ଭୁବନେଶ୍ୱରସ୍ଥିତ ଆପୋଲ ହସ୍ପିଟାଲରେ ଲାଗିଲା ନିଆଁ, ରୋଗୀଙ୍କୁ ସ୍ଥାନାନ୍ତର କରାଯାଇଛି
ଭୁବନେଶ୍ୱର: ଭୁବନେଶ୍ୱର ସ୍ଥିତ ଆପୋଲ ହସ୍ପିଟାଲରେ ଆଜି ସକାଳେ ନିଆଁ ଲାଗିଛି । ହସ୍ପିଟାଲର ୫ମ ମହଲାରେ ନିଆଁ ଲାଗିଥିବା ଜଣାପଡ଼ିଛି । ନିଆଁ ଲାଗିବା ପରେ ଏହି ମହଲାରେ ଥିବା ରୋଗୀମାନଙ୍କୁ ତଳମହଲାକୁ ସ୍ଥାନାନ୍ତର କରାଯାଇଛି । ଅଗ୍ନିକାଣ୍ଡର କାରଣ ଜଣାପଡ଼ି ନ ଥିଲେ ମଧ୍ୟ ସର୍ଟ ସର୍କିଟରୁ ଏହି ଅଗ୍ନିକାଣ୍ଡ ଘଡ଼ିଥିବା ଆଶଙ୍କା କରାଯାଉଛି ।
ମିଳିଥିବା ସୂଚନା ଅନୁଯାୟୀ, ଆଜି ସକାଳେ ପ୍ରାୟ ୧୦ଟା ବେଳେ ହଠାତ୍ ଆପୋଲ ହସ୍ପିଟାଲର ୫ମ ମହଲାରେ ଥିବା ଆଇସିୟୁ ପାଖରେ ନିଆଁ ଲାଗିଥିଲା । ସଙ୍ଗେ ସଙ୍ଗେ ହସ୍ପିଟାଲ କର୍ତୃପକ୍ଷ ନିଆଁକୁ ଆୟତ କରିବା ପାଇଁ ଉଦ୍ୟମ କରିବା ସହିତ ଅଗି୍ନଶମ ବିଭାଗକୁ ଖବର ଦେଇଥିଲେ । ତେବେ ପ୍ରବଳ ଧୂଆଁ ଯୋଗୁଁ ଏବେ ବି ପରିସ୍ଥିତି ଗମ୍ଭୀର ରହିଛି । ଅଗ୍ନିଶମ ଅଧିକାରୀମାନେ ଭିତରେ ପ୍ରବେଶ ପାଇଁ ଉଦ୍ୟମ ଚଳାଇଛନ୍ତି । ପଂଚମ ମହଲାରେ ଥିବା ପ୍ରାୟ ୨୦ଜଣ ରୋଗୀଙ୍କୁ ତଳକୁ ଅଣାଯାଉଥିବା ସୂଚନା ମିଳିଛି । ତେବେ ଲିଫ୍ଟ ବନ୍ଦ ଥିବାରୁ ରୋଗୀମାନଙ୍କୁ ଷ୍ଟ୍ରେଚରରେ ବାନ୍ଧି ତଳକୁ ଆଣିବା ପାଇଁ ଉଦ୍ୟମ କରାଯାଉଛି ।
