ଭୁବନେଶ୍ଵର, ୨୮/୦୪ : ବାଲେଶ୍ୱର ଜିଲ୍ଲା ନୀଳଗିରି କୂଲଡ଼ିହା ଅଭୟାରଣ୍ୟରେ ଶିକାରୀ ଓ ବନ କର୍ମଚାରୀ ମୁହାଁମୁହିଁ। ଶିକାରୀ ଆକ୍ରମଣରେ ବନ କର୍ମଚାରୀ ଆହତ। ଜଣେ ଶିକାରୀ ଗିରଫ। ଅନ୍ୟ ଜଣେ ଫେରାର୍।
ସୂଚନାନୁଯାୟୀ, ସନ୍ତରାଗଡ଼ିଆ ବିଟ୍ ଅଧିନ ଗୁଡ଼ିଖାଣିଆ ଅଞ୍ଚଳରେ କିଛି ଶିକାରୀ ଅଭୟାରଣ୍ୟ ଭିତରକୁ ପ୍ରବେଶ କରିବା ନେଇ ବନ ବିଭାଗକୁ ଖବର ମିଳିଥିଲା। ଏସିଏଫ ସୁବ୍ରତ ବେହେରା ପଞ୍ଚଲିଙ୍ଗେଶ୍ୱର ଫରେଷ୍ଟର ଭାଗ୍ୟଶ୍ରୀ ଦ୍ଵିବେଦୀଙ୍କୁ ତୁରନ୍ତ ଚଢ଼ାଉ କରିବା ପାଇଁ ନିର୍ଦ୍ଦେଶ ଦେଇଥିଲେ। ଜାମ୍ବଦା ଅଞ୍ଚଳର ମାଧ ସିଂ ଓ ଶିବ ସିଂ ବନ୍ଧୁକ ଧରି ଆସୁଥିବା ବେଳେ ବନ କର୍ମଚାରୀ ତାଙ୍କୁ ଅଟକାଇଥିଲେ। ହେଲେ ଶିକାରୀ ମାଧ ସିଂ ବନକର୍ମଚାରୀ ମହେଶ୍ବର ବେହେରାଙ୍କୁ ବନ୍ଧୁକରେ ମୁଣ୍ଡକୁ ଆଘାତ କରିଥିଲା। ମାଧ ସିଂକୁ କାବୁ କରାଯାଇଥିବା ବେଳେ ଶିବ ସିଂ ଫେରାର ହୋଇଯାଇଥିଲା। ଖବର ପାଇ ଏସିଏଫ ଘଟଣାସ୍ଥଳକୁ ଯାଇଥିଲେ।
