ନୂଆଦିଲ୍ଲୀ: ଜମ୍ମୁ ଓ କାଶ୍ମୀରର ପୁଲଓ୍ବାମା ଜିଲ୍ଲାର ତ୍ରାଲ ଅଞ୍ଚଳରେ ଥିବା ନାଦିର ଗାଁରେ ଆଜି ସୁରକ୍ଷା ବାହିନୀ ସହ ଏକ ଏନକାଉଣ୍ଟରରେ ତିନି ଜଣ ଜୈଶ-ଏ-ମହମ୍ମଦ (ଜେଇଏମ) ଆତଙ୍କବାଦୀ ନିହତ ହୋଇଛନ୍ତି। ମୃତ ଆତଙ୍କବାଦୀଙ୍କ ମଧ୍ୟରେ ଆମିର ନାଜିର ଓ୍ବାନୀ, ଆସିଫ ଆହମଦ ଶେଖ ଏବଂ ଯାୱାର ଆହମଦ ଭଟ୍ଟ ରହିଛନ୍ତି। ତେବେ ସମସ୍ତ ମୃତକ ପୁଲଓ୍ବାମାର ସ୍ଥାନୀୟ ବାସିନ୍ଦା ଥିଲେ ବୋଲି ଜଣାପଡିଛି।
ଏହି ଘଟଣା ସହ ଜଡିତ ଭିନ୍ନଭିନ୍ନ ଦିଗ ଏବେ ସାମ୍ନାକୁ ଆସିବାରେ ଲାଗିଛି। ଯେଉଁଠାରେ ଆମିର ନାଜିର ଓ୍ବାନୀ ଏନକାଉଣ୍ଟର ପୂର୍ବରୁ ତାଙ୍କ ମା’ ଓ ଭଉଣୀଙ୍କ ସହ ଏକ ଭିଡିଓ କଲରେ କଥା ହେଉଥିବା ଦେଖାଯାଇଛି। ସୋସିଆଲ ମିଡିଆରେ ଭାଇରାଲ ହୋଇଥିବା ଏକ ଭିଡିଓରେ ଆମିରଙ୍କୁ ଏକେ-୪୭ ରାଇଫଲ ଧରି ତାଙ୍କ ମା’ଙ୍କ ସହ କଥା ହେଉଥିବା ଦେଖାଯାଇଛି। ତାଙ୍କ ମା’ ତାଙ୍କୁ ବାରମ୍ବାର ଆତ୍ମସମର୍ପଣ କରିବାକୁ ଅନୁରୋଧ କରୁଥିବା ଦେଖାଯାଇଛି। ତେବେ ଏହାର ଉତ୍ତରରେ ଆମିର ତାଙ୍କ ମାଙ୍କୁ, "ସେନା ଆଗକୁ ଆସୁ, ତା’ପରେ ମୁଁ ଦେଖିବି" ବୋଲି କହୁଥିବା ଶୁଣିବାକୁ ମିଳିଚି। ସୂତ୍ର ଅନୁଯାୟୀ, ସୁରକ୍ଷା ବାହିନୀ ଆତଙ୍କବାଦୀମାନଙ୍କୁ ଆତ୍ମସମର୍ପଣ କରିବାକୁ ଚେଷ୍ଟା କରି ଦୀର୍ଘସମୟ ଅପେକ୍ଷା କରିଥିଲେ। କିନ୍ତୁ ଆମିର ଏହା ମାନି ନ ଥିଲେ।
ସୁରକ୍ଷା ବାହିନୀକୁ ନାଦିର ଗାଁରେ ଆତଙ୍କବାଦୀଙ୍କ ଉପସ୍ଥିତି ବିଷୟରେ ଗୁଇନ୍ଦା ସୂଚନା ମିଳିଥିଲା। ଓହାପରେ ସେନା ଗୁରୁବାପ ସକାଳେ ଏନକାଉଣ୍ଟର ଆରମ୍ଭ ହୋଇଥିଲା। ଆମିର ଓ ଅନ୍ୟ ଆତଙ୍କବାଦୀମାନେ ଏକ ଘରେ ଲୁଚି ରହିଥିବା ବେଳେ ସୁରକ୍ଷା ବାହିନୀ ସେମାନଙ୍କୁ ଘେରି ଯାଇଥିଲେ। ଏହାପରେ ଉଭୟ ପକ୍ଷ ମଧ୍ୟରେ ତୁମୁଳ ଗୁଳି ବିନିମୟ ହୋଇଥିଲା। ଯେଉଁଥିରେ ତିନି ଆତଙ୍କବାଦୀ ନିହତ ହୋଇଥିଲେ।
ଏକ ଅତିରିକ୍ତ ଘଟଣାରେ, ଏନକାଉଣ୍ଟର ପରେ ଆମିର ନାଜିର ଓ୍ବାନୀଙ୍କ ଘରକୁ ସୁରକ୍ଷା ବାହିନୀ ଧ୍ୱଂସ କରି ଦେଇଥିବା ରିପୋର୍ଟ ମିଳିଛି। ଏହା ଜମ୍ମୁ ଓ କାଶ୍ମୀରରେ ଆତଙ୍କବାଦ ବିରୁଦ୍ଧରେ ଚାଲିଥିବା କଡା କାର୍ଯ୍ୟାନୁଷ୍ଠାନର ଏକ ଅଂଶ ବୋଲି କୁହାଯାଉଛି। ସେହିଭଳି ସୁରକ୍ଷା ବାହିନୀ ଅଞ୍ଚଳରେ ଶାନ୍ତି ଓ ସ୍ଥିରତା ବଜାୟ ରଖିବା ପାଇଁ ତୀବ୍ର ଅଭିଯାନ ଜାରି ରଖିଛି।
