ନୂଆଦିଲ୍ଲୀ ୧୯/ ୧: ବିଶ୍ବର ବଡ ବଡ କମ୍ପାନୀ ଏବେ କର୍ମଚାରୀଙ୍କ ଛଟେଇ ଆରମ୍ଭ କରିଦେଇଛନ୍ତି । ସମ୍ଭାବ୍ୟ ଆର୍ଥିକ ମାନ୍ଦାବସ୍ଥାକୁ ଦୃଷ୍ଟିରେ ରଖି କମ୍ପାନୀଗୁଡିକ ଆଗୁଆ ଛଟେଇ କରିବାରେ ଲାଗିପଡିଲେଣି । ମେଟାରୁ ଆରମ୍ଭ କରି ଟ୍ବିଟର୍‌ ଏବଂ ଆମାଜନ ଠାରୁ ମାଇକ୍ରୋସଫ୍ଟ ଯାଏଁ, ବଡ ବଡ କମ୍ପାନୀ ଏବେ କର୍ମଚାରୀଙ୍କୁ ବିଦା କରୁଛନ୍ତି । ଏହି କ୍ରମରେ ଏବେ ଜୋମାଟୋ ମଧ୍ୟ ସାମିଲ ହୋଇଛି । ଖର୍ଚ୍ଚ କମାଇବା ପାଇଁ କମ୍ପାନୀ ପକ୍ଷରୁ କର୍ମଚାରୀଙ୍କୁ ବାହାର କରାଯାଉଛି ।

ଫୁଡ୍‌ ଅର୍ଡରିଂ ଆପ୍‌ Zomato ତାର ମୋଟ କର୍ମଚାରୀଙ୍କ ମଧ୍ୟରୁ ୩ପ୍ରତିଶତଙ୍କୁ ବିଦା କରିବାକୁ ଯାଉଛି । ଯାହା ଦ୍ବାରାକି ୧୦୦ରୁ ଉର୍ଦ୍ଧ୍ବ କର୍ମଚାରୀ ପ୍ରଭାବିତ ହେବେ । ଦେଶବ୍ୟାପୀ ଜୋମାଟୋର ଥିବା ମୋଟ ୩୮୦୦ କର୍ମଚାରୀଙ୍କ ମଧ୍ୟରୁ କିଛିଙ୍କର ଚାକିରି ଯିବ । ଏ ନେଇ କମ୍ପାନୀର ଜଣେ ଅଧିକାରୀ ସୂଚନା ଦେଇଛନ୍ତି । ଜୋମାଟୋର ସହ-ପ୍ରତିଷ୍ଠାତା ମୋହିତ ଗୁପ୍ତା ଶୁକ୍ରବାର ନିଜ ପଦରୁ ଇସ୍ତଫା ଦେଇଛନ୍ତି ।

ସୂଚନାଯୋଗ୍ୟ, ଖାଦ୍ୟ ଡେଲିଭରୀ ଆପ୍‌ ଜୋମାଟୋ ଲଗାତାର ଭାବେ କ୍ଷତି ସହିଆସୁଛି । ଚଳିତ ବର୍ଷର ଦ୍ବିତୀୟ ତ୍ରୈମାସିକରେ କମ୍ପାନୀର କ୍ଷତି ପ୍ରାୟ ୩ କୋଟି ଟଙ୍କାରୁ ଅଧିକ ହୋଇଥିଲା । ସେହି ତୁଳନାରେ ଗୋଟିଏ ଆର୍ଥିକ ବର୍ଷରେ କମ୍ପାନୀର କ୍ଷତି ୫ କୋଟି ୨୭ ଲକ୍ଷ ଟଙ୍କା ହୋଇସାରିଲାଣି। ଯାହାକୁ ନେଇ କମ୍ପାନୀ କର୍ତ୍ତୃପକ୍ଷ ଚିନ୍ତାରେ । ବାଧ୍ୟହୋଇ କର୍ମଚାରୀଙ୍କୁ ବିଦା କରାଯାଉଥିବା ଜଣେ ଅଧିକାରୀ ସୂଚନା ଦେଇଛନ୍ତି ।

ଏହା ପ୍ରଥମ ଥର ପାଇଁ ନୁହେଁ ପୂର୍ବରୁ ମଧ୍ୟ କର୍ମଚାରୀଙ୍କୁ ବାହାର କରିଥିଲା ଜୋମାଟୋ । ଗତ ୨୦୨୦ ମେ ମାସରେ ୧୩ ପ୍ରତିଶତ ଅର୍ଥାତ ଏକାବେଳେ ୫୨୦ ଜଣଙ୍କୁ ବିଦା କରିଥିଲା କମ୍ପାନୀ ।