କର୍ଲାମୁଣ୍ଡା,୨୬/୮ : କଳାହାଣ୍ଡି ଜିଲ୍ଲା କର୍ଲାମୁଣ୍ଡା ବ୍ଲକରେ ବେଆଇନ ଦେଶୀ ମଦ କୋଠିକୁ ବିରୋଧ। ଏହାକୁ ପ୍ରତିବାଦ କରି ଧାରଣାରେ ବସିଲେ ଜିଲ୍ଲା ପରିଷଦ ସଭ୍ୟ। ଜିଲ୍ଲା ପରିଷଦ ସଭ୍ୟ ସୁରେଶ ଚୌଧୁରୀଙ୍କ ଅଭିଯୋଗ ମୁତାବକ, ଓଡ଼ିଆମୁଣ୍ଡା ଭାଟିରୁ ଗାଁ ଗାଁକୁ ମଦ ଯୋଗାଯାଉଛି । ଗାଁ ରେ ବେଆଇନ ଭାବେ କୋଠି ଖୋଲି ମଦ ବିକ୍ରି ହେଉଛି । ଗରିବ,ଦିନ ମଜୁରିଆମାନେ ମଦ ପିଇ ସର୍ବସ୍ୱାନ୍ତ ହେଉଛନ୍ତି ଏବଂ ପରିବାରରେ କଳିଝଗଡା ଲାଗିରହୁଛି । କଲେଜ ଛାତ୍ରଛାତ୍ରୀମାନେ ଅସୁରକ୍ଷିତ ଭାବେ ଯାତାୟାତ କରୁଛନ୍ତି । ତେଣୁ ଏହି ବେଆଇନ ମଦକୋଠି ବନ୍ଦ କରିବାକୁ ସେ ଦାବି କରିଛନ୍ତି ।
ସେ ଆହୁରି ମଧ୍ୟ କହିଛନ୍ତି ଯେ, ଅପମିଶ୍ରିତ ମଦ ବିକ୍ରି ହେଉଥିବାରୁ ଚିନି ଓ ୟୁରିଆ ସାର ମିଶ୍ରଣର ତଦନ୍ତ କରାଯାଉ । ସେହିପରି ନୁଆଁଖାଇ ପୂର୍ବରୁ ସମସ୍ତ ମଦକୋଠି ଉପରେ ଚଢ଼ାଉ କରାଯାଇ ଭାଟି ମାଲିକଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ଦାବି କରି ଆଜି ସେ ଧାରଣାରେ ବସିଥିବା ବେଳେ ଅନେକ ବ୍ୟକ୍ତି ତାଙ୍କୁ ସମର୍ଥନ ଜଣାଇ ଧାରଣାରେ ବସିଥିବା ଦେଖିବାକୁ ମିଳିଛି।
