ଖୁଣ୍ଟା,୨୩/୪ : ମୟୁରଭଞ୍ଜ ଜିଲ୍ଲା ଖୁଣ୍ଟା ଥାନା ଅଞ୍ଚଳରେ ଜନୈକ ଗହଣା ବ୍ୟବସାୟୀଙ୍କଠାରୁ ବନ୍ଧୁକ ମୁନରେ ୩୦ ଲକ୍ଷ ଟଙ୍କାରୁ ଉର୍ଦ୍ଧ୍ବ ସୁନା ଓ ରୁପା ଲୁଟି ନେଇଥିବା ଜଣାପଡ଼ିଛି। ଖୁଣ୍ଟା ଅଞ୍ଚଳର ଗହଣା ବ୍ୟବସାୟୀ ସୁନ୍ଦର ନାରାୟଣ ସାହୁ ବାସିପିଠା ଛକ ନିକଟରେ ଥିବା ନିଜର ନିୟୂ ମହାଲକ୍ଷ୍ମୀ ଅଳଙ୍କାର ଦୋକାନ ସବୁଦିନ ପରି ଦୋକାନ ବନ୍ଦ କରି ଆଜି ସମସ୍ତ ଗହଣା ଧରି ବାଇକ୍ ଯୋଗେ ପ୍ରାୟ ରାତି ୮ ସମୟରେ ଖୁଣ୍ଟା ଘରକୁ ଫେରୁଥିଲେ।
ତେବେ ସେତିକିବେଳେ କିଛି ଦୁର୍ବୃତ୍ତ ତାଙ୍କୁ ପିଛା କରୁଥିବାର ସେ ଜାଣିପାରି ଖୁଣ୍ଟା ଅଭିମୁଖେ ଜୋରରେ ପଳାଇବାକୁ ଚେଷ୍ଟା କରିଥିଲେ । ଦୁର୍ବୃତ୍ତ ମାନେ ୮.୩୦ ସମୟରେ ବାଲିମୁଣ୍ଡୁଳି ଗଙ୍ଗାହାର ନଦୀ ପୋଲ ନିକଟରେ ଦୁଇଟି ପଲସର ବାଇକରେ ମାସ୍କ୍ ପିନ୍ଧି ଚାରି ଜଣ ଯୁବକ ତାଙ୍କୁ ଅଟକ ରଖି ବନ୍ଧୁକ ମୁନ ଦେଖାଇବା ସହ ତାଙ୍କୁ ନିର୍ଦ୍ଧୁମ ମାଡ଼ ମାରିଥିଲେ । ଏହାସହ ବ୍ଯାଗରେ ଥିବା ୩୦ଲକ୍ଷରୁ ଊର୍ଦ୍ଧ୍ବ ଟଙ୍କାର ସୁନା ଓ ରୁପା ଲୁଟି ନେଇ ପଳାଇଛନ୍ତି । ଖବର ପାଇ ଖୁଣ୍ଟା ପୋଲିସ ଘଟଣାସ୍ଥଳରେ ପହଞ୍ଚିଛି । ଖବର ଲେଖା ହେବା ଯାଏଁ ଲୁଟେରାଙ୍କ ପତା ମିଳିନଥିବା ବେଳେ ଖୁଣ୍ଟା ପୋଲିସ ଘଟଣାର ତଦନ୍ତ ଜାରି ରଖିଛି।
