ଭୁବନେଶ୍ୱର,୨୮/୧୧: ଗଣ୍ଡମୁଣ୍ଡାରୁ ଜାଗମରା ଛକରେ ବଡ଼ ବଡ଼ ଗାତ ଖୋଳା ହେଉଛି । ଟିକେ ଅନ୍ୟମନସ୍କ ହେଲେ ସିଧା ୫ଫୁଟ ତଳେ। ରାସ୍ତାରେ କାଦୁଅ ପାଣି ଭାସୁଛି । ସକାଳେ ସନ୍ଧ୍ୟାରେ ଟ୍ରାଫିକ୍ ଭିଡ଼ରେ ପଶି ଗାଡ଼ି ଚାଳକ ଅଣନିଶ୍ୱାସୀ । ଗଣ୍ଡମୁଣ୍ଡାରୁ ଖଣ୍ଡଗିରି ଦେଢ଼ କିମି ପାରିହେବାକୁ ଘଣ୍ଟାଏରୁ ଅଧିକ ସମୟ ଲାଗୁଛି । ଘରୋଇ ବିଦ୍ୟୁତ୍ ବିତରକ ସଂସ୍ଥାର ମନଇଚ୍ଛା ରାସ୍ତା ଖୋଳାକୁ ନେଇ ନାକେଦମ ହେଲେଣି ଖଣ୍ଡଗିରି ବାସିନ୍ଦା । ଯିଏ ପାରିଲା ମନଇଚ୍ଛା ରାସ୍ତାକୁ ଖୋଳିଲା । ବିଏମ୍ସି ଅନୁମୋଦନ ଦେଇ ଅଚିନ୍ତାରେ ବସିଛି । ଘରୋଇ ବିଦ୍ୟୁତ୍ ସଂସ୍ଥା ପକ୍ଷରୁ ଭୂ-ତଳରେ ବିଦ୍ୟୁତ୍ ତାର ବିଛା ହେଉଛି । ଗଣ୍ଡମୁଣ୍ଡାରୁ ଖଣ୍ଡିଗିରି ପର୍ଯ୍ୟନ୍ତ ରାସ୍ତାକୁ ଖୋଳାଯାଉଛି । ଫଳରେ ଏବେ ସମସ୍ୟା ଉପୁଜୁଛି । ଭିଡ଼କୁ ଦୃଷ୍ଟିରେ ରଖି ଉକ୍ତ ସଂସ୍ଥାକୁ କେବଳ ରାତିରେ କାମ କରିବାକୁ ଅନୁମତି ମିଳିଛି । ହେଲେ ଏହି ନିୟମକୁ ଫୁରେ ଉଡ଼ାଇ ସଂପୃକ୍ତ ସଂସ୍ଥା ଦିନ ବେଳା ବି କାମ କରୁଛି । କାମରେ କୌଣସି ତାଳମେଳ ରହୁନି । ଏ ଛକରେ ବିରାଟ ଗାତ ଖୋଳିଲେଣି ତ ପୁଣି ୧୦-୨୦ ଫୁଟ ଛାଡ଼ି ଆଉ ଗୋଟେ । ଏମିତି ଖଣ୍ଡଗିରିରୁ ଗଣ୍ଡମୁଣ୍ଡା ଭିତରେ ପ୍ରାୟ ୨୦ରୁ ଅଧିକ ବଡ ଗାତ ଖୋଳିଛନ୍ତି । ସେଥିରେ ପୁଣି କେଉଁଠି ସୁରକ୍ଷା ବାଡ଼ ଦେଖାଯାଉନି । ରାସ୍ତା ଖୋଳି କାମ ସାରିବା ପରେ ଅଧା ପୋତି ଫେରାର । ଫଳରେ ପ୍ରତିଦିନ ଛୋଟମୋଟ ଦୁର୍ଘଟଣା ଘଟୁଛି ।
ଖଣ୍ଡଗିରି ରାସ୍ତାରେ ଏୟାରପୋର୍ଟ ଏବଂ ପୋଖରୀପୁଟକୁ ଯୋଡ଼ି ହୋଇଥିବାରୁ ଦୈନିକ ହଜାର ହଜାର ଗାଡ଼ି ଏହି ରାସ୍ତା ଦେଇ ଚଳପ୍ରଚଳ କରୁଛି । ସକାଳ ୧୦ଟାରୁ ୧୨ଟା ଏବଂ ସନ୍ଧ୍ୟାରେ ଟ୍ରାଫିକ୍ ଭିଡ଼ ହେଉଛି । ଗାଡ଼ିମୋଟରର ଲମ୍ବା ଲାଇନ୍ ଲାଗୁଛି । ସ୍ଥିତି ଏପରି ଯେ ମାତ୍ର ଦେଢ଼ କିମି ରାସ୍ତାକୁ ପାର ହେବାକୁ ଘଣ୍ଟାଏରୁ ଅଧିକ ସମୟ ଲାଗୁଛି । ଭିଡ଼ ନିୟନ୍ତ୍ରଣ ପାଇଁ ଟ୍ରାଫିକ ପୁଲିସର ଦେଖା ମିଳୁନି । ଆମ୍ବୁଲାନ୍ସ, ଅଗ୍ନିଶମ ଗାଡି ଫସି ରହୁଛି । ଖାଲି ଏତିକି ନୁହେଁ, ଷ୍ଟ୍ରିଟ୍ ଲାଇଟ୍ ବି ଜଳୁନି । ମାସେ ହେଲା ଖରାପ ରହିଛ । ରାସ୍ତା ଗାତ ଓ ବ୍ୟାରିକେଡ୍ ଦେଖାଯାଉନି । ଯଦି ରାତିବେଳା ଗାଡ଼ିରେ ଆସିଲେ ଦୁର୍ଘଟଣା ହେବା ନିଶ୍ଚିତ । ବଡ଼ ଧରଣର ଦୁର୍ଘଟଣା ପାଇଁ ଜନଜୀବନ ହାନି ହେବା ସମ୍ଭାବନା ରହୁଛି ।
ଖାଲି ଏହି ସ୍ଥାନ ନୁହେଁ, ଚନ୍ଦ୍ରଶେଖରପୁର, ପୁରୁଣା ଭୁବନେଶ୍ୱର, ରସୁଲଗଡ ଭଳି ଅଞ୍ଚଳରେ ବି ଗାତ ଖୋଳା ହେଉଛି । ରାସ୍ତା ଉପରେ ମେସିନ୍ ରଖି ଠିକା ସଂସ୍ଥା ଛୁ ମାରୁଛି । ଫଳରେ ଭିଡ ବଢୁଛି । ରାଜଧାନୀକୁ ଖୋଳିତାଜି ଛାରଖାର କଲେଣି । ହେଲେ ବିଏମ୍ସି ହାତବାନ୍ଧି ବସିଛି । ମନଇଚ୍ଛା ଖୋଳତାଡ ଉପରେ ବିଏମ୍ସି ରୋକ ଲଗାଇଥିଲା । ଜରୁରୀ ନଥିଲେ ଖୋଳିବା ଅନୁମୋଦନ ଦିଆଯିବନି ବୋଲି ନିଷ୍ପତ୍ତି ହୋଇଥିଲା । ଖାଲି ଏତିକି ନୁହେଁ, ବିଏମ୍ସିର ବିନା ଅନୁମୋଦନରେ ଖୋଳତାଡ଼ କଲେ କାର୍ଯ୍ୟାନୁଷ୍ଠାନ ନେବାକୁ କୁହାଯାଇଥିଲା । ବିଏମ୍ସିର ବାରଣ ସତ୍ତେ୍ୱ ସଂସ୍ଥା କିପରି ରାସ୍ତା ଖୋଳିଲା । ଏହାକୁ କିଏ ଅନୁମୋଦନ ଦେଲା । ଯାହାକୁ ନେଇ ପ୍ରଶ୍ନ ଉଠଛି ।
ଏ ସମ୍ପର୍କରେ ମେୟର ସୁଲୋଚନା ଦାସ କହିଛନ୍ତି, ଝଡ଼ପବନରୁ ରକ୍ଷା ପାଇଁ ଭୂ-ତଳ ବିଦ୍ୟୁତ୍ ତାର ବିଛା ହେଉଛି । ଆମେ ସଂପୃକ୍ତ ଘରୋଇ ସଂସ୍ଥାକୁ ତାଗିଦ କରିଛୁ । ଦିନ ବେଳା କାମ ନ କରିବାକୁ ନିଷ୍ପତ୍ତି ହୋଇଛି । ରାସ୍ତାକୁ ତୁରନ୍ତ ମରାମତି କରିବାକୁ ନିର୍ଦ୍ଦେଶ ଦେଇଛୁ। ଯଦି ଏହାକୁ ଖିଲପ କରାଯାଏ, ତାହାଲେ ଅନୁମତି ବାତିଲ କରାଯିବ ।
