ନୂଆଦିଲ୍ଲୀ,୨୮/୦୬: ଏସି (ଏୟାର କଣ୍ଡିସନର) ତାପମାତ୍ରା ୨୦ରୁ ୨୮ ଡିଗ୍ରୀ ଭିତରେ ସେଟ୍ କରିବା ନିୟମ ବର୍ତ୍ତମାନ ଲାଗୁ କରାଯିବ ନାହିଁ । ସମୟ ସହିତ ଧିରେ ଧିରେ ଏହି ପରିବର୍ତ୍ତନ କରାଯିବ । ୨୦୫୦ ମସିହା ପରେ ଏହା ସମ୍ଭବ ହୋଇପାରେ ବୋଲି କେନ୍ଦ୍ର ଜଙ୍ଗଲ ଓ ପରିବେଶ ମନ୍ତ୍ରୀ ଭୂପେନ୍ଦ୍ର ଯାଦବ କହିଛନ୍ତି ।
ନୂଆଦିଲ୍ଲୀରେ ଅନୁଷ୍ଠିତ ଭାରତ ଜଳବାୟୁ ସମ୍ମିଳନୀରେ ଯୋଗଦେବା ଅବସରରେ ଯାଦବ ଏହା କହିଛନ୍ତି । ଏସି ପାଇଁ ନୂଆ ନିୟମ କେବେ ଲାଗୁ କରାଯିବ ବୋଲି ଏକ ପ୍ରଶ୍ନର ଉତ୍ତରରେ ସେ କହିଥିଲେ ଯେ ବର୍ତ୍ତମାନ ଏଭଳି ସ୍ଥିତି ଆସିନାହିଁ । ସମ୍ଭବତଃ ୨୦୫୦ ପରେ ଆସିପାରେ । ସେ ଦୃଷ୍ଟିରୁ ଏଭଳି ନିୟମ ଏବେ ଲାଗୁ କରାଯିବ ନାହିଁ । ସମୟ ସହିତ ଏସିର କ୍ଷମତା ଧିରେ ଧିରେ ପରିବର୍ତ୍ତନ କରାଯିବ । ଏହା ପୂର୍ବରୁ ଗତ ୧୧ ତାରିଖରେ କେନ୍ଦ୍ର ଶକ୍ତିମନ୍ତ୍ରୀ ମନୋହର ଲାଲ ଖଟ୍ଟର କହିଥିଲେ ଯେ ଭାରତରେ ଖୁବଶୀଘ୍ର ଏସିକୁ ୨୦-୨୮ ଡିଗ୍ରୀ ଭିତରେ ଚଲାଇବା ପାଇଁ ନିୟମ ଅଣାଯିବ ଏବଂ ଏହି ନିୟମକୁ ତତ୍କାଳ ପ୍ରଭାବରେ ଲାଗୁ କରାଯିବ । ଏହାକୁ ମାନିବା ଲାଗି ସମସ୍ତଙ୍କ ପାଇଁ ବାଧ୍ୟତାମୂଳକ କରାଯିବ । ନୂଆ ନିୟମ ଏସି ନିର୍ମାଣ କରୁଥିବା କମ୍ପାନି ପାଇଁ କୁଲିଂକୁ ଆହୁରି ଉନ୍ନତି କରିପାରିବ । ଫଳରେ ଗରମ ବଢ଼ିବା ସମୟରେ ବିଦ୍ୟୁତର ଚାହିଦା ଓ ବିଲ୍ରେ ହେଉଥିବା ବୃଦ୍ଧିକୁ ହ୍ରାସ କରିବାରେ ସହାୟକ ହେବ ।
ଶକ୍ତି ଦକ୍ଷତା ବ୍ୟୁରୋ (ବିଇଇ) ଅନୁସାରେ ବର୍ତ୍ତମାନ ଭାରତରେ ଅଧିକାଂଶ ଏସି ୨୦ରୁ ୨୧ ଡିଗ୍ରୀ ସେଲସିୟସ ସୀମା ଭିତରେ ନିର୍ଦ୍ଧାରିତ କରାଯାଉଛି । କିନ୍ତୁ ସ୍ୱାଭାବିକ ତଥା ଆଦର୍ଶ ଆରାମଦାୟକ ସୀମା ୨୪ରୁ ୨୫ ଭିତରେ ରହିଛି । ବିଇଇ ପକ୍ଷରୁ ଆରାମ ଓ ବିଦ୍ୟୁତ ଉପଯୋଗ ଭିତରେ ସନ୍ତୁଳନ ବଜାୟ ରଖିବା ଉଦ୍ଦେଶ୍ୟରେ ଏସିକୁ ୨୪ରୁ ୨୫ ଡିଗ୍ରୀ ସେଲ୍ସିୟସ ଭିତରେ ନିର୍ଦ୍ଧାରିତ କରିବାକୁ ପରାମର୍ଶ ଦିଆଯାଇଛି । ସେଥିରେ କୁହାଯାଇଛି ଯେ ଏସିର ତାପମାତ୍ରାକୁ ବହୁତ କମ୍ ଅର୍ଥାତ ୨୦ରୁ ୨୧ ଡିଗ୍ରୀ ସେଲ୍ସିୟସ ଭିତରେ ରଖାଯିବା ଫଳରେ ବିଦ୍ୟୁତ ଖର୍ଚ୍ଚ ବଢ଼ିବ ।
ପରିବେଶ ମନ୍ତ୍ରୀ ଆହୁରି ମଧ୍ୟ କହିଛନ୍ତି ଯେ ଜଳବାୟୁ ଲକ୍ଷ୍ୟକୁ ହାସଲ କରିବା ରାଷ୍ଟ୍ରୀୟ ପରିସ୍ଥିତି ଓ ସିବିଡିଆର-ଆରସି (ସଂଯୁକ୍ତ କିନ୍ତୁ ପୃଥକ ପୃଥକ ଦାୟିତ୍ୱ ଓ ସମ୍ବନ୍ଧିତ କ୍ଷମତା) ସିଦ୍ଧାନ୍ତର ଅନୁରୂପ କରାଯିବା ଆବଶ୍ୟକ । ଜାତିସଂଘ ଜଳବାୟୁ ସଂସ୍ଥା ଦ୍ୱାରା ପ୍ରସ୍ତୁତ ଭାରତର ରାଷ୍ଟ୍ରୀୟ ସ୍ତର ଉପରେ ନିର୍ଦ୍ଧାରିତ ଯୋଗଦାନ ବା ରାଷ୍ଟ୍ରୀୟ ଜଳବାୟୁ ଯୋଜନା, ନିଜ ଲୋକଙ୍କ ପାଖରେ ଶକ୍ତି ପହଞ୍ଚାଇବାକୁ ସୁନିଶ୍ଚିତ କରିବା ଉପରେ ଜୋର୍ ଦେଇଥାଏ । ସିବିଡିଆର-ଆରସି ସିଦ୍ଧାନ୍ତର ଅର୍ଥ ହେଉଛି ସବୁ ଦେଶକୁ ଜଳବାୟୁ ପରିବର୍ତ୍ତନ ସହ ଲଢ଼ିବାକୁ ହେବ। କିନ୍ତୁ ବିକଶିତ ଦେଶକୁ ଆହୁରି ଅଧିକ ପ୍ରୟାସ କରିବାକୁ ପଡିବ । କାରଣ ଐତିହାସିକ ରୂପରେ ଦେଖିଲେ ଅଙ୍ଗାରକାମ୍ଳର ଅଧିକ ନିର୍ଗମନ ପାଇଁ ସେମାନେ ଅଧିକ ମାତ୍ରାରେ ଦାୟୀ । ତା’ଛଡା ସେମାନଙ୍କ ପାଖରେ ଅଧିକ ସଂଶାଧନ ମଧ୍ୟ ରହିଛି ବୋଲି ପରିବେଶ ମନ୍ତ୍ରୀ କହିଛନ୍ତି ।
