ନୂଆଦିଲ୍ଲୀ: ବିହାର ନିର୍ବାଚନକୁ ନେଇ ଏକ ବଡ଼ ଖବର ଏବେ ସାମ୍ନାକୁ ଆସିଛି। ବିହାରର ପ୍ରସିଦ୍ଧ ଫୋକ୍ ସିଙ୍ଗର ମୈଥିଳୀ ଠାକୁର ବିହାର ବିଧାନସଭା ନିର୍ବାଚନ ଲଢ଼ିପାରନ୍ତି। ସେ ବିଜେପି ରାଷ୍ଟ୍ରୀୟ ସାଧାରଣ ସମ୍ପାଦକ ବିନୋଦ ତାୱଡେ ଏବଂ ଗୃହ ରାଜ୍ୟମନ୍ତ୍ରୀ ନିତ୍ୟାନନ୍ଦ ରାୟଙ୍କୁ ଭେଟି ଏହି କଳ୍ପନାଜଳ୍ପନା ସୃଷ୍ଟି କରିଛନ୍ତି। ଏହା ମଧ୍ୟ ବିଶ୍ୱାସ କରାଯାଉଛି ଯେ, ମୈଥିଳୀ ଦରଭଙ୍ଗାର ଏକ ଆସନରୁ ନିର୍ବାଚନ ଲଢ଼ିପାରନ୍ତି।
ଏନେଇ ବିନୋଦ ତାୱଡେ ଅକ୍ଟୋବର ୫ ତାରିଖରେ ତାଙ୍କ X ହ୍ୟାଣ୍ଡେଲରେ ପୋଷ୍ଟ କରି କହିଛନ୍ତି ଯେ,୧୯୯୫ ରେ ବିହାରରେ ଲାଲୁ ରାଜ୍ ଆରମ୍ଭ ହେବା ପରେ ଯେଉଁ ପରିବାର ବିହାର ଛାଡି ଚାଲି ଯାଇଥିଲେ, ସେହି ପରିବାରର ଝିଅ ସୁପ୍ରସିଦ୍ଧ ଗାୟିକା ମୈଥିଳି ଠାକୁର୍ ଜୀ ପରିବର୍ତ୍ତନଶୀଳ ବିହାରକୁ ଦେଖି ପୁଣିଥରେ ବିହାର ଫେରିବାକୁ ମନ କରିଛନ୍ତି । ଆଜି ଗୃହ ରାଜ୍ୟମନ୍ତ୍ରୀ ନିତ୍ୟାନନ୍ଦ ରାୟ ଏବଂ ମୁଁ ତାଙ୍କୁ ଅନୁରୋଧ କରିଛୁ ଯେ, ବିହାରର ସାଧାରଣ ଲୋକ ତାଙ୍କ ଠାରୁ ବିହାରର ଲୋକଙ୍କ ଏବଂ ଏହାର ବିକାଶରେ ଯୋଗଦାନ ପାଇବାକୁ ଆଶା କରନ୍ତି ଏବଂ ସେ ସେମାନଙ୍କ ଆଶା ପୂରଣ କରିବା ଉଚିତ। ବିହାରର ଝିଅ ମୈଥିଳୀ ଠାକୁରଙ୍କୁ ଶୁଭକାମନା!"
ଏବେ ଆସନ୍ତୁ ଜାଣିବା ମୈଥିଳୀ ଠାକୁର କିଏ?
ମୈଥିଳୀ ଠାକୁର ଜଣେ ପ୍ରସିଦ୍ଧ ଗାୟିକା, ଯିଏ ମୁଖ୍ୟତଃ ଶାସ୍ତ୍ରୀୟ ସଙ୍ଗୀତ, ଲୋକ ଗୀତ, ଭଜନ ଏବଂ ଭୋଜପୁରୀ ଗୀତ ପାଇଁ ଜଣାଶୁଣା। ତାଙ୍କର ଜନ୍ମ ୨୫ ଜୁଲାଇ ୨୦୦୦ ରେ ବିହାରର ମଧୁବଣୀ ଜିଲ୍ଲାର ବେନିପଟ୍ଟିରେ ହୋଇଥିଲା। ତାଙ୍କ ବାପା ରମେଶ ଠାକୁର ଜଣେ ସଙ୍ଗୀତ ଶିକ୍ଷକ ଏବଂ ତାଙ୍କ ମାଆ ଭାରତୀ ଠାକୁର ଜଣେ ଗୃହିଣୀ।
ମୈଥିଳୀ ପିଲାଦିନରୁ ସଙ୍ଗୀତ ପ୍ରତି ସମର୍ପିତ, ଏବଂ ତାଙ୍କ ଦୁଇ ସାନ ଭାଇ, ରିଷଭ ଏବଂ ଆୟାଚି ମଧ୍ୟ ତାଙ୍କ ସହିତ ପ୍ରଦର୍ଶନ କରନ୍ତି। ମୈଥିଳୀ ୨୦୧୭ ମସିହାରେ ଜୀ ଟିଭିର "ଲିଟିଲ୍ ଚାମ୍ପସ୍" ଏବଂ "ରାଇଜିଂ ଷ୍ଟାର" ସମେତ ଅନେକ ଟେଲିଭିଜନ କାର୍ଯ୍ୟକ୍ରମରେ ମଧ୍ୟ ଦେଖାଦେଇଛନ୍ତି। ଏହା ବ୍ୟତୀତ ତାଙ୍କୁ ସୋସିଆଲ ମିଡିଆରେ ମଧ୍ୟ ଅନେକ ଫ୍ୟାନ୍ ଫଲୋଇଙ୍ଗ୍ ମିଳେ।
ମୈଥିଳୀ ତାଙ୍କର ନମ୍ର ଏବଂ ନିରବ ଗାୟନ ପାଇଁ ଜଣାଶୁଣା। ସେ ପାରମ୍ପରିକ ଗୀତ ଗାଇଥାନ୍ତି କିନ୍ତୁ ବଲିଉଡରୁ ଦୂରତା ବଜାୟ ରଖନ୍ତି। ତାଙ୍କୁ ୨୦୨୧ ମସିହାରେ ସଙ୍ଗୀତ ନାଟକ ଏକାଡେମୀର ଉସ୍ତାଦ ବିସମିଲ୍ଲାହ ଖାନ ଯୁବ ପୁରସ୍କାର, ଲୋକମତ ସୁର ଜ୍ୟୋତ୍ସ୍ନା ଜାତୀୟ ସଙ୍ଗୀତ ପୁରସ୍କାର ଏବଂ ୨୦୨୪ ମସିହାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କଠାରୁ ଜାତୀୟ ସୃଷ୍ଟିକର୍ତ୍ତା ପୁରସ୍କାର ସମେତ ଅନେକ ପୁରସ୍କାରରେ ସମ୍ମାନିତ କରାଯାଇଛି। ଯଦି ସେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରନ୍ତି, ତେବେ ସେ ଦଳ ପାଇଁ ଲାଭଦାୟକ ସାବ୍ୟସ୍ତ ହୋଇପାରନ୍ତି।
