ଅହମ୍ମଦାବାଦ,୧୯/୧୧: ଦେଶରେ ଥମୁନି ର୍ୟାଗିଂ ମାମଲା । ଶନିବାର ଗୁଜରାଟ ପାଟନ ଜିଲ୍ଲା ଧାରପୁରସ୍ଥିତ ଜିଏମ୍ଇଆରଏସ୍ ମେଡିକାଲ କଲେଜରେ ଏଥିଯୋଗୁ ପ୍ରଥମ ବର୍ଷର ଜଣେ ଏମ୍ବିବିଏସ୍ ଛାତ୍ରଙ୍କ ମୃତ୍ୟୁ ଘଟିଛି । ସିନିୟର ଛାତ୍ରମାନେ ପୀଡିତଙ୍କୁ ୩ ଘଣ୍ଟା ଧରି ଛିଡ଼ା କରାଇବାରୁ ସେ ବେହୋସ ହୋଇଯାଇଥିଲେ । ପରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି । ଏହି ମାମଲାରେ ତାଙ୍କର ୧୫ ଜଣ ସିନିୟରଙ୍କ ବିରୋଧରେ ଏଫଆଇଆର ରୁଜୁ କରାଯାଇଛି । ସେମାନଙ୍କୁ କଲେଜରୁ ସସ୍ପେଣ୍ଡ କରାଯିବା ସହିତ କଲେଜରେ ତୁରନ୍ତ ର୍ୟାଗିଂ ନିରୋଧୀ କମିଟିର ବୈଠକ ହୋଇଛି । ବୈଠକରେ ଜୁନିଅର ଛାତ୍ରମାନଙ୍କର ବୟାନ ନିଆଯାଇଥିବାବେଳେ ସେଥିରୁ ର୍ୟାଗିଂ ସଂପର୍କରେ ଖୁଲାସା ହୋଇଛି ।
ପୁଲିସ ଅନୁସାରେ, ମୃତକ ହେଲେ ୧୮ ବର୍ଷୀୟ ଅନୀଲ ମେଥାନିୟା । ସେ ସୁରେନ୍ଦ୍ରନଗର ଜିଲ୍ଲାର ବାସିନ୍ଦା ହୋଇଥିବାବେଳେ ଚଳିତବର୍ଷ ଜିଏମ୍ଇଆରଏସ୍ ମେଡିକାଲ କଲେଜରେ ନାମ ଲେଖାଇଥିଲେ । ତେବେ ଶନିବାର ହଷ୍ଟେଲରେ ଦ୍ୱିତୀୟ ବର୍ଷର ସିନିୟରମାନେ ପରିଚୟ ଦେବା ଲାଗି ତାଙ୍କୁ ୩ ଘଣ୍ଟା ଛିଡ଼ା କରାଇଥିଲେ । ଗୀତ ଗାଇବା ସହିତ ନାଚିବାକୁ ବାଧ୍ୟ କରିଥିଲେ । ସେଥିଯୋଗୁ ଅନୀଲ ବେହୋସ ହୋଇଯାଇଥିଲେ । ପୁଲିସ ଏ ସଂପର୍କରେ ସୂଚନା ପାଇବା ପରେ ତାଙ୍କୁ ତୁରନ୍ତ ହସ୍ପିଟାଲ ନେଇଥିଲା । ସେଠାରେ ବୟାନ ଦେବା ପରେ ତାଙ୍କର ମୃତ୍ୟୁ ଘଟିଛି । ମୃତକଙ୍କ ଭାଇ ଧର୍ମେନ୍ଦ୍ର ମେଥାନିୟା ତାଙ୍କ ପରିବାରକୁ ନ୍ୟାୟ ମିଳିବା ପାଇଁ ଦାବି କରିଛନ୍ତି । ଜିଏମ୍ଇଆରଏସ୍ ମେଡିକାଲ କଲେଜର ଡିନ୍ ହାର୍ଦ୍ଦିକ ଶାହ କହିଛନ୍ତି, ଇନ୍ଷ୍ଟିଚ୍ୟୁଟ୍ ପକ୍ଷରୁ ତଦନ୍ତ ଆରମ୍ଭ କରାଯାଇଛି ।
