ମାଲକାନଗିରି, ୨୮।୫ : ଚିତ୍ରକୋଣ୍ଡା ଥାନା ପୋଲିସକୁ ବଡ଼ ସଫଳତା। ବାହାର ରାଜ୍ୟକୁ ଚୋରା ଚାଲାଣ ପାଇଁ ମାଓଗଡ଼ ଭାବେ ପରିଚିତ ଦୁର୍ଗମ ସଙ୍ଗମାଗୁଡା ଜଙ୍ଗଲରେ ଗଛିତ ଥିବା ୨ କୋଟି ୧୫ଲକ୍ଷ ଟଙ୍କାର ଗଞ୍ଜେଇ ଜବତ କଲା ପୋଲିସ। ଏସମ୍ପର୍କରେ ଆଜି ଚିତ୍ରକୋଣ୍ଡା ଥାନା ଅଧିକାରୀ ମେଲକା ସୂଚନା ଦେଇଛନ୍ତି।

ସୂଚନା ଅନୁଯାୟୀ, ମାଲକାନଗିରି ଜିଲ୍ଲା ଚିତ୍ରକୋଣ୍ଡା ଥାନା ବଡ଼ପଦର ପଞ୍ଚାୟତ ମାଓପ୍ରବଣ ସଙ୍ଗମାଗୁଡା ଘଞ୍ଚ ଜଙ୍ଗଲରେ ବାହାର ରାଜ୍ୟକୁ ଗଞ୍ଜେଇ ଚାଲାଣ ପାଇଁ କିଛି ବେପାରୀ ଶନିବାର ରାତିରେ ପ୍ରସ୍ତୁତ ହେଉଥିବା ପୋଲିସ ବିଶ୍ୱସ୍ଥ ସୂତ୍ରରୁ ଖବର ପାଇଥିଲା। ଏହାପରେ ଚିତ୍ରକୋଣ୍ଡା ଥାନା ଆଇଆଇସି  ମୁକୁନ୍ଦ ମେଲେକାଙ୍କ ନେତୃତ୍ୱରେ ଏକ ସ୍ୱତନ୍ତ୍ର ଟିମ୍ ବଡ଼ପଦର ପଞ୍ଚାୟତର ସଙ୍ଗମାଗୁଡା ଗ୍ରାମ ନିକଟସ୍ଥ ଜଙ୍ଗଲରେ ଚଡାଉ କରିଥିଲେ । ଗାଡି ଶଦ୍ଧ ଶୁଣି ପୋଲିସକୁ ଦେଖି ଗଞ୍ଜେଇ ଚୋରା ଚାଲାଣକାରୀ ଅନ୍ଧାରର ସୁଯୋଗ ନେଇ ଜଙ୍ଗଲ ଭିତରକୁ ଲୁଚି ପଳାଇଥିଲେ । ପୋଲିସ ସେଠାରେ ପହଁଚି ଜଙ୍ଗଲ ମଧ୍ୟରେ ଗଛିତ ଥିବା ୮୫ ବସ୍ତା ଗଞ୍ଜେଇ ଜବତ କରିଛି। 

ଜଙ୍ଗଲରେ ବହୁତ ସମୟ ପର୍ଯ୍ୟନ୍ତ ଚାଲାଣକାରୀମାନଙ୍କୁ ଖୋଜିଥିଲେ ସୁଦ୍ଧା ସେମାନଙ୍କ ସନ୍ଧାନ ମିଳି ନଥିଲା। ଅଧିକ ରାତି ହୋଇଯିବାରୁ ପୋଲିସ ଜବତ ଗଞ୍ଜେଇକୁ ଚିତ୍ରକୋଣ୍ଡା ଥାନାକୁ ଆଣିଥିଲା। ଆଜି ସକାଳେ ମାଜିଷ୍ଟ୍ରେଟଙ୍କ ସମ୍ମୁଖରେ ଜବତ ଗଞ୍ଜେଇକୁ ଓଜନ କରାଯିବା ପରେ ତାହା ୨ ଟନ ୧୫୨ କେ.ଜି ଥିବାର ଜଣାପଡିଛି। ଏହାର  ଆନୁମାନିକ ମୂଲ୍ୟ ପ୍ରାୟ ୨ କୋଟି ୧୫ ଲକ୍ଷ ଟଙ୍କା ହେବ ବୋଲି ପୁଲିସ କହିଛି। ଏହି ଗଞ୍ଜେଇ କେଉଁଠାକୁ ଚାଲାଣ ହେଉଥିଲା ଏବଂ ଏଥିରେ କାହାର ସମ୍ପୃକ୍ତି ରହିଛି ସେନେଇ ପୋଲିସ ତଦନ୍ତ କରୁଛି।

ଗତ କିଛିଦିନ ତଳେ କାଲିମେଳା ଥାନା ପୁଲିସ କାର୍‌ରୁ ଗଞ୍ଜେଇ ଜବତ କରିଥିଲା। ଏହି ଗଞ୍ଜେଇ ଚୋରା ଚାଲାଣ ଅଭିଯୋଗରେ ତେଲଙ୍ଗାନାର ଜଣେ ପୁଲିସ କନେଷ୍ଟବଲଙ୍କ ସହିତ ଅନ୍ୟ କେତେ ଜଣ ଗିରଫ ହୋଇଥିଲେ। ଠିକ୍ ସେହିପରି ମାଲକାନଗିରି ଥାନା ପୁଲିସ ମଧ୍ୟ ଏକ ଟ୍ରକ୍‌ରୁ ୩ କୁଇଣ୍ଟାଲ ୬୦କେ.ଜି ଗଞ୍ଜେଇ ଜବତ କରି ଉତ୍ତର ପ୍ରଦେଶର ୧୦ଜଣଙ୍କୁ ଗିରଫ କରିଥିଲା। ଗତ କିଛି ଦିନ ହେଲା ମାଲକାନଗିରି ଜିଲ୍ଲାରେ ଚୋରା ଗଞ୍ଜେଇ ବେପରୀମାନେ ସକ୍ରିୟ ହୋଇପଡିଛନ୍ତି।