ବେଡ଼ସିଟ ଲଗାଇ ଝୁଲି ପଡ଼ିଲେ DJ ଆଜେକ୍ସ, ଆତ୍ମହତ୍ୟା ପଛରେ ତ୍ରୀକୋଣୀୟ ପ୍ରେମକୁ ନେଇ ସନ୍ଦେହ

ଭୁବନେଶ୍ୱର ୧୯/୩: ବହୁ ଚର୍ଚ୍ଚିତ ଓଡ଼ିଆ ଡ଼ିଜେ ଆଜେକ୍ସଙ୍କ ଆତ୍ମହତ୍ୟା। ଏକ କାର୍ଯ୍ୟକ୍ରମରେ ଯୋଗ ଦେବା ପୂର୍ବରୁ ଯୁବ ଡିଜେ ଆଜେକ୍ସଙ୍କ ଆତ୍ମହତ୍ୟା କରିଥିବା ସୂଚନା ମିଳିଛି। ଘଟଣାସ୍ଥଳରେ ପୋଲିସ ପହଞ୍ଚି ମୃତଦେହ ଜବତ କରିବା ସହ ତଦନ୍ତ ଆରମ୍ଭ କରିଛି।

ସୂଚନା ମୁତାବିକ, ଶନିବାର ରାତିରେ ଖାରବେଳ ନଗର ଘରେ ବେଡ଼ସିଟରେ ଝୁଲି ଆତ୍ମହତ୍ୟା କରିଛନ୍ତି ଅକ୍ଷୟ କୁମାର ଓରଫ ‘ଡିଜେ ଆଜେକ୍ସ’। ଗତକାଲି ସନ୍ଧ୍ୟାରେ ଶେଷଥର ପାଇଁ ଘରେ କଥା ହୋଇଥିଲେ। ଆଜେକ୍ସଙ୍କ ମୃତ୍ୟୁର କାରଣ ଅସ୍ପଷ୍ଟ ରହିଛି। ତେବେ ମୃତ୍ୟୁ ପଛରେ ଜଣେ ଯୁବତୀଙ୍କୁ ସଂପୃକ୍ତି ଥିବା ସୂଚନା ମିଳିଛି। ତ୍ରୀକୋଣୀୟ ପ୍ରେମକୁ ନେଇ ଆତ୍ମହତ୍ୟା କରିଥିବା ସନ୍ଦେହ କରାଯାଉଛି। ଅନ୍ୟପଟେ ବ୍ଲାକମେଲିଂଙ୍କ ଯୋଗୁ ଆଜେକ୍ସ ଆତ୍ମହତ୍ୟା କରିଥିବା ଥାନାରେ ଅଭିଯୋଗ ହୋଇଛି। ପରିବାର ଲୋକ ଆଜେକ୍ସଙ୍କ ମୋବାଇଲ ଓ ଅନ୍ୟ ସାମଗ୍ରୀ ପୋଲିସକୁ ହସ୍ତାନ୍ତର କରିଛନ୍ତି। ଯାହାକୁ ନେଇ ପୋଲିସ ଛାନଭିନ୍ନ ଆରମ୍ଭ କରିଛି। ତାଙ୍କ ମୃତଦେହକୁ ବ୍ୟବଚ୍ଛେଦ ପାଇଁ କ୍ୟାପିଟାଲ ହସ୍ପିଟାଲକୁ ପଠାଯାଇଛି।

ସେପଟେ ଆଜେକ୍ସଙ୍କ ଜଣେ ସଂପର୍କୀୟ ଆଣିଛନ୍ତି ସାଂଘାତିକ ଅଭିଯୋଗ । ତ୍ରୀକୋଣୀୟ ପ୍ରେମ ପାଇଁ ଯାଇଛି ଡିଜେ ଆଜେକ୍ସଙ୍କ ଜୀବନ । ଏକ ଘରୋଇ ମେଡ଼ିକାଲ କଲେଜର ଛାତ୍ରୀଙ୍କୁ ଡିଜେ ଆଜେକ୍ସ ପ୍ରେମ କରିଥିଲେ। କିନ୍ତୁ ସମ୍ପୃକ୍ତ ଯୁବତୀ ତାଙ୍କୁ ବାରମ୍ବାର ବ୍ଲାକମେଲିଂ କରୁଥିଲେ। ସେ କିଛି ଦିନ ହେଲା ମାନସିକ ଚାପରେ ଥିଲେ । ତେଣୁ ସେ ଚାପରେ ଆତ୍ମହତ୍ୟା କରିଥିବା ଅଭିଯୋଗ ହୋଇଛି।