ରାଞ୍ଚି: ଝାଡ଼ଖଣ୍ଡ ଧନବାଦ୍ ଜିଲ୍ଲାରେ ସିଆଇଏସଏଫ ଯବାନ ଓ କୋଇଲା ଚୋରଙ୍କ ମଧ୍ୟରେ ଗୁଳି ବିନିମୟ ହୋଇଛି। ଏଥିରେ ପ୍ରାୟ ୪ ଜଣ କୋଇଲା ଚୋରଙ୍କ ମୃତ୍ୟୁ ହୋଇଥିବା ବେଳେ ୬ ଜଣ ଆହତ ହୋଇଛନ୍ତି। ଏନେଇ ରବିବାର ପୁଲିସ ସୂଚନା ଦେଇଛି। ଜଣେ ଅଧିକାରୀ କହିଛନ୍ତି, ରାଜଧାନୀ ରାଞ୍ଚିଠାରୁ ୨୦୦ କିଲୋମିଟର ଦୂରରେ ଥିବା ଧାନବାଦ୍‌ ବାଘମାରା ପୁଲିସ ଥାନା ଅଞ୍ଚଳରେ ଏହି ଗୁଳିବିନିମୟ ଘଟିଛି। ସେଠାରେ ଥିବା ବେନିଡିହ କୋଇଲା ସାଇଡିଂରେ ଶନିବାର ବିଳମ୍ବିତ ରାତି ୧୨ ଟା ୩୦ ସମୟରେ ସିଆଇଏସଏଫ ଯବାନ ଏବଂ କୋଇଲା ଚୋରଙ୍କ ମଧ୍ୟରେ ଗୁଳି ବିନିମୟ ହୋଇଥିଲା।  

ଧନବାଦ ଥାନା ଅଧିକାରୀ ରିସମା ରେମଶନ ‘ପିଟିଆଇ-ଭାଷା’କୁ ସୂଚନା ଦେଇଛନ୍ତି ଯେ ବିନିଡିହ  କୋଇଲା ସାଇଡିଂରେ କୋଇଲା ଚୋରମାନେ ଏକତ୍ରିତ ହୋଇଥିବା ସୂଚନା ସିଆଇଏସଏଫକୁ ମିଳିଥିଲା। ଏହାପରେ ସିଆଇଏସଫ ଯାବାନମାନେ ଘଟଣାସ୍ଥଳରେ ପହଞ୍ଚି କୋଇଲା ଚୋରଙ୍କୁ ଅଟକାଇବାକୁ ଚେଷ୍ଟା କରିଥିଲେ। ହେଲେ କୋଇଲା ଚୋରମାନେ ଯବାନଙ୍କ ଉପରେ ଗୁଳି ଚାଳନା କରିବା ସହ ପଥର ମାଡ଼ କରିଥିଲେ। ଫଳରେ ଯବାନମାନେ ମଧ୍ୟ ପାଲଟା ଗୁଳି ଚାଳନା କରିଥିଲେ।   

ରେମଶନ କହିଛନ୍ତି, ଏହି ଗୁଳି ବିନିମୟରେ ୪ ଜଣ କୋଇଲା ଚୋରଙ୍କ ମୃତ୍ୟୁ ହୋଇଛି। ଏହାସହ ଅନ୍ୟ ୬ ଜଣ ଗୁରୁତର ହୋଇଛନ୍ତି। ସେମାନଙ୍କୁ ନିକଟରେ ଥିବା ଏକ ହସ୍ପିଟାଲରେ ଭର୍ତ୍ତି କରାଯାଇଛି। ସେ କହିଛନ୍ତି ଯେ ଆହତଙ୍କ ମଧ୍ୟରୁ ଦୁଇ ଜଣଙ୍କ ଅବସ୍ଥା ଗମ୍ଭୀର ରହିଛି। ଏବଂ ଆଉ  ୪ ଜଣଙ୍କ ଅବସ୍ଥା ସ୍ଥିର ରହିଛି।