ଭୋପାଳ,୨/୦୩ : ସେମାନେ ପଶୁ ହେଲେ ବି ବିଶ୍ବସ୍ତ । ମାଲିକର ସୁରକ୍ଷା ପାଇଁ ଜୀବନ ଦେବାକୁ ପଛାନ୍ତି ନାହିଁ । କୁକୁର-ମଣିଷ ବନ୍ଧୁତାର ଅନେକ କାହାଣୀ ରହିଛି । ସେମିତି କିଛି ଘଟଣା ଘଟିଛି ଯେଉଁଥିରେ ଏକ କୁକୁରର ବିଶ୍ବସ୍ତତା ଦେଖିବାକୁ ମିଳିଛି । ଏକ କୁକୁର ବାଘ ସହ ଅଧଘଣ୍ଚା କାଳ ଲଢି ମାଲିକର ଜୀବନ ବଞ୍ଚାଇଛି । କୁକୁର କେତେ ଯେ ବିଶ୍ବସ୍ତ ହୋଇପାରେ ତାର ଉଦାହରଣ ହେବ ଏହି ଘଟଣା । ମଧ୍ୟପ୍ରଦେଶ ବାଧବଗଡ ଅଭୟାରଣ୍ୟରେ ବାଘ ସହ ଲଢେଇ କରି ମାଲିକ ଶିବମ ବାରଗେୟାଙ୍କ ଜୀବନ ବଞ୍ଚାଇଛି ତାଙ୍କ ପୋଷା କୁକୁର । ଜୀବନର ଶେଷ ଯାଏ ବାଘ ସହ ଲଢି ତାର ବିଶ୍ବସ୍ତର ପ୍ରମାଣ ଦେଇଥିଲା ବେନ୍ଥୋ ।
ବାଘ ସହ ଲଢିଲା-ମାଲିକ ଜୀବନ ବଞ୍ଚାଇଲା- ମଧ୍ୟପ୍ରଦେଶ ଉମରିଆ ଜିଲ୍ଲା ବାଧବଗଡ ବାଘ ଅଭୟାରଣ୍ୟରେ ଏକ କୁକୁର ବାଘ ସହ ଲଢେଇ କରି ତାର ମାଲିକ ଜୀବନ ବଞ୍ଚାଇଛି । ଅଭୟାରଣ୍ୟରୁ ଭାରହୁଟ ଗାଁକୁ ହଠାତ୍ ପଶି ଆସିଥିଲା ଏକ ବାଘ । ସ୍ଥାନୀୟ ବାସିନ୍ଦା ଶିବମ ବାରଗେୟାଙ୍କ ଘର ପାଖରେ ବାଘ ବୁଲୁଥିଲା । ଅଚାନକ ବାଘ ଶିବମଙ୍କ ଆଡକୁ ମାଡି ଆସିଥିଲା । ମାଲିକକୁ କିଛି କ୍ଷତି ପହଞ୍ଚାଇବା ପୂର୍ବରୁ ତାଙ୍କ ପୋଷା ଜର୍ମାନ ସେଫର୍ଡ କୁକୁର ବେନ୍ଥୋ ଭୋକିବା ସହ ବାଘ ଉପରକୁ ଆକ୍ରମଣ କରିଥିଲା । ବାଘ ସହ ଲଢେଇ କରିଥିଲା କୁକୁର । ଦୀର୍ଘ ଅଧଘଣ୍ଟା କୁକୁର-ବାଘ ଲଢେଇ ଚାଲିଥିଲା । ବାଘକୁ ଘାଇଲା କରି ଦେଇଥିଲା ବେନ୍ଥୋ । ଶେଷରେ ହାର ମାନି ଜଙ୍ଗଲକୁ ପଳାଇଥିଲା ବାଘ ।
ମାଲିକ ପାଇଁ ଲଢି ଆଖି ବୁଜିଲା- ମାଲିକ ପାଇଁ ବାଘ ସହ ଲଢି ଜୀବନ ଦେଇଦେଲା ବିଶ୍ବସ୍ତ ବେନ୍ଥୋ । ଦୀର୍ଘ ସମୟ ଧରି ବଳୁଆ ବାଘ ସହ ଲଢିଥିଲା । ଲହୁ ଲୁହାଣ ହୋଇଥିଲା । ହେଲେ ମାଲିକ ଦେହରେ ଟିକେ ଆଞ୍ଚ ଆସିବାକୁ ଦେଇନଥିଲା । ସଂଙ୍କଟାପନ୍ନ ଅବସ୍ଥାରେ କୁକୁରକୁ ପଶୁ ଡାକ୍ତରଖାନା ନେଇଥିଲେ । ଗୁରୁୁତର କ୍ଷତ ଲାଗି ଥିବାରୁ ତାର ମୃତ୍ୟୁ ହୋଇଥିଲା । ମାଲିକ ଜୀବନ ବଞ୍ଚାଇବାକୁ ବାଘ ସହ ଲଢି ଶେଷରେ ଆଖି ବୁଜିଥିଲା କୁକୁର । ଏହା ପରେ ସମ୍ପୂର୍ଣ୍ଣ ଭାଙ୍ଗି ପଡିଛନ୍ତି ଶିବମ ବାରଗେୟା । ସେ କହିଛନ୍ତି, ମୋ କୁକୁର ପାଇଁ ମୁଁ ଜୀବନ ଫେରି ପାଇଛି । ଗାଁ ଲୋକ ବେନ୍ଥୋର ବିଶ୍ବସ୍ତତାକୁ ପ୍ରଶଂସା କରିଛନ୍ତି । କରିବେ ନାହିଁ ବା କେମିତି । ଏହି ଘଟଣାରୁ ପ୍ରମାଣିତ ହେଉଛି ଯେ କୁକୁର ସର୍ବଦା ମଣିଷର ବିଶ୍ବସ୍ତ ସାଥୀ ହୋଇଥାଏ । ଏହି ଘଟଣା ତାର ନିଚ୍ଛକ ଉଦାହରଣ ।
