ବେଗୁନିଆପଡ଼ା, ୨୨/୦୫: କୋଦଳା ଥାନା ଜେ ରାମପଲ୍ଲୀ ଗାଁରେ ଗୁଳିକାଣ୍ଡ । ବିଳମ୍ବିତ ରାତିରେ ଗୁଳିମାଡ଼ରେ ଭାବିନୀ ରାଉତ ନାମକ ମହିଳା ଗୁରୁତର ହୋଇଛନ୍ତି । ତାଙ୍କୁ ଗୁରୁତର ଅବସ୍ଥାରେ ଏମକେସିଜି ମେଡିକାଲ କଲେଜ ଓ ହସ୍ପିଟାଲରେ ଭର୍ତ୍ତି କରାଯାଇଛି । ଗଞ୍ଜାମ ଜିଲ୍ଲା କୋଦଳା ଥାନା ଅନ୍ତର୍ଗତ ଜେ ରାମପଲ୍ଲୀ ଗାଁରେ ଏବଳି ଘଟଣା ଘଟିଛି ।
ସୂଚନା ମୁତାବକ, ଗାଁର ଜଣେ ଯୁବକ ରାତିରେ ଭାବିନୀଙ୍କ ଛାତରେ ଅନ୍ୟ ଜଣଙ୍କ ଘରକୁ ଯାଉଥିଲେ । ଭାବିନୀ ଏହାକୁ ପ୍ରତିବାଦ କରୁଥିଲେ ଏବଂ ଯୁବକଙ୍କ ପରିବାର ଲୋକଙ୍କୁ କହିଦେଇଥିଲେ । ଏଥିରେ ରାଗି ଯାଇ ସଂପୃକ୍ତ ଯୁବକ ଜଣକ ଆସି ଭାବିନୀଙ୍କୁ ଗୁଳି କରିଥିଲେ । ଯାହା ଫଳରେ ଭାବିନୀଙ୍କ ପେଟରେ ଗୁଳି ବାଜିଛି । ମହିଳାଙ୍କୁ ଏମକେସିଜି ମେଡିକାଲ କଲେଜ ଓ ହସ୍ପିଟାଲରେ ଭର୍ତ୍ତି କରାଯାଇଥିବା ବେଳେ ତାଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ଥିବା ଡାକ୍ତର ପ୍ରକାଶ କରିଛନ୍ତି । ସେପଟେ ଘଟଣା ସମ୍ପର୍କରେ ଖବର ପାଇ ପୁଲିସ ଘଟଣାର ତଦନ୍ତ କରୁଥିବା ବେଳେ ଅଭିଯୁକ୍ତ ଫେରାର ହୋଇଯାଇଛି ।
