ନୂଆଦିଲ୍ଲୀ ୨୯/ ୦୬: ମହାରାଷ୍ଟ୍ର ରାଜନୀତିରେ ଜାରି ରହିଥିବା ତମ୍ବିତୋଫାନ ନୂଆ ମୋଡ ନେଇଛି । ସଂଖ୍ୟା ଗରିଷ୍ଠତା ପ୍ରମାଣ ଦେବାକୁ ସୁପ୍ରିମକୋର୍ଟରେ ହୋଇଥିବା ଆବେଦନ ଉପରେ ଗୁରୁତ୍ବପୂର୍ଣ୍ଣ ରାୟ ପ୍ରକାଶ ପାଇଛି । ବିଜେପି ପକ୍ଷରୁ ରାଜ୍ୟପାଳଙ୍କୁ ଭେଟି ଗୃହରେ ସଂଖ୍ୟା ଗରିଷ୍ଠତା ପ୍ରମାଣ କରିବାକୁ ଦାବି କରିଥିଲା । ଯାହାକୁ ନେଇ ସୁପ୍ରିମକୋର୍ଟରେ ପହଞ୍ଚିଥିଲା । ତେବେ କୋର୍ଟ ଏହାର ଶୁଣାଣି କରି କହିଛନ୍ତି, 'ଆସନ୍ତାକାଲି ହିଁ ମହାରାଷ୍ଟ୍ର ବିଧାନସଭାରେ ଫ୍ଳୋର ଟେଷ୍ଟ ହେଉ'। ସୁପ୍ରିମକୋର୍ଟଙ୍କ ଦ୍ବାରା ଜଷ୍ଟିସ୍ ସୂର୍ଯ୍ୟକାନ୍ତ ଏବଂ ଜଷ୍ଟିସ୍ ଜେ. ବି ପାରଡିଓ୍ବାଲାଙ୍କୁ ନେଇ ଗଠିନ ବେଞ୍ଚ ଏହି ଗୁରୁତ୍ବପୂର୍ଣ୍ଣ ରାୟ ଶୁଣାଇଛନ୍ତି ।
ଗୁରୁବାର ହେବାକୁ ଥିବା ଫ୍ଲୋର ଟେଷ୍ଟରେ ଯାହା ବି ଫଳାଫଳ ବାହାରିବ ତାହା ହିଁ ଚୂଡାନ୍ତ ବୋଲି ସୁପ୍ରିମକୋର୍ଟ କହିଛନ୍ତି । ପୂର୍ବରୁ ରାଜ୍ୟପାଳ ମଧ୍ୟ ଗୃହରେ ସଂଖ୍ୟା ଗରିଷ୍ଠତା ପ୍ରମାଣ ଦେବାକୁ କହିଥିଲେ । କିନ୍ତୁ ଏହାକୁ ବେଆଇନ ଦର୍ଶାଇ ସୁପ୍ରିମକୋର୍ଟଙ୍କ ଆଶ୍ରୟ ନେଇଥିଲେ ଶିବସେନା ମୁଖ୍ୟ ସଚେତକ ସୁନୀଲ ପ୍ରଭୁ । ସୁନୀଲଙ୍କ ଦ୍ବାରା କୋର୍ଟରେ ଦାଖଲ ହୋଇଥିବା ପିଟିସନ୍ ଉପରେ ଶୁଣାଣି କରି ଏଭଳି ରାୟ ଶୁଣାଇଛନ୍ତି କୋର୍ଟ । ସୁପ୍ରିମକୋର୍ଟଙ୍କ ଦୁଇ ଜଣିଆ ବେଞ୍ଚ କହିଛନ୍ତି, 'ଆସନ୍ତାକାଲି ଅର୍ଥାତ ଗୁରୁବାର ମହାରାଷ୍ଟ୍ର ବିଧାନସଭାରେ ସଂଖ୍ୟା ଗରିଷ୍ଠତା ପରୀକ୍ଷା କରାଯିବ । ଏଥିରେ ଯାହା ବି ଫଳାଫଳା ବାହାରିବ ତାହା ହିଁ ଚୂଡାନ୍ତ' ।