ଭୁବନେଶ୍ୱର,୨୧/୦୪: ରାଜ୍ୟରେ ଶୀଘ୍ର ଆସିବ ଭାଗଚାଷୀ ଆଇନ । ଏଣିକି ଭାଗଚାଷୀଙ୍କୁ ନ୍ୟାୟ ମିଳିବ । ଚାଷର କ୍ଷୟକ୍ଷତି ହେଲେ ଭାଗଚାଷୀଙ୍କୁ ଆଉ ନୟାନ୍ତ ହେବାକୁ ପଡ଼ିବ ନାହିଁ । ସେମାନଙ୍କୁ ଉପଯୁକ୍ତ ଭାବେ ଚିହ୍ନଟ କରାଯିବା ସହ ସରକାରୀ ସୁବିଧା ମିଳିପାରିବ । ସେଥିପାଇଁ ରାଜ୍ୟ ସରକାର ଭାଗଚାଷୀ ଚିହ୍ନଟ କରିବାକୁ ସଚିବ ସ୍ତରୀୟ କମିଟିର ପୁନର୍ଗଠନ କରିଛନ୍ତି ।
ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗର ଅତିରିକ୍ତ ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ୭ ଜଣିଆ କମିଟି ଗଠନ କରିଛନ୍ତି । ଭାଗଚାଷୀ ଆଇନ ସଂକ୍ରାନ୍ତରେ ଏମାନେ ପରାମର୍ଶ ଦେବେ । କମିଟିରେ କୃଷି ବିଭାଗର ପ୍ରମୁଖ ସଚିବ, ଆଇନ ବିଭାଗର ପ୍ରମୁଖ ସଚିବ, ଅନୁସୂଚିତ ଜାତି/ ଜନଜାତି/ସଂଖ୍ୟାଲଘୁ ଉନ୍ନୟନ ବିଭାଗର ପ୍ରମୁଖ ସଚିବ, ସମବାୟ ବିଭାଗ ସଚିବ ସଦସ୍ୟ ଥିବା ବେଳେ ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗର ଅତିରିକ୍ତ ସଚିବ ସଦସ୍ୟ ଆବାହକ ରହିଛନ୍ତି । ଅଧ୍ୟକ୍ଷ ଅନ୍ୟ ଜଣଙ୍କୁ ସ୍ୱତନ୍ତ୍ର ଆମନ୍ତ୍ରିତ ସଦସ୍ୟ ଭାବେ ମନୋନିତ କରିପାରିବେ ।
ତେବେ ଦୀର୍ଘ ଦିନରୁ ଚର୍ଚ୍ଚା ହୋଇଆସୁଥିବା ଭାଗଚାଷୀଙ୍କ ଚିହ୍ନଟ ପ୍ରକ୍ରିୟା ଏଥର ସମ୍ଭବ ହେବ ତ? ସମସ୍ତ ଭାଗଚାଷୀଙ୍କୁ ଚିହ୍ନଟ କରିପାରିବେ ତ ସରକାର? ଏ ନେଇ କୃଷି ବିଶେଷଜ୍ଞ ପ୍ରଶ୍ନ ଉଠାଇଛନ୍ତି ।
ସୂଚନାଯୋଗ୍ୟଯେ, ଭାଗଚାଷୀ ଆଇନ ଆଣିବା ପାଇଁ ୨୦୧୬ରେ ତତ୍କାଳୀନ ରାଜସ୍ୱ ମନ୍ତ୍ରୀ ଏକ ଚିଠା ଆଇନ (ଡ୍ରାଫ୍ଟ ବିଲ୍)ପ୍ରସ୍ତୁତ କରିଥିଲେ । ତାହା ବିଧାନସଭାରେ ଉପସ୍ଥାପନ କରାଯିବ ବୋଲି ଚର୍ଚ୍ଚା ହେଉଥିଲା । କିନ୍ତୁ ବିଶେଷଜ୍ଞଙ୍କ ଅଭିଯୋଗ ଅନୁସାରେ, ଅମଲାମାନେ ମୁଖ୍ୟତଃ ନିଜର ଚାଷଜମି ଭାଗରେ ଦେଇଥିବାରୁ, ମାଲିକାନା ହାତରୁ ଚାଲିଯିବା ଆଶଙ୍କା କରି ଏହାକୁ କରାଇ ଦେଲେନି । ଫଳରେ ଗତ ୨୪ ବର୍ଷର ବିଜେଡି ଶାସନ ଅମଳରେ ଭୂସଂସ୍କାର ଆଇନର ସଂଶୋଧନ ହୋଇପାରିଲାନି ।
ରାଜ୍ୟରେ ୨୦ ଲକ୍ଷରୁ ଅଧିକ ଭାଗଚାଷୀ ଅଛନ୍ତି । ଅନ୍ୟୁନ ୪୦ ପ୍ରତିଶତ ଜମି ଭାଗରେ ଚାଷ ହେଉଛି । କିନ୍ତୁ କୌଣସି ଜମି ରେକର୍ଡ କିମ୍ୱା ଭାଗଚାଷ ଅଧିକାରପତ୍ର ନାହିଁ । ଭଗାଚାଷୀମାନେ ମୌଖିକ ଭାବେ ବର୍ଷ ବର୍ଷ ଧରି ମାଲିକଙ୍କ ଜମିରେ ଚାଷ କରୁଛନ୍ତି । ସେମାନଙ୍କର ଜମି ରେକର୍ଡ ନଥିବାରୁ ଋଣ, ଫସଲ ବୀମା ଓ କ୍ଷତିପୂରଣ ମିଳୁନି । ତେଣୁ ଏବର ସରକାର ଚାଷ ଜମି ଭାଗ ଆଇନ (ଏଗ୍ରିକଲଚର ଲ୍ୟାଣ୍ଡ ଲିଜ ଆକ୍ଟ) ଆଣିବାକୁ ପ୍ରକ୍ରିୟା ଆରମ୍ଭ କରିଛନ୍ତି।
