ବଣାଇ,୦୪/୧୦: ଟ୍ରାଙ୍କୁଲାଇଜ୍ କରି ରେଡ଼ିଓକୁଲାର ଲଗାଇଲା ପରେ ବି ଜୀବନ ନେଲା ଦନ୍ତା । ଘର ଭାଙ୍ଗି ଜଣଙ୍କ ଜୀବନ ନେଲା ଦନ୍ତା ହାତୀ । ମୃତକ ସୋମା ମୁଣ୍ଡା ବୋଲି ଜଣାପଡ଼ିଛି । ସୁନ୍ଦରଗଡ ଜିଲ୍ଲା କୋଇଡା ରେଞ୍ଜ୍ ଅନ୍ତର୍ଗତ ପାଟମୁଣ୍ଡା ଗ୍ରାମର ମତସାହିରେ ଏଭଳି ଘଟଣା ଘଟିଛି ।
ସୂଚନା ମୁତାବକ, କୋଇଡା ରେଞ୍ଜରେ କିଛି ଦିନ ତଳେ ଏକ ଏକ ଗୋଠ ଛଡା ଦନ୍ତା ହାତୀ ଉତ୍ପାତ ହେଉଥିଲା । ଗାଁରେ ପଶି ଲୋକଙ୍କ ଘର ଭାଙ୍ଗିବା ସହ ଫସଲ ମଧ୍ୟ ନଷ୍ଟ କରିଥିଲା । ଏହା ସହ କିଛି ସ୍ଥାନରେ ନଳକୂଅ ମଧ୍ୟ ଭାଙ୍ଗି ଦେଇଥିଲା ଦନ୍ତା । ତେଣୁ ହାତୀକୁ ଟ୍ରାଙ୍କୁଲାଇଜ୍ କରିଥିଲା ବନବିଭାଗ । ପରେ ହାତୀଟିକୁ ରେଡ଼ିଓକୁଲାର ଲଗାଯାଇଥିଲା । ଏହା ସତ୍ତ୍ବେ ଦନ୍ତା ନେଇଗଲା ଜଣଙ୍କ ଜୀବନ । ପାଟମୁଣ୍ଡା ଗ୍ରାମର ମତସାହିର ସୋମା ମୁଣ୍ଡାଙ୍କ ଘର ଭାଙ୍ଗି ଦେଇଥିଲା । ଏହା ସହ ତାଙ୍କ ଘରେ ପଶି ବ୍ୟକ୍ତିଙ୍କୁ ଦଳି କଚାଡ଼ି ମାରିଦେଲା ଦନ୍ତା । ଏହା ଦେଖି ସ୍ଥାନୀୟଲୋକେ ତୁରନ୍ତ ପୋଲିସ ଏବଂ ବନବିଭାଗକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ପୋଲିସ ଏବଂ ବନବିଭାଗ ପହଞ୍ଚି ଘଟଣାର ତଦନ୍ତ ଚଳାଇଛି । ଏହା ସହ ସୋମା ମୁଣ୍ଡାଙ୍କ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି ପୋଲିସ ।
