ଭୁବନେଶ୍ୱର, ୧୫/୧୧ : ସୁନା ଏବଂ ରୁପା ଦରରେ ହ୍ରାସ ଦେଖିବାକୁ ମିଳିଛି । ଭୁବନେଶ୍ୱରରେ ୧୦ ଗ୍ରାମ ପିଛା ୨୨ କ୍ୟାରେଟ୍‌ ସୁନା ଦର ୭୦ ହଜାର ଟଙ୍କା ତଳକୁ ଖସିଆସିଛି । ବଜାର ତଥ୍ୟ ଅନୁସାରେ, ଗୁରୁବାର ୧୦ ଗ୍ରାମ ପିଛା ୨୪ କ୍ୟାରେଟ୍‌ ଏବଂ ୨୨ କ୍ୟାରେଟ୍‌ ସୁନା ଦର ଯଥାକ୍ରମେ ୧୨୦୦ ଟଙ୍କା ଏବଂ ୧୧୦୦ ଟଙ୍କା କମିଛି । ଉଭୟ ଯଥାକ୍ରମେ ୭୫,୬୫୦ ଟଙ୍କା ଏବଂ ୬୯,୩୫୦ ଟଙ୍କାକୁ ଖସିଆସିଛି । 

ଅନ୍ୟପକ୍ଷରେ, କିଲୋଗ୍ରାମ ପିଛା ରୁପା ଦର ୨୦୦୦ ଟଙ୍କା ହ୍ରାସ ପାଇଛି । ଫଳରେ ଏହା ଲକ୍ଷେ ତଳକୁ ଖସି ୯୯,୦୦୦ ଟଙ୍କା ହୋଇଛି । ୧୫ ଦିନରେ ସୁନା ଦର ପ୍ରାୟ ୬,୦୦୦ ଟଙ୍କା କମିଥିବା ଜଣାପଡ଼ିଛି । ସୁନା ଦର ଖସିବାର ଅନେକ କାରଣ ରହିଛି । ୩ ମାସ ଧରି ଦର ବଢ଼ିବା ଫଳରେ ଲୋକେ ଏବେ ଲାଭ ଅସୁଲି କରୁଛନ୍ତି । ଫଳରେ ଚାହିଦା ଖସିଛି । ଏହା ଦର ହ୍ରାସର ଅନ୍ୟତମ କାରଣ । ସେହିଭଳି ଆମେରିକାରେ ଡୋନାଲ୍ଡ ଟ୍ରମ୍ପଙ୍କ ବିଜୟ ପରଠାରୁ ଏଯାବତ୍‌ ଡଲାର ସୂଚକାଙ୍କ ୨.୩୬% ବୃଦ୍ଧି ପାଇଛି । ଆମେରିକୀୟ ବଣ୍ଡ ଦର ବଢ଼ିଛି । ଉଭୟ କାରଣ ଯୋଗୁ ସୁନା ଚାହିଦା ହ୍ରାସ ପାଇଛି । ମଧ୍ୟପ୍ରାଚ୍ୟ, ରୁଷ-ୟୁକ୍ରେନ, ଇସ୍ରାଏଲ-ହମାସ, ଇସ୍ରାଏଲ-ଇରାନ ମଧ୍ୟରେ ଯୁଦ୍ଧ ଯୋଗୁ ସୁନା ଦର ବଢୁଥିଲା । ଏବେ ସେଭଳି କିଛି ହଲଚଲ ଦେଖିବାକୁ ମିଳୁନାହିଁ । ତେଣୁ ସୁନା ଦର ଖସୁଥିବା ବିଶେଷଜ୍ଞମାନେ ପ୍ରକାଶ କରିଛନ୍ତି ।