ନ୍ୟୁୟର୍କ, ୧୨/୦୬: ମେକ୍ସିକୋର ଐତିହାସିକ ଆଜଟେକା ଷ୍ଟାଡ଼ିୟମରେ ଆରମ୍ଭ ହୋଇଛି ୨୩ତମ ଫିଫା ବିଶ୍ୱକପ୍ । ୧୬ ବର୍ଷ ପରେ ମେକ୍ସିକୋ ଓ ଦକ୍ଷିଣ ଆଫ୍ରିକା ଉଦ୍ଘାଟନୀ ମୁକାବିଲାରେ ପୁଣି ଥରେ ସାମ୍ନା ସାମ୍ନି ହୋଇଥିଲେ । ମେକ୍ସିକୋ ବିଜୟ ସହ ଅଭିଯାନ ଆରମ୍ଭ କରିଛି । ଗୁରୁବାର ଅନୁଷ୍ଠିତ ପ୍ରଥମ ମୁକାବିଲାରେ ଦଳ ୨-୦ ଗୋଲ୍ରେ ବିଜୟ ହାସଲ କରିଥିଲା । ଏହି ମ୍ୟାଚରେ ୩ଜଣ ଖେଳାଳିଙ୍କୁ ରେଡ କାର୍ଡ ପ୍ରଦର୍ଶିତ କରାଯାଇଥିଲା ।
ଅଧିକ ପଢ଼ନ୍ତୁ :- IND A VS AFG A: ବର୍ଷା, DLS, ୩୪୯ ରନ୍...ତଥାପି ହାରିଲା ଭାରତ, ଏବେ କେମିତି ଖେଳିବ ଟ୍ରାଇ ସିରିଜ୍ ଫାଇନାଲ ?
ମ୍ୟାଚ୍ ଆରମ୍ଭରୁ ମେକ୍ସିକୋ ପ୍ରଭାବ ବିସ୍ତାର କରି ଖେଳିଥିଲା । ପଞ୍ଚମ ମିନିଟ୍ରେ ରାଉଲ ଜିମିନେଜ ପ୍ରଥମ ଗୋଲ୍ ପାଇଁ ଏକ ସୁଯୋଗ ସୃଷ୍ଟି କରିଥିଲେ । ମାତ୍ର ଦକ୍ଷିଣ ଆଫ୍ରିକା ଗୋଲ୍ କିପର ଏହାକୁ ଅଟକାଇ ଦେଇଥିଲେ । ଏହାର ୪ ମିନିଟ୍ ମଧ୍ୟରେ ମେକ୍ସିକୋ ଆଉ ଥରେ ଆକ୍ରମଣ କରି ଗୋଲ୍ ଖାତା ଖୋଲିଥିଲା । ନବମ ମିନିଟ୍ରେ ଜୁଲିଆନ କ୍ୱିନୋନ୍ସ ସାଥୀ ଖେଳାଳି ଏରିକ ଲିରାଙ୍କ ଠାରୁ ଏକ ପାସ୍ ପାଇ ଗୋଲ୍ କରିଥିଲେ । ଅଗ୍ରଣୀ ପରେ ମେକ୍ସିକୋ ଘନ ଘନ ଆକ୍ରମଣ କରିଥିଲା । ମାତ୍ର ଦକ୍ଷିଣ ଆଫ୍ରିକା ଆଉ ତ୍ରୁଟି କରି ନଥିଲା । ପ୍ରଥମାର୍ଦ୍ଧ ଶେଷ ହେବା ପର୍ଯ୍ୟନ୍ତ ଆଉ ଗୋଲ୍ ହୋଇ ନଥିଲା । ୪୫ ମିନିଟ୍ ମଧ୍ୟରେ ମେକ୍ସିକୋ ୧୦ଟି ସୁଯୋଗ ସୃଷ୍ଟି କରିଥିଲା । ଜବାବରେ ଦକ୍ଷିଣ ଆଫ୍ରିକା ୨ଟି ସୁଯୋଗ ସୃଷ୍ଟି କରିଥିଲେ ହେଁ ଗୋଲ୍ କରିବାରେ ବିଫଳ ହୋଇଥିଲା ।
ଦ୍ୱିତୀୟାର୍ଦ୍ଧ ଆଗେଇବା ସହ ଦକ୍ଷିଣ ଆଫ୍ରିକା ମ୍ୟାଚ୍କୁ ଫେରିବା ପାଇଁ ଜୋରଦାର ପ୍ରୟାସ କରିଥିଲା । ମେକ୍ସିକୋ ଚତୁର ରଣନୀତି ପ୍ରୟୋଗ କରି ମ୍ୟାଚକୁ ନିୟନ୍ତ୍ରଣରେ ରଖିଥିଲା ଓ ସୁଯୋଗ ଦେଖି ଗୋଲ୍ ପାଇଁ ଆକ୍ରମଣ କରୁଥିଲା । ୪୯ତମ ମିନିଟ୍ରେ ଦକ୍ଷିଣ ଆଫ୍ରିକା ଖେଳାଳି ସଫେଫେଲୋ ସିଠୋଲ ଫାଉଲ ମାରି ରେଡ୍ କାର୍ଡ ପାଇଥିଲେ । ବାକି ସମୟ ଦକ୍ଷିଣ ଆଫ୍ରିକା ୧୦ ଜଣରେ ଖେଳିବାକୁ ବାଧ୍ୟ ହୋଇଥିଲା । ମେକ୍ସିକୋ ଏହାର ସୁଯୋଗ ନେଇ ଦ୍ୱିତୀୟ ଗୋଲ୍ କରିଥିଲା । ୬୭ତମ ମିନିଟ୍ରେ ରୋବେର୍ଟୋ ଆଲଭାରାଡୋଙ୍କ ଠାରୁ ପାସ୍ ପାଇ ରାଉଲ ଜିମିନେଜ ଗୋଲ୍ କରିଥିଲେ ।
ଦକ୍ଷିଣ ଆଫ୍ରିକା ଆଉ କୌଣସି ଉପାୟ ନପାଇ ଫାଉଲ ଉପରେ ଗୁରୁତ୍ୱ ଦେଇଥିଲା । ଫଳ ସ୍ୱରୂପ ୮୪ତମ ମିନିଟ୍ରେ ଆଉ ଏକ ରେଡ କାର୍ଡ ପାଇ ବିଦା ହୋଇଥିଲେ ଥେମ୍ବା ଜ୍ୱାନେ । ସେ ମେକ୍ସିକୋର ରୋବର୍ଟୋ ଆଲଭାରାଡୋଙ୍କୁ ଫାଉଲ ମାରିଥିଲେ । ୯ଜଣରେ ବାକି ସମୟ ଖେଳି ମ୍ୟାଚକୁ ଫେରିବା ସମ୍ଭବ ହୋଇ ନଥିଲା । ତଥାପି ଦକ୍ଷିଣ ଆଫ୍ରିକା ଲଢ଼େଇ ଜାରି ରଖିଥିଲା । ୯୦୍ମ୨ତମ ମିନିଟ୍ରେ ଦକ୍ଷିଣ ଆଫ୍ରିକା ଖେଳାଳି ଖୁଲିସୋ ମୁଡାଉଙ୍କୁ ଫାଉଲ ମାରି ମେକ୍ସିକୋ ଖେଳାଳି ସିଜାର ମଣ୍ଟେସ ରେଡ୍ କାର୍ଡ ପାଇ ବିଦା ହୋଇଥିଲେ । ମେକ୍ସିକୋ ପୋଷ୍ଟ ନିକଟରେ ଫ୍ରି-କିକ ମିଳିଥିଲେ ହେଁ ଦକ୍ଷିଣ ଆଫ୍ରିକା ସୁଯୋଗ ହାତଛଡ଼ା କରିଥିଲା । ମେକ୍ସିକୋର ବିଜୟ ପକ୍କା ହୋଇ ଯାଇଥିଲା ।
