ଏଣିକି ସାକ୍ଷୀଗୋପାଳ ରେଳ ଷ୍ଟେସନରେ ଅଟକିବ ଧଉଳି ଏକ୍ସପ୍ରେସ୍, ଦାବି ପୂରଣ କଲେ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ
ପୁରୀ,୨୫/୦୫: ଏଣିକି ସାକ୍ଷୀଗୋପାଳ ରେଳ ଷ୍ଟେସନରେ ଅଟକିବ ଗାଡ଼ି ସଂଖ୍ୟା ୧୨୮୨୧/୨୨ ପୁରୀ-ଶାଲିମାର ଧଉଳି ଏକ୍ସପ୍ରେସ୍ । ଗାଡ଼ି ସଂଖ୍ୟା-୧୨୮୪୩/୪୪ ପୁରୀ- ଅହମ୍ମଦାବାଦ ଏକ୍ସପ୍ରେସ ମଧ୍ୟ ସାକ୍ଷୀଗୋପାଳ ଷ୍ଟେସନରେ ଅଟକିବ । ବିଜେପି ରାଷ୍ଟ୍ରୀୟ ମୁଖପାତ୍ର ସମ୍ବିତ ପାତ୍ରଙ୍କର ଏହି ଦାବିକୁ ସ୍ୱୀକାର କରିଛନ୍ତି ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ । ଏହି ଟ୍ରେନ ଅଟକିବା ଦ୍ୱାରା ସତ୍ୟବାଦୀ ଅଞ୍ଚଳର ହଜାର ହଜାର ଲୋକ ଉପକୃତ ହେବେ ।
କାଳୁପଡ଼ାଘାଟଠାରେ ଗାଡି ସଂଖ୍ୟା – ୧୮୧୧୭/୧୮ ରାଉରକେଲା-ଗୁଣପୁର ରାଜ୍ୟରାଣୀ ଏକ୍ସପ୍ରେସ ରହଣିକୁ ମଧ୍ୟ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ସ୍ୱୀକୃତି ଦେଇଛନ୍ତି । ଏହା ଦ୍ୱାରା ଚିଲିକା ଅଞ୍ଚଳବାସୀଙ୍କର ଦୈନନ୍ଦିନ ଜୀବନରେ ସୁଧାର ଆସିବା ସହିତ ଲୋକମାନଙ୍କର ଗମନାଗମନ ସୁବିଧାଜନକ ହେବ । ରେଳ ମନ୍ତ୍ରୀ ଏହି ଦାବି ଗ୍ରହଣ କରିଥିବାରୁ ଶ୍ରୀ ପାତ୍ର ଧନ୍ୟବାଦ ଜଣାଇଛନ୍ତି । ସୂଚନାଥାଉକି, ଗତ ଜାନୁଆରୀ ୧୦ ତାରିଖରେ ଏବଂ ମାର୍ଚ୍ଚ ୩୧ ତାରିଖରେ ଶ୍ରୀ ପାତ୍ର ରେଳମନ୍ତ୍ରୀଙ୍କୁ ଭେଟି ଏହି ଦାବି ଜଣାଇଥିଲେ ।
