ନୂଆଦିଲ୍ଲୀ, ୨।୫: ଇରାନର ଉତ୍ତର-ପଶ୍ଚିମରେ ଅବସ୍ଥିତ ଜଞ୍ଜାନ ସହର ନିକଟରେ ଏକ ଭୟଙ୍କର ବିସ୍ଫୋରଣ ଘଟିଛି । ଏହି ଅଘଟଣରେ ଇରାନର ଶକ୍ତିଶାଳୀ ସେନା ବାହିନୀ 'ଇସଲାମିକ୍ ରିଭୋଲ୍ୟୁସନାରୀ ଗାର୍ଡ କୋର' (IRGC)ର ୧୪ ଜଣ ସଦସ୍ୟ ପ୍ରାଣ ହରାଇଥିବା ବେଳେ ଅନ୍ୟ ୨ ଜଣ ଗୁରୁତର ଆହତ ହୋଇଛନ୍ତି । ଗତ ଏପ୍ରିଲ ୭ ତାରିଖରେ ଇରାନ ଓ ଆମେରିକା ମଧ୍ୟରେ ଯୁଦ୍ଧବିରତି ଘୋଷଣା ହେବା ପରେ IRGC ପାଇଁ ଏହା ସବୁଠାରୁ ବଡ଼ କ୍ଷତି ବୋଲି କୁହାଯାଉଛି ।

ଅଫୁଟା ବୋମା ନିଷ୍କ୍ରିୟ ବେଳେ ଅଘଟଣ:

ଇରାନ ଗଣମାଧ୍ୟମର ସୂଚନା ଅନୁଯାୟୀ, ଗତ ଯୁଦ୍ଧ ସମୟରେ ଆମେରିକା ଓ ସହଯୋଗୀ ଦେଶମାନଙ୍କ ଦ୍ୱାରା ନିକ୍ଷେପ କରାଯାଇଥିବା ଅନେକ କ୍ଲଷ୍ଟର ବୋମା ଓ ଗୋଳାବାରୁଦ ମାଟିରେ ଅଫୁଟା ଅବସ୍ଥାରେ ପଡ଼ି ରହିଥିଲା । ଏହି ବିପଜ୍ଜନକ ବୋମାଗୁଡ଼ିକୁ ନିଷ୍କ୍ରିୟ କରିବା ପାଇଁ IRGC ର ଏକ ସ୍ୱତନ୍ତ୍ର ବୋମା ନିଷ୍କ୍ରିୟକାରୀ ଦଳ ଅଭିଯାନ ଚଳାଇଥିଲା । ଅଭିଯାନ ସମୟରେ ହଠାତ୍ ଏକ ଶକ୍ତିଶାଳୀ ବିସ୍ଫୋରଣ ଘଟିବାରୁ ଘଟଣାସ୍ଥଳରେ ହିଁ ୧୪ ଜଣ ଯବାନଙ୍କ ମୃତ୍ୟୁ ଘଟିଥିଲା । ସ୍ଥାନୀୟ ପ୍ରଶାସନ ପକ୍ଷରୁ କୁହାଯାଇଛି ଯେ, ଏହି ଅଞ୍ଚଳରେ ପଡ଼ି ରହିଥିବା ଅଫୁଟା ବୋମାଗୁଡ଼ିକ ସାଧାରଣ ଜନତାଙ୍କ ପାଇଁ ବଡ଼ ବିପଦ ସୃଷ୍ଟି କରିଛନ୍ତି । ପ୍ରାୟ ୧,୨୦୦ ହେକ୍ଟର କୃଷି ଜମି ଏବେ ମୃତ୍ୟୁର ଜନ୍ତା ପାଲଟିଛି । ଯେପର୍ଯ୍ୟନ୍ତ ଏହି ଅଞ୍ଚଳକୁ ସମ୍ପୂର୍ଣ୍ଣ ରୂପେ ବୋମାମୁକ୍ତ କରାନଯାଇଛି, ସେପର୍ଯ୍ୟନ୍ତ ଚାଷୀମାନେ ନିଜ ଜମିକୁ ଯିବା ସୁରକ୍ଷିତ ନୁହେଁ ।

ଆମେରିକାର ରଣନୀତିକୁ ନେଇ IRGCର କଟାକ୍ଷ:

ଏହି ଘଟଣା ପରେ IRGC ପକ୍ଷରୁ ଏକ ଗୁରୁତ୍ୱପୂର୍ଣ୍ଣ ବୟାନ ଜାରି କରାଯାଇଛି । ସେମାନେ କହିଛନ୍ତି ଯେ, ଟ୍ରମ୍ପ ପ୍ରଶାସନ ବିଶ୍ୱ ଶକ୍ତି ପରିଚାଳନା ପରିବର୍ତ୍ତେ 'ଅରାଜକତା' ସୃଷ୍ଟି କରିବା ପାଇଁ ରଣନୀତି ଆପଣେଇଛି । ଆମେରିକା, ଚୀନ୍, ରୁଷ ଏବଂ ୟୁରୋପକୁ ନିୟନ୍ତ୍ରଣ କରିବା ପାଇଁ ସାମୁଦ୍ରିକ ଘେରାବନ୍ଦୀ ସହ ଯୁଦ୍ଧ ଜରିଆରେ ବାଧା ସୃଷ୍ଟି କରୁଛି । ମାତ୍ର ଇରାନ ଏବେ ଏହି 'ଅରାଜକତା ବିରୋଧୀ ମେଣ୍ଟ'ର ମୁଖ୍ୟ କେନ୍ଦ୍ର ପାଲଟିଛି ଏବଂ ଆମେରିକାର ଯୋଜନା ବିଫଳ ହେବାରେ ଲାଗିଛି ।

ଚୁକ୍ତିକୁ ନେଇ ଡୋନାଲ୍ଡ ଟ୍ରମ୍ପଙ୍କ ଅସନ୍ତୋଷ:

ଅନ୍ୟପଟେ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନ ସହ ସଂଘର୍ଷ ଶେଷ କରିବା ପାଇଁ ଆସିଥିବା ନୂଆ ପ୍ରସ୍ତାବ ଉପରେ ଅସନ୍ତୋଷ ପ୍ରକାଶ କରିଛନ୍ତି । ହ୍ୱାଇଟ୍ ହାଉସରୁ ଗଣମାଧ୍ୟମକୁ ସମ୍ବୋଧିତ କରି ସେ କହିଛନ୍ତି, "ସେମାନେ ଚୁକ୍ତି କରିବାକୁ ଚାହୁଁଛନ୍ତି, କିନ୍ତୁ ମୁଁ ଏହି ପ୍ରସ୍ତାବରେ ସନ୍ତୁଷ୍ଟ ନୁହେଁ । ତେଣୁ ଆଗକୁ କ’ଣ ହେଉଛି ଦେଖାଯାଉ ।" ଟ୍ରମ୍ପ ଆହୁରି ମଧ୍ୟ କହିଛନ୍ତି ଯେ, ଇରାନର ନେତୃତ୍ୱ ଏବେ ଅତ୍ୟନ୍ତ ଦୁର୍ବଳ ଓ ବିଭାଜିତ । ସେଠାରେ ତିନି ଚାରିଟି ଭିନ୍ନ ଭିନ୍ନ ଗୋଷ୍ଠୀ ଶାସନ କରୁଛନ୍ତି, ଯାହା ଚୁକ୍ତି ପ୍ରକ୍ରିୟାରେ ବାଧା ସୃଷ୍ଟି କରୁଛି । ଇରାନର ଜଞ୍ଜାନରେ ହୋଇଥିବା ଏହି ବିସ୍ଫୋରଣ ପୁଣିଥରେ ଯୁଦ୍ଧର ବିଭୀଷିକାକୁ ସାମ୍ନାକୁ ଆଣିଛି । ଗୋଟେ ପଟେ ଶାନ୍ତି ପାଇଁ ଆଲୋଚନା ଚାଲିଥିବା ବେଳେ ଅନ୍ୟପଟେ ଯୁଦ୍ଧ ସମୟର ପରିତ୍ୟକ୍ତ ବୋମା ନିରୀହ ସୈନିକଙ୍କ ପ୍ରାଣ ନେଉଛି । ଏହି ଘଟଣାକୁ ନେଇ ସମଗ୍ର ଇରାନରେ ଏବେ ଶୋକର ଛାୟା ଖେଳିଯାଇଛି ।

ଆହୁରି ପଢ଼ନ୍ତୁ... China property Prices Crash 2026: ଭାରତରେ ୨୦ ବର୍ଷ ପୂର୍ବରୁ ଥିବା ମୂଲ୍ୟରେ ଉପଲବ୍ଧ ହେବ କି ଫ୍ଲାଟ୍ କିମ୍ବା ଘର? ଚୀନରେ ଘଟିଛି ଏମିତି ଘଟଣା