ଭୁବନେଶ୍ୱର, ୨।୧୦: ରାଜ୍ୟ ସଂଗ୍ରହାଳୟ ଭିତରେ ରହିଛି ଗାନ୍ଧୀ ଗ୍ୟାଲେରୀ । ମହାତ୍ମାଗାନ୍ଧୀ ଓଡ଼ିଶା ଗସ୍ତ ସମୟରେ କେଉଁଠି ରହିଥିଲେ, କେଉଁମାନଙ୍କୁ ଭେଟିଥିଲେ, କେଉଁଠି ସଭା ହୋଇଥିଲା । ସେହିସବୁ ଏହି ଗ୍ୟାଲେରୀ ବୁଲି ଦେଖିଲେ ଜାଣିହେବ । ଗାନ୍ଧିଜୀଙ୍କ ସହ ଓଡ଼ିଶାବାସୀ ଥିବା ଏହି ଫଟୋଚିତ୍ରରେ ଗାନ୍ଧିଜୀଙ୍କ ଓଡ଼ିଶା ଗସ୍ତର ବିଭିନ୍ନ ଘଟଣାକୁ କଏଦ କରାଯାଇଛି ଯାହାକୁ ଦେଖିଲେ ତାଙ୍କ ଗସ୍ତ ସମୟର ସବୁ ଘଟଣା ଜାଣିବାର ସୁଯୋଗ ମିଳିବ । ରାଜ୍ୟ ସଂଗ୍ରହାଳୟ ପରିଦର୍ଶନ କଲେ ପର୍ଯ୍ୟଟକ ମହାତ୍ମାଗାନ୍ଧୀ ଏବଂ ତାଙ୍କର ଓଡ଼ିଶା ଗସ୍ତ ବିଷୟରେ ଜାଣିହେବ । ଗାନ୍ଧୀ ଗ୍ୟାଲେରୀରେ ପ୍ରବେଶ କରିବା ମାତ୍ରେ ସାବରମତୀ ଆଶ୍ରମର ଅନୁଭବ ମିଳିବ । କୁଡ଼ିଆ ଘରେ ଗାନ୍ଧୀ ଚରଖରେ ସୂତା କାଟୁଥିବାର ଦୃଶ୍ୟ ଦେଖିବାକୁ ମିଳିବ । ଏକ ବୋର୍ଡରେ ଓଡ଼ିଶାରେ ମହାତ୍ମାଗାନ୍ଧୀଙ୍କ ୮ଥର ଗସ୍ତ ନେଇ ବିବରଣୀ ଦିଆଯାଇଛି । ଏଥିରେ ୧୯୨୧ରୁ ୧୯୪୬ ମସିହା ମଧ୍ୟରେ ଓଡ଼ିଶାକୁ ୮ ଥର ଗାନ୍ଧିଜୀ ଗସ୍ତ କରିଥିଲେ ।
ଏହି ସମୟରେ ସେ କେବଳ ବ୍ରିଟିଶ ବିରୋଧୀ ଭାରତୀୟ ସ୍ୱାଧୀନତା ସଂଗ୍ରାମକୁ ବଳ ଦେବା ପାଇଁ ଆସିଥିଲେ ତାହା ନୁହେଁ ବରଂ ପ୍ରାକୃତିକ ଦୁର୍ବିପାକ ପ୍ରପୀଡ଼ିତ ଓଡ଼ିଆଙ୍କ ଦୁର୍ଦ୍ଦିନରେ ସହାୟତା ଓ ସହାନଭୂତିର ସହ ଛିଡା ହୋଇଥିଲେ ବାପୁ । ଏମିତି ଅନେକ କଥା ଏଥିରେ ଲେଖା ଯାଇଛି । ଡିଜିଟାଲ ଡିସ୍ପ୍ଲେ ମାଧ୍ୟମରେ ଓଡ଼ିଶାଗସ୍ତର ମ୍ୟାପ୍ କରାଯାଇଛି ଯାହାକୁ କ୍ଲିକ୍ କଲେ ପ୍ରଥମରୁ ଅଷ୍ଟମ ଥର ଗସ୍ତ ଯାଏ ସବୁ ଦେଖିହେବ । ଯେ କେହି ଏହାର ମଜା ନେବା ସହ ଯେପରି ଏହାକୁ ସହଜରେ ମନେରଖିପାରିବେ ତାର ବ୍ୟବସ୍ଥା କରାଯାଇଛି । ଗ୍ୟାଲେରୀ ମଝିରେ ମହାତ୍ମାଗାନ୍ଧୀଙ୍କ ବ୍ରୋଞ୍ଜର ଏକ ପ୍ରତିମୂର୍ତ୍ତି ରଖାଯାଇଛି ।
ଚିତ୍ରରେ ଗାନ୍ଧିଜୀ ମହିଳାମାନଙ୍କୁ ନେଇ ବ୍ରହ୍ମପୁରରେ କରିଥିବା ସଭା, ବାରିକାଣୀ କ୍ଷୌର କରୁଥିବା, ବୋଲଗଡ଼ ବଙ୍ଗଳା ରହଣି, ସମ୍ବଲପୁରୀ ହସ୍ତତନ୍ତ ପିନ୍ଧିଥିବା ମହିଳାଙ୍କୁ ପ୍ରଶଂସା, ଗାନ୍ଧୀଙ୍କ ପରିଧାନରେ ପରିବର୍ତ୍ତନ, ବେରବୋଇରେ ଗାନ୍ଧିଜୀଙ୍କୁ ଆଚାର୍ଯ୍ୟ ହରିହର ନିଜର ବାଡି ଉପହାର ଦେଉଥିବାର ଦୃଶ୍ୟ ସ୍ଥାନ ପାଇଛି । କାଦୁଆ ଆଶ୍ରମ, ସ୍ୱରାଜ ସଂଗ୍ରାମ ପାଇଁ ମହିଳାଙ୍କ ଅଳଙ୍କାର ଏବଂ ମୂଲ୍ୟବାନ ଜିନିଷ ଦାନର ଚିତ୍ର, ଗାନ୍ଧିଜୀଙ୍କୁ ନେଇ କବିତା, ଅନୁଗୁଳ ଆମ୍ବତୋଟାରେ ଗାନ୍ଧୀ, ଭଦ୍ରକରେ ଗାନ୍ଧୀ ଏମିତି ଓଡ଼ିଶା ଗସ୍ତର ଅନେକ କଥା ଏହି ଗ୍ୟାଲେରୀରେ ସ୍ଥାନ ପାଇଛି ।
