତି ଯେ କିଛି ବର୍ଷ ପୂର୍ବେ କାଞ୍ଚିପୁରାମର ଏକ ଘରୋଇ ମେଡିକାଲ କଲେଜର ଡାକ୍ତରୀ ଛାତ୍ର ତାଙ୍କ ପ୍ରେମିକାଙ୍କ ସହ ସମ୍ପର୍କ ଶେଷ ହେବା ପରଠାରୁ ଚାପଗ୍ରସ୍ତ ଅବସ୍ତାରେ ରହୁଥିଲେ । ଯଦିଓ ଡାକ୍ତର ତାଙ୍କ ଅବସାଦକୁ ହାଲ୍କା କରିବା ପାଇଁ ନିଜକୁ ଚିକିତ୍ସା କରାଉଥିଲେ, ହେଲେ ଏଥୁରୁ ତାଙ୍କୁ କୌଣସି ଆଶ୍ବସ୍ତି ମିଳୁନଥିଲା ।
ଜଣେ ବରିଷ୍ଠ ପୋଲିସ ଅଧିକାରୀ ଏକ ଜାତୀୟ ଗଣମାଧ୍ୟମକୁ କହିଛନ୍ତି ଯେ ପୋଲିସ ସନ୍ଦେହ କରୁଛି ଯେ ଡାକ୍ତର ଗାଡିରେ ନିଆଁ ଲଗାଇବା ପରେ ଭିତରେ ବସି ଆତ୍ମହତ୍ୟା କରିବାକୁ ଚେଷ୍ଟା କରୁଥିଲେ । ସେ ଏଥିପାଇଁ ଏକ ପୋଖରୀ ନିକଟରେ ଥିବା ସ୍ଥାନକୁ ବାଛିଥିଲେ, ଯେଉଁଠାରେ ସେ ତାଙ୍କ ପ୍ରେମିକାଙ୍କ ସହ ସମୟ ବିତାଉଥିଲେ । ସେ ଜଳୁଥିବା କାରରୁ କିଛି ସମୟ ବାହାରକୁ ଆସି ନଥିଲେ । ହେଲେ ଅଣନିଶ୍ବାସୀ ହେବାରୁ ବାହାରକୁ ଚାଲି ଆସିଥିଲେ । ଚାହୁଁ ଚାହୁଁ ଗାଡିଟି ସମ୍ପୂର୍ଣ୍ଣ ପୋଡି ପାଉଁଶ ହୋଇଯାଇଥିଲା । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଡାକ୍ତରବାବୁଙ୍କୁ ଉଦ୍ଧାର କରିଛି ।
