ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ରୁଷରୁ ତେଲ କିଣିବାକୁ ନେଇ ଭାରତ ଉପରେ୨୫% ଅତିରିକ୍ତ ଶୁଳ୍କ ଲାଗୁ କରିଛନ୍ତି। ତଥାପି, ଭାରତ ତା'ର ଆବଶ୍ୟକତା ଅନୁଯାୟୀ ରୁଷରୁ ତେଲ କ୍ରୟ କରିଚାଲିଛି। ଏହି ସମୟରେ, ରୁଷ ଏକ ବଡ଼ ନିଷ୍ପତ୍ତି ନେଇଛି ଏବଂ ଭାରତକୁ ତେଲ କ୍ରୟ ଉପରେ ୫% ରିହାତି ଦେବାକୁ ନିଷ୍ପତ୍ତି ନେଇଛି।
ଭାରତରେ ରୁଷର ଉପ ବାଣିଜ୍ୟ ପ୍ରତିନିଧି, ଏଭଗେନୀ ଗ୍ରୀଭା କହିଛନ୍ତି ଯେ, "ଭାରତକୁ ରୁଷ ପକ୍ଷରୁ ଅଶୋଧିତ ତୈଳ କ୍ରୟ ଉପରେ ୫% ରିହାତି ମିଳିବ, ଯାହା ଆଲୋଚନା ଆଧାରରେ ନିଷ୍ପତ୍ତି ନିଆଯିବ। ଗ୍ରୀଭା ଆହୁରି କହିଛନ୍ତି ଯେ "ରାଜନୈତିକ ପରିସ୍ଥିତି ସତ୍ତ୍ୱେ, ଭାରତ ପ୍ରାୟ ଆବଶ୍ୟକ ସ୍ତରରେ ତେଲ ଆମଦାନୀ ଜାରି ରଖିବ।" ସେ ଏହା ମଧ୍ୟ କହିଛନ୍ତି ଯେ, ଏହି ରିହାତି ଭାରତ ପାଇଁ ଏକ ବାଣିଜ୍ୟିକ ଗୁପ୍ତ ଆଧାର । ସାଧାରଣତଃ ଏହା ବ୍ୟବସାୟୀ ମାନଙ୍କ ମଧ୍ୟରେ ଆଲୋଚନା ଉପରେ ଆଧାରିତ ହୋଇଥାଏ ଏବଂ ଏହା ପ୍ରାୟ ୫% ପାଖାପାଖି ରହିଥାଏ ।"
ଗ୍ରୀଭାଙ୍କ ସହିତ ଋଷର ଡେପୁଟି ଚିଫ୍ ଅଫ ମିଶନ ରୋମାନ ବାବୁଶକିନ୍ ମଧ୍ୟ ଏକ ବିବୃତ୍ତି ଦେଇଛନ୍ତି । ସେ କହିଛନ୍ତି ଯେ, ପରିସ୍ଥିତି ଚ୍ୟାଲେଞ୍ଜିଂ, କିନ୍ତୁ "ଆମ ସମ୍ପର୍କରେ ବିଶ୍ୱାସ ଅଛି। "ଆମେ ନିଶ୍ଚିତ ଯେ ବାହ୍ୟ ଚାପ ସତ୍ତ୍ୱେ ଭାରତ-ରୁଷ ଶକ୍ତି ସହଯୋଗ ଜାରି ରହିବ।"
ସୂଚନାଥାଉକି, ଆମେରିକା ଭାରତ ଉପରେ ରୁଷରୁ ତେଲ କିଣି ୟୁକ୍ରେନ ଯୁଦ୍ଧକୁ ପାଣ୍ଠି ଯୋଗାଇବାର ଅଭିଯୋଗ କରିଛି। ଆମେରିକା ରୁଷରୁ ତେଲ କିଣିବାକୁ ବିରୋଧ କରି ଭାରତ ଉପରେ ୫୦ % ଶୁଳ୍କ ଲାଗୁ କରିଛି।
ସେପଟେ ଡୋନାଲ୍ଡ ଟ୍ରମ୍ପ ରୁଷକୁ ଧମକ ଦେଇ କହିଥିଲେ ଯେ, ଯଦି ୟୁକ୍ରେନ ଯୁଦ୍ଧ ସମାପ୍ତ କରିବା ପାଇଁ କୌଣସି ପଦକ୍ଷେପ ନିଆ ନ ଯାଏ, ତେବେ ସେ ମସ୍କୋ ଉପରେ ମଧ୍ୟ କଟକଣା ଲାଗୁ କରିବେ। ସେ କହିଥିଲେ ଯେ ଏହାର ତେଲ କିଣୁଥିବା ଦେଶ ଗୁଡ଼ିକ ଉପରେ ମଧ୍ୟ କଟକଣା ଲାଗୁ କରାଯିବ। ଆପଣଙ୍କୁ ଜଣାଇ ଦେଉଛୁ ଯେ, ରୁଷୀୟ ତେଲର ଚୀନ୍ ଏବଂ ଭାରତ ସବୁଠାରୁ ବଡ଼ କ୍ରେତା ।
