ନୂଆଦିଲ୍ଳୀ,୧।୬: ପେଟ୍ରୋଲ ଏବଂ ଡିଜେଲର ମୂଲ୍ୟ ବୃଦ୍ଧି ସହିତ, ବିଶ୍ୱର ଅନେକ ଦେଶ ଶସ୍ତା ଏବଂ ପରିବେଶ ଅନୁକୂଳ ବିକଳ୍ପ ଖୋଜୁଛନ୍ତି। ଇଥାନଲ୍ ଏକ ପ୍ରମୁଖ ବିକଳ୍ପ ଭାବରେ ଉଭା ହୋଇଛି। ଇଥାନଲ୍ ମୁଖ୍ୟତଃ ଆଖୁ, ମକା ଏବଂ ଅନ୍ୟାନ୍ୟ କୃଷି ଉତ୍ପାଦରୁ ପ୍ରସ୍ତୁତ ହୁଏ। ଏହି କାରଣରୁ ଏହାକୁ ଜୈବ ଇନ୍ଧନ ମଧ୍ୟ କୁହାଯାଏ। ବ୍ରାଜିଲ୍ ହେଉଛି ଏପରି ଦେଶ ଯେଉଁଠାରେ ଇଥାନଲ୍-ଆଧାରିତ ଯାନବାହାନ ସର୍ବାଧିକ ଗ୍ରହଣ କରାଯାଇଛି। ସେଠାରେ ୯୦ ପ୍ରତିଶତରୁ ଅଧିକ ନୂତନ କାର ଫ୍ଲେକ୍ସ-ଫୁଏଲ ଟେକ୍ନୋଲୋଜିରେ ଚାଲିଥାଏ, ଅର୍ଥାତ୍ ସେମାନେ ପେଟ୍ରୋଲ ଏବଂ ଇଥାନଲ୍ ଉଭୟରେ ଚାଲିଥାନ୍ତି।
ବ୍ରାଜିଲରେ ୨୦୦୩ ରେ ଫ୍ଲେକ୍ସ-ଫୁଏଲ ଯାନ ପ୍ରଚଳନ କରାଯାଇଥିଲା। ସେହି ସମୟରୁ ଏହି ଟେକ୍ନୋଳୋଜି ଏତେ ଲୋକପ୍ରିୟ ହୋଇଗଲା ଯେ ଆଜି ଅଧିକାଂଶ କାର ଯେକୌଣସି ଅନୁପାତରେ ପେଟ୍ରୋଲ ଏବଂ ଇଥାନଲର ମିଶ୍ରଣରେ ଚାଲିପାରିବ। ଅନେକ ଯାନ ୧୦୦% ଇଥାନଲ (E100) ଉପରେ ଭଲ ଭାବରେ ଚାଲିଥାଏ। ବ୍ରାଜିଲ ସରକାର ତେଲ ଆମଦାନୀ ଉପରେ ନିର୍ଭରଶୀଳତା ହ୍ରାସ କରିବା ପାଇଁ ବର୍ଷ ବର୍ଷ ପୂର୍ବରୁ ଇଥାନଲକୁ ପ୍ରୋତ୍ସାହିତ କରିବା ଆରମ୍ଭ କରିଥିଲେ। ଆଖୁର ବୃହତ୍ତ ଉତ୍ପାଦନ ଏବଂ ମଜବୁତ ଇଥାନଲ ଉଦ୍ୟୋଗ କାରଣରୁ ଏହି ପଦକ୍ଷେପ ସଫଳ ହୋଇଛି। ଆଜି ବ୍ରାଜିଲ ବିଶ୍ୱର ସର୍ବବୃହତ ଫ୍ଲେକ୍ସ-ଫୁଏଲ ବଜାର ପାଲଟିଛି।
ଫ୍ଲେକ୍ସ-ଫୁଏଲ ଗାଡିର ଲାଭ
ଫ୍ଲେକ୍ସ-ଫୁଏଲ ଯାନର ସବୁଠାରୁ ବଡ଼ ସୁବିଧା ହେଉଛି ଯେ ଗ୍ରାହକମାନେ ସୁବିଧା ଏବଂ ମୂଲ୍ୟ ଆଧାରରେ ଇନ୍ଧନ ବାଛିପାରିବେ। ଯଦି ଇଥାନଲ୍ ଶସ୍ତା ହୁଏ, ତେବେ ଡ୍ରାଇଭରମାନେ ଅଧିକ ଇଥାନଲ୍ ବ୍ୟବହାର କରିପାରିବେ, ଏବଂ ଯଦି ପେଟ୍ରୋଲ୍ ଅଧିକ ସୁଲଭ ହୁଏ, ତେବେ ସେମାନେ ଏହାର ବ୍ୟବହାର ବୃଦ୍ଧି କରିପାରିବେ। ଏହା ବିଦେଶୀ ତେଲ ଉପରେ ନିର୍ଭରଶୀଳତା ହ୍ରାସ କରେ ଏବଂ ସ୍ଥାନୀୟ କୃଷି କ୍ଷେତ୍ରକୁ ମଧ୍ୟ ଲାଭ ଦିଏ, କାରଣ ଚାଷୀଙ୍କ ଫସଲରୁ ଇଥାନଲ୍ ଉତ୍ପାଦିତ ହୁଏ।
ସରକାର ଦେଉଛନ୍ତି ପ୍ରୋତ୍ସାହନ
ଇଥାନଲର ମଧ୍ୟ କିଛି କ୍ଷତି ରହିଛି। ଏହାର ଶକ୍ତି କ୍ଷମତା ପେଟ୍ରୋଲରୁ କମ୍ ହୋଇଥାଏ, ତେଣୁ ଇଥାନଲ୍ରେ ଚାଲୁଥିବା କାରର ମାଇଲେଜ୍ ବି କମ୍ ରହିଥାଏ। ଏକ୍ସପର୍ଟଙ୍କ କହିବା ଅନୁସାରେ, ଇଥାନଲ୍ ର ଉପଯୋଗ ଯେତେବେଳେ ଅଧିକ ଲାଭଦାୟକ ଳହେବ ଯେତେବେଳେ ଏହାର ଦାମ୍ ପେଟ୍ରୋଲ ତୁଳନାରେ ଖୁବ୍ କମ୍ ହେବ। ବ୍ରାଜିଲରେ ମଧ୍ୟ କଷ୍ଟମର ଦାମ୍ ଦେଖି ଧାର୍ଯ୍ୟ କରିଥାନ୍ତି ତାଙ୍କୁ ଗାଡିରେ ପେଟ୍ରୋଲ ପକାଇବାର ଅଛି ନା ଇଥାନଲ୍। ଏବେ ଭାରତ ମଧ୍ୟ ଏଦିଗରେ ଦ୍ରୁତ ଗତିରେ ଆଗକୁ ବଢୁଛି। କେନ୍ଦ୍ର ସରକାର ଇଥାନଲ୍ ମିକ୍ସ ଫୁଏଲକୁ ପ୍ରୋତ୍ସାହନ ଦେଉଛନ୍ତି ଓ ଫ୍ଲେକ୍ସ-ଫୁଏଲକୁ ପ୍ରୋତ୍ସାହନ ଦେଉଛନ୍ତି। ଫ୍ଲେକ୍ସ-ଫୁଏଲ ଗାଡି ତିଆରି କରିବାକୁ ମଧ୍ୟ ଜୋର ଦେଉଛନ୍ତି। ନିକଯରେ କିଛି ବର୍ଷରେ ବହୁ ବାହନ କମ୍ପାନୀ ଏଭଳି ମଡେଲ୍ ବାହାର କରିଛନ୍ତି, ଯାହାକି ଇଥାନଲ୍ ମିଶ୍ରଣରେ ତିଆରି ଫୁଏଲରେ ଚାଲିପାରିବ। ସରକାରଙ୍କ ଉଦେଶ୍ୟ ପେଟ୍ରୋଲିୟମ୍ ଆମଦାନୀକୁ କମ୍ କରିବା, ପ୍ରଦୂଷଣ ହ୍ରାସ କରିବା ଓ କୃଷକଙ୍କ ଆୟ ବଢାଇବା।
