ମନି ଲଣ୍ଡରିଂ ମାମଲା: ରବର୍ଟ ଭଦ୍ରାଙ୍କୁ ୪ ଘଣ୍ଟା ଜେରା

ନୂଆଦିଲ୍ଲୀ,୬ ।୨(ଏଜେନ୍ସି): ମନି ଲଣ୍ଡରିଂ ସହ ଜଡ଼ିତ ଏକ ମାମଲାରେ ଜେରା ପାଇଁ ୟୁପିଏ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ଜ୍ୱାଇଁ ରବର୍ଟ ଭଦ୍ରା ବୁଧବାର ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ସମ୍ମୁଖରେ ହାଜର ହୋଇଛନ୍ତି । ତାଙ୍କୁ ଦୀର୍ଘ ୪ ଘଣ୍ଟା ଧରି ଜେରା କରାଯାଇଥିଲା । ତେବେ ଲଣ୍ଡନରେ ସଂପତ୍ତି କିଣିବା ଓ ଅସ୍ତ୍ର ବ୍ୟବସାୟୀ ସଂଜୟ ଭଣ୍ଡାରୀଙ୍କ ସହ ସଂପର୍କକୁ ସେ ଅସ୍ୱୀକାର କରିଛନ୍ତି । ରିପୋର୍ଟ ଅନୁସାରେ ଭଦ୍ରା ଆଜି ୩.୪୭ ମିନିଟ୍‌ରେ ଇଡିର କାର୍ଯ୍ୟାଳୟରେ ପହଞ୍ଚିଥିଲେ । ପତ୍ନୀ ପ୍ରିୟଙ୍କା ଗାନ୍ଧୀ ତାଙ୍କ ସହିତ ଆସିଥିଲେ ମଧ୍ୟ ଗେଟ୍‌ରୁ ଫେରି ଯାଇଥିଲେ । ସନ୍ଦିଗ୍ଧ ଆର୍ଥିକ ଅନିୟମିତତା ମାମଲାରେ ଭଦ୍ରା କୌଣସି ତଦନ୍ତକାରୀ ସଂସ୍ଥା ନିକଟରେ ହାଜର ହେବାର ଏହା ପ୍ରଥମ ଘଟଣା । ଶନିବାର ଦିଲ୍ଲୀର ଏକ କୋର୍ଟ ଏହି ମାମଲାରେ ଭଦ୍ରାଙ୍କୁ ଅନ୍ତରୀଣ ଜାମିନ ଦେଇଥିଲେ । କୋର୍ଟ ତାଙ୍କୁ ଫେବ୍ରୃୟାରୀ ୧୬ ତାରିଖ ଯାଏ ଗିରଫଦାରିରୁ ଆଶ୍ୱସ୍ତି ପ୍ରଦାନ କରିଥିଲେ । ସେହିପରି ଇଡିର ତଦନ୍ତରେ ସହଯୋଗ କରିବାକୁ ତାଙ୍କୁ ନିର୍ଦ୍ଦେଶ ମିଳିଥିଲା ।
ସୂଚନାଥାଉକି,ଲଣ୍ଡନର ବ୍ରାୟନ୍‌ଷ୍ଟନ୍‌ ସ୍କେୟାରରେ ୧୯ ଲକ୍ଷ ପାଉଣ୍ଡ (ପ୍ରାୟ ୧୭ କୋଟି ଟଙ୍କା) ମୂଲ୍ୟର ଏକ ସଂପତ୍ତି କ୍ରୟକୁ ନେଇ ଭଦ୍ରାଙ୍କ ବିରୋଧରେ ଏହି ମନି ଲଣ୍ଡରିଂ ମାମଲା ରୁଜୁ କରାଯାଇଛି । ସେହି ସଂପତ୍ତିର ଅସଲି ମାଲିକ ଭଦ୍ରା ବୋଲି ଇଡି ଦାବି କରିଛି । ଇଡି ଅନୁସାରେ ଫେରାର ଥିବା ଅସ୍ତ୍ରଶସ୍ତ୍ର ବ୍ୟାପାରୀ ସଞ୍ଜୟ ଭଣ୍ଡାରୀ ସେହି ସମ୍ପତ୍ତିକୁ ୧୬ କୋଟି ୮୦ ଲକ୍ଷ ଟଙ୍କାରେ କିଣିଥିଲା । ତାର ମରାମତିରେ ୬୫,୯୦୦ ପାଉଣ୍ଡ ଅତିରିକ୍ତ ଅର୍ଥ ଖର୍ଚ୍ଚ ହେବା ପରେ ମଧ୍ୟ ଭଣ୍ଡାରୀ ୨୦୧୦ରେ ତାକୁ ସେହି ଦାମ୍‌ରେ ଭଦ୍ରାଙ୍କର ଏକ ଫାର୍ମକୁ ବିକ୍ରି କରିଥିଲା । ଏଥିରୁ ସ୍ପଷ୍ଟ ହେଉଛି ଯେ ଭଣ୍ଡାରୀ ସେହି ସମ୍ପତ୍ତିର ପ୍ରକୃତ ମାଲିକ ନୁହେଁ । ଭଦ୍ରାଙ୍କୁ ଫାଇଦା ପହଞ୍ଚାଇବା ପାଇଁ ସେ ଏହି ବୁଝାମଣା କରିଥିଲା ବୋଲି ଇଡି ଦର୍ଶାଇଛି ।