ମାଲକାନଗିରି, ୨୩/୮(ଆପ୍ର ) : ଚଳିତ ବର୍ଷ ଖରିଫ ଚାଷ ପାଇଁ ସାରର ଅଭାବ ସାଙ୍ଗକୁ କଳା ବଜାର ହେଉଥିବାର ଅଭିଯୋଗ ହେଉଛି। ମାଲକାନଗିରି ଜିଲ୍ଲାର ମାଲକାନଗିରି, କାଲିମେଳା, ପଡିଆ, ମାଥିଲି, କୋରକୁଣ୍ଡା, ଚିତ୍ରକୋଣ୍ଡା, ଖଇରପୁଟ ସାତଟି ବ୍ଲକ ଅଞ୍ଚଳର ୟୁରିଆ ସାରର ଘୋର ଅଭାବ ଦେଖା ଦେଇଥିବାରୁ ଚାଷୀମାନେ ହତାଶ ହୋଇ ପଡିଛନ୍ତି। ପ୍ରତିଦିନ ବିଭିନ୍ନ ଲ୍ୟାମ୍ପସ ଓ ସାର ଦୋକାନ ସମ୍ମୁଖରେ ଚାଷୀ ସାର ପାଇଁ ଖରା ବର୍ଷାରେ ଲମ୍ବା ଲାଇନରେ ଛିଡା ହୋଇ ଥିବାର ଦେଖିବାକୁ ମିଳୁଛି। ସାର ପାଇଁ ମାଲକାନଗିରି ଜିଲ୍ଲା ମାଥିଲି ଲ୍ୟାମ୍ପସ ଆଗରେ ଶନିବାର ଚାଷୀ ମାନେ ବିକ୍ଷୋଭ ପ୍ରଦର୍ଶନ କରିଥିଲେ। ଏଥି ସହିତ ୩୨୬ ନମ୍ବର ଜାତୀୟ ରାଜ ପଥ ଅବରୋଧ କରିଥିଲେ। ଯାହା ଫଳ ରେ ଦୀର୍ଘ ୫ଘଣ୍ଟା ଧରି ରାସ୍ତାର ଉଭୟ ପାର୍ଶ୍ଵ ରେ ଶତାଧିକ ଯାନବାହନ ଅଟକି ରହିଥିଲା।
ଏହି ଖବର ପାଇ ମାଥିଲି ବିଡିଓ ପ୍ରମୋଦ କୁମାର ବେହେରା, ତହସିଲଦାର ମାନସୀ ଭୋଇ ଓ ଥାନା ଅଧିକାରୀ ଗୀତାଞ୍ଜଳି ପ୍ରଧାନ ଘଟଣା ସ୍ଥଳରେ ପହଞ୍ଚି ଆନ୍ଦୋଳନକାରୀ ଚାଷୀମାନଙ୍କୁ ରାସ୍ତା ରୋକ ଆନ୍ଦୋଳନ ପ୍ରତ୍ୟାହାର କରିବା ପାଇଁ ବୁଝାଇଥିଲେ। ସାର ପହଞ୍ଚିଲେ ଆନ୍ଦୋଳନ ପ୍ରତ୍ୟାହାର ହେବ ବୋଲି ଆନ୍ଦୋଳନକାରୀ ଜିଦ୍ କରି ବସି ରହିଥିଲେ। ଆସନ୍ତା ଶୁକ୍ରବାର ମଧ୍ୟରେ ସାର ପହଁଞ୍ଚିବ ବୋଲି ଲିଖିତ ପ୍ରତିଶ୍ରୁତି ଦେଵା ପରେ ଆନ୍ଦୋଳନ ପ୍ରତ୍ୟାହାର ହୋଇଥିଲା। ଦୀର୍ଘ ୫ ଘଣ୍ଟା ପରେ ଜାତୀୟ ରାଜପଥରେ ଯାନ ବାହନ ଚଳାଚଳ ସ୍ୱାଭାବିକ ହୋଇଥିଲା। ଚାଷୀଙ୍କ ରାସ୍ତା ରୋକ ଆନ୍ଦୋଳନକୁ ଆଦିବାସୀ ସମାଜ ମହାସଂଘ ସଭାପତି ବନ୍ଧୁ ମୁଦୁଲି, ସମାଜ ସେବୀ ଶରତ ବୁରୁଦା, ଲଷ୍ମୀପ୍ରିୟା ନାୟକ ପ୍ରମୁଖ ସମର୍ଥନ କରିଥିଲେ।
