ଜଗତସିଂହପୁର,୩୦/୪ : କୋଲକାତାରେ ଋତୁରାଜ ନାମକ ଏକ ଘରୋଇ ହୋଟେଲରେ ଅଗ୍ନିକାଣ୍ଡ । ଅଗ୍ନିକାଣ୍ଡରେ ୪ ଓଡ଼ିଆଙ୍କ ମୃତ୍ୟୁ ହୋଇଛି । ମୃତକଙ୍କ ହେଲେ ଜଗତସିଂହପୁର ଜିଲ୍ଲା ନନ୍ଦନ ଗାଁର ମନୋଜ ପାତ୍ର, ହରିପା ଗାଁର ଦୁଷ୍ମନ୍ତ କୁମାର ନାୟକ ଓ ଦୁଷ୍ମନ୍ତ କୁମାର ସ୍ୱାଇଁ । ଏମାନେ ଭୁବନେଶ୍ୱରରେ ଏକ ଘରୋଇ ଫାଇନାନ୍ସ କମ୍ପାନୀରେ କାମ କରୁଥିବା ସହ କମ୍ପାନୀ କାମରେ କୋଲକାତା ଯାଇ ସେଠାରେ ହୋଟେଲରେ ରହିଥିଲେ । ସେହିଭଳି କଟକର ଜଣେ ବ୍ୟବସାୟୀଙ୍କ ମୃତ୍ୟୁ ହୋଇଛି । ମୃତ ବ୍ୟବସାୟୀ ଜଣଙ୍କ ହେଲେ କଟକ ସିଡିଏ ଅଞ୍ଚଳର ରାଜେଶ କୁମାର ସନ୍ତୁକା । ରାଜେଶଙ୍କ ମୃତଦେହ ଚିହ୍ନଟ ପାଇଁ କଲିକତା ପୋଲିସର କମିଶନରେଟ୍ ପୋଲିସକୁ ଚିଠି ଲେଖିଛି । ମୃତ୍ୟୁ ହୋଇଥିବା ନେଇ ପୋଲିସ ପକ୍ଷରୁ ସୂଚନା ରହିଛି ।
ଗତକାଲି ହୋଟେଲରେ ହଠାତ ନିଆଁ ଲାଗିଯିବା ଫଳରେ ହୋଟେଲରେ ଥିବା ୧୪ଜଣଙ୍କର ମୃତ୍ୟୁ ହୋଇଥିଲା । ସେମାନଙ୍କ ମଧ୍ୟରୁ ଏହି ଚାରି ଜଣ ଓଡ଼ିଆ ଯୁବକଙ୍କ ମୃତ୍ୟୁ ହୋଇଥିବା ଜଣାପଡ଼ିଛି । ଏହି ଘଟଣା ଜାଣିବା ପରେ ମୃତକ ମାନଙ୍କ ପରିବାର ଓ ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଛି ।
ପ୍ରକାଶ ଯେ, ଅଗ୍ନିକାଣ୍ଡର କାରଣ ଜଣାପଡିନାହିଁ । ଘଟଣାର ଖବରପାଇ ତୁରନ୍ତ ଉଦ୍ଧାରକାରୀ ଦଳ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ କରିଥିଲେ । ପୋଲିସ କମିଶନର ମନୋଜ କୁମାର ବର୍ମାଙ୍କ ସୂଚନା ଅନୁସାରେ ଏହି ଅଘଟଣରେ ୧୪ଜଣଙ୍କର ମୃତ୍ୟୁ ହୋଇଥିବାବେଳେ ଏକାଧିକ ଆହତ ହୋଇଛନ୍ତି । କେଉଁ କାରଣକୁ ଏପରି ଭୟଙ୍କର ଅଗ୍ନିକାଣ୍ଡ ହେଲା ତଦନ୍ତ ନେଇ ସ୍ୱତନ୍ତ୍ର ଟିମ୍ ଗଠନ ହେବ ।
କେନ୍ଦ୍ରମନ୍ତ୍ରୀ ତଥା ବିଜେପି ସଭାପତି ସୁକାନ୍ତ ମଜୁମଦାର ସ୍ଥିତି ସମୀକ୍ଷା କରିଥିଲେ । ଅଘଟଣ ନେଇ ଅପଡେଟ୍ ନେଇଥିଲେ । ନିଆଁ ଲାଗିବା ପରେ ଉଦ୍ଧାରକାରୀ ଦଳଙ୍କୁ ତୁରନ୍ତ ଘଟଣାସ୍ଥଳକୁ ଯିବାକୁ ନିର୍ଦ୍ଦେଶ ଦେଇଥିଲେ। ଆହତଙ୍କୁ ଯେପରି ସମସ୍ତ ପ୍ରକାର ଚିକିତ୍ସା ସୁବିଧା ଯୋଗାଇ ଦିଆଯିବ ସେ ନେଇ ମେଡିକାଲ କର୍ତ୍ତୃପକ୍ଷଙ୍କ ସହ ଆଲୋଚନା କରିଥିଲେ । ସେହିଭଳି ଅଘଟଣକୁ ନେଇ କଂଗ୍ରେସ ସଭାପତି ଶୁଭଙ୍କର ଶଙ୍କର କୋଲକାତା କର୍ପୋରେସନ ଉପରେ ବର୍ଷିଛନ୍ତି । ସେ କହିଛନ୍ତି, ''ଏହି ଟ୍ରାଜିକ୍ ଘଟଣା ଅନେକ ଲୋକଙ୍କର ଜୀବନ ନେଇଛି । ଏଠାରେ କୌଣସି ସୁରକ୍ଷା ବ୍ୟବସ୍ଥା ନ ଥିଲା । ମୁଁ ଜାଣିପାରୁନାହିଁ କର୍ପୋରେସନ କରୁଛି କଣ ?''
