ନୂଆଦିଲ୍ଲୀ, ୮।୧: ରେଲୱେ ଓ ସେନାରେ ଜାଲ୍ ଚାକିରି ମାମଲାରେ ଇଡିର ବଡ଼ କାର୍ଯ୍ୟାନୁଷ୍ଠାନ । ବିହାର ସମେତ ୬ ରାଜ୍ୟରେ ପ୍ରବର୍ତ୍ତନ ନିର୍ଦ୍ଦେଶାଳୟର ଏକକାଳୀନ ଚଢ଼ାଉ । ପ୍ରାରମ୍ଭରେ ଏହି ଠକେଇ ରେଳବାଇ ସହିତ ଜଡ଼ିତ ଥିବା ଜଣାପଡ଼ିଥିଲା, କିନ୍ତୁ ତଦନ୍ତ କରିବା ପରେ ଏହାର ପରିସର ୪୦ରୁ ଅଧିକ ସରକାରୀ ବିଭାଗକୁ ବ୍ୟାପିଥିବା ଜଣାପଡ଼ିଥିଲା । ଏହି କାର୍ଯ୍ୟାନୁଷ୍ଠାନ ଠକଙ୍କ ସଂଗଠିତ ନେଟୱାର୍କକୁ ପର୍ଦ୍ଦାଫାସ କରିଛି । ଇଡି ବିହାରର ମୁଜାଫରପୁର ଏବଂ ମୋତିହାରୀ, ପଶ୍ଚିମବଙ୍ଗର କୋଲକାତା, କେରଳ, ତାମିଲନାଡ଼ୁ, ଗୁଜରାଟ ଏବଂ ଉତ୍ତର ପ୍ରଦେଶର ମୋଟ୍ ୧୫ଟି ସ୍ଥାନରେ ସନ୍ଧାନ ଜାରି ରଖିଛି । ଏହି ସଂଗଠିତ ଗ୍ୟାଙ୍ଗ ସରକାରୀ ବିଭାଗ ନାଁରେ ନକଲି ନିଯୁକ୍ତି ପତ୍ର ପ୍ରଦାନ କରୁଥିଲେ ଏବଂ ସରକାରୀ ଡୋମେନ୍ ସଦୃଶ ନକଲି ଇମେଲ୍ ଆଇଡି ବ୍ୟବହାର କରି ପ୍ରାର୍ଥୀମାନଙ୍କୁ ଭ୍ରମିତ କରୁଥିଲେ । ବିଶ୍ୱାସ ଜିତିବା ପାଇଁ, ଏହି ଗ୍ୟାଙ୍ଗ କିଛି ଲୋକଙ୍କୁ ରେଳ ସୁରକ୍ଷା ବଳ, ଟିକେଟ ଚେକର ଏବଂ ଟେକ୍ନିସିଆନ୍ ଭଳି ପଦବୀରେ ନିଯୁକ୍ତ କରାଇଥିଲା ।
କିଛି ମାମଲାରେ ଲୋକଙ୍କର ଅସଲି ଚାକିରିରେ ନିଯୁକ୍ତି ହୋଇଥିବା ଦର୍ଶାଇ ଦୁଇରୁ ତିନି ମାସର ପ୍ରାରମ୍ଭିକ ଦରମା ମଧ୍ୟ ଦିଆଯାଇଥିଲା । ପରବର୍ତ୍ତୀ ସମୟରେ, ପ୍ରାର୍ଥୀମାନଙ୍କଠାରୁ ମୋଟା ଅଙ୍କର ରାଶି ଟଙ୍କା ଆଦାୟ କରାଯାଇଥିଲା । ଇଡି ତଦନ୍ତରୁ ଏହା ମଧ୍ୟ ଜଣାପଡ଼ିଛି ଯେ, ଏହି ଠକେଇ କେବଳ ରେଳବାଇରେ ସୀମିତ ନଥିଲା । ଜଙ୍ଗଲ ବିଭାଗ, ଆୟକର ବିଭାଗ, ହାଇକୋର୍ଟ, ପବ୍ଲିକ୍ ୱାର୍କସ୍ ବିଭାଗ ଏବଂ ବିହାର ସରକାରଙ୍କ ସମେତ ଅନ୍ୟ ସରକାରୀ ସଂଗଠନ ନାମରେ ମଧ୍ୟ ନକଲି ନିଯୁକ୍ତି ହୋଇଥିବା ଦର୍ଶାଯାଇଥିଲା । ଏ ମାମଲାରେ ଇଡିର ତଦନ୍ତ ଜାରି ରହିଛି ।
ରେଳବାଇ ଠକେଇ ଏକ ପ୍ରମୁଖ ଆର୍ଥିକ ଠକେଇ, ଯେଉଁଥିରେ ରେଳ ଦୁର୍ଘଟଣାରେ ଆହତ ଏବଂ ମୃତକଙ୍କ ପାଇଁ କ୍ଷତିପୂରଣ ପାଇବାର ଜାଲିଆତି ଅନ୍ତର୍ଭୁକ୍ତ । ଅନେକ ଲୋକ କ୍ଷତିପୂରଣ ପାଇଁ ଦାବି କରିଥିବା ଜଣାପଡ଼ିଛି, ଯେଉଁମାନେ ପ୍ରକୃତରେ ଦୁର୍ଘଟଣାର ଶିକାର ହୋଇନଥିଲେ । ଇଡିର ଏହି କାର୍ଯ୍ୟାନୁଷ୍ଠାନ ରାଜ୍ୟ ଏବଂ କେନ୍ଦ୍ର ସରକାରଙ୍କ ମଧ୍ୟରେ ଏକ ବାର୍ତ୍ତା ପଠାଇବ ଯେ, ଦୁର୍ନୀତି ଏବଂ ଆର୍ଥିକ ଠକେଇ ମାମଲାରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ୍ ।
