କେନ୍ଦ୍ରାପଡ଼ା, ୨୮/୧୨ : ସର୍ବନାଶ କଲା ଅଦିନିଆ ବର୍ଷା। ଉଜାଡ଼ିଦେଲା ବର୍ଷକର ପରିଶ୍ରମ। ସହି ପାରିଲେନି ଚାଷୀ। କୀଟନାଶକ ପିଇ ଆତ୍ମହତ୍ୟା କଲେ ଭାଗଚାଷୀ। କେନ୍ଦ୍ରାପଡ଼ା ଜିଲ୍ଲା ଡେରାବିଶ ଥାନା ଖମୋଳ ପଞ୍ଚାୟତ କୋସିଦା ଗାଁରେ ଏଭଳି ଅଭାବନୀୟ ଘଟଣା ଗଟିଛି। ଭାଗଚାଷୀ ଦୈତାରୀ ଜେନା କୀଟନାଶକ ପିଇ ଆତ୍ମହତ୍ୟା କରିଥିବା ଅଭିଯୋଗ ହୋଇଛି।
ସୂଚନାନୁଯାୟୀ, ଅଦିନିଆ ବର୍ଷାରେ ଫସଲ ନଷ୍ଟ ହେବା ଯୋଗୁଁ ଖମୋଳ ପଞ୍ଚାୟତ କୋସିଦା ଗାଁର ଦୈତାରୀ ଜେନା (୭୨ ବର୍ଷ) ଗତ ୨୩ ତାରିଖ ଦିନ କୀଟନାଶକ ପିଇ ଦେଇଥିଲେ। ପରିବାର ଲୋକେ ତାଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରିଥିଲେ। ହେଲେ ଆଜି ତାଙ୍କର ମୃତ୍ୟୁ ହୋଇଛି। ଚଳିତ ବର୍ଷ ଋଣ କରି ଦୈତାରୀ ପ୍ରାୟ ତିନି ମାଣେ ଜମିରେ ଧାନ ଚାଷ କରିଥିଲେ। ଲଗାଣ ବର୍ଷାରେ ଧାନ ଫସଲ ନଷ୍ଟ ହୋଇଯିବା ଯୋଗୁଁ ଦୈତାରୀ କୀଟନାଶକ ପିଇ ଆତ୍ମହତ୍ୟା କରିଥିବା ପରିବାର ଲୋକେ ଅଭିଯୋଗ କରିଛନ୍ତି। ତେବେ ଦୈତାରୀଙ୍କ ମୃତ୍ୟୁର ପ୍ରକୃତ କାରଣ ଜଣାପଡ଼ି ନାହିଁ।
