ଭୁବନେଶ୍ୱର,୧୪/୦୧: ଠକେଇ ଅଭିଯୋଗରେ ବିଷ୍ଣୁପ୍ରିୟା ଚାନ୍ଦ ଓରଫ ହଂସିକା ଓ ତାଙ୍କ ପାର୍ଟନର ଅନିଲ୍ ମହାନ୍ତିଙ୍କ ବିଷୟରେ ପୁଲିସ୍ ଯେତେ ଖୋଳିଲେ ସେତେ ବାହାରୁଛି । ଏବେ ପୁଲିସ୍ ଜାଣିବାକୁ ପାଇଛି ବଡ଼ଗଡ଼ ଥାନାରେ ହଂସିକାଙ୍କ ନାଁରେ ୨ଟି ମାମଲା ରହିଛି । ୨୦୧୬ ମସିହାରେ ଘର ଭାଙ୍ଗିବା ଓ ୨୦୧୮ର ଏକ ଠକେଇ ମାମଲା ରହିଛି । ଏହି ଦୁଇଟି ମାମଲାକୁ ନେଇ ଏବେ ଅଧିକ ଚର୍ଚ୍ଚା ଲାଗି ରହିଛି ।
ବଡ଼ଗଡ଼ ଥାନା ବ୍ରହ୍ମେଶ୍ୱରପାଟଣା ଭୋଇସାହିରେ ଏକ ଦଳିତ ପରିବାର ଦୀର୍ଘ ବର୍ଷ ହେବ ରହୁଥିଲେ । ଉକ୍ତ ଜମିକୁ ବିଲ୍ଡର ହାତେଇବାକୁ ଯୋଜନା କରି ସଫଳ ହୋଇଥିଲେ । ହେଲେ ଉକ୍ତ ବ୍ୟକ୍ତିଙ୍କୁ ଥଇଥାନ ନ କରି ଜମି ହଡ଼ପ କରିବାକୁ ଅନେକ ଥର ଯୋଜନା କରି ଫେଲ୍ ମାରିଥିଲେ । ବିଲ୍ଡର ଜଣଙ୍କ ଶେଷରେ ହଂସିକାଙ୍କ ସାହାଯ୍ୟ ଲୋଡ଼ିଥିଲେ । ଦଳିତ ବ୍ୟକ୍ତିଙ୍କୁ ସେ ଜାଗାରୁ ଉଠାଇବାକୁ ୫୦ ଲକ୍ଷ ଟଙ୍କା ଦାବି କରିଥିଲେ ହଂସିକା । ତେବେ କଥା ୩୦ ଲକ୍ଷ ଟଙ୍କାରେ ଛିଡ଼ିଥିଲା । ସବୁ ଟଙ୍କା ନଗଦ ଆକାରରେ ନେଇଥିଲେ ହଂସିକା ।
୨୦୧୬ ଏପ୍ରିଲ୍ରେ ୫୦ରୁ ଅଧିକ ଲୋକଙ୍କୁ ଯୋଗାଡ଼ କରିଥିଲେ ହଂସିକା । ରାତି ୨ଟା ବେଳେ ବିଲ୍ଡର ଦେଇଥିବା ଠିକଣା ଭୋଇସାହିରେ ପହଞ୍ଚିଥିଲେ ସମସ୍ତେ । ଜେସିବି ନେଇ ରାତି ଅଧରେ ଦଳିତ ବ୍ୟକ୍ତିଙ୍କ ଘର ଭାଙ୍ଗି ଦେଇଥିଲେ । ସେହି ସମୟରେ ପରିବାରର ସମସ୍ତ ସଦସ୍ୟ ସେହି ଘରେ ଶୋଇଥିଲେ । ଘର ଭାଙ୍ଗିବାକୁ ଯାଇଥିବା ଲୋକମାନଙ୍କୁ ଦଳିତ ପରିବାର ଯେତେ ନେହୁରା ହୋଇଥିଲେ ବି କେହି କିଛି ଶୁଣି ନଥିଲେ । ଯେଉଁଠାରେ ଘର ଭଙ୍ଗା ହେଉଥିଲା ସେଠାରୁ କିଛି ଦୂରରେ ଏକ କାର୍ରେ ବସିଥିଲେ ହଂସିକା। ସେତେବେଳେ ଅନିଲ୍ ସହ ତାଙ୍କର କୌଣସି ସମ୍ପର୍କ ନଥିଲା ।
ଦଳିତ ପରିବାର ଲୋକ ହଂସିକାଙ୍କୁ ଆସି ମଧ୍ୟ ନେହୁରା ହୋଇଥିଲେ, ହେଲେ ସେ କିଛି ଶୁଣି ନଥିଲେ । ପରେ ବ୍ୟକ୍ତି ଜଣଙ୍କ ପୁଲିସ୍କୁ ଯୋଗାଯୋଗ କରିଥିଲେ । ପୁଲିସ୍ ପହଞ୍ଚିଲା ବେଳକୁ ଅଭିଯୁକ୍ତମାନେ ଦଳିତ ପରିବାରର ଘର ଭାଙ୍ଗି ମାଟିରେ ମିଶାଇ ଦେଇ ଘଟଣା ସ୍ଥଳରୁ ଚମ୍ପଟ ମାରିଥିଲେ । ପରେ ଦଳିତ ପରିବାର କିଛି ଉପାୟ ନ ପାଇ ଶେଷରେ ଦଳିତ ମହାସଂଘର ସାହାଯ୍ୟ ଲୋଡ଼ିଥିଲେ । ସଂଘର ସଦସ୍ୟମାନେ ରାତି ୪ଟା ବେଳେ ଭୋଇସାହିରେ ପହଞ୍ଚି କ୍ଷତିଗ୍ରସ୍ତ ପରିବାରକୁ ସାହାଯ୍ୟ କରିଥିଲେ । ସକାଳ ହେଲା ପରେ ପରିବାର ଲୋକ ବଡ଼ଗଡ଼ ଥାନାରେ ଅଭିଯୋଗ କରିଥିଲେ । ପୁଲିସ୍ ମାମଲା ରୁଜୁ କରିଥିଲା । ହେଲେ କିଛି କାର୍ଯ୍ୟାନୁଷ୍ଠାନ ନେଇ ନଥିଲା । ସଂଘ ଆନ୍ଦୋଳନ କରିବା ପରେ ପୁଲିସ୍ ୬ ଜଣଙ୍କୁ ଗିରଫ କରିବା ସହ ଜେସିବି ଜବତ କରିଥିଲା । ଭାଙ୍ଗି ଯାଇଥିବା ଘରକୁ ମରାମତି କରି ଦଳିତ ପରିବାର ସେଠାରେ ରହିଥିଲେ । ହେଲେ ଖସି ଯାଇଥିଲେ ହଂସିକା ଓ ସୁପାରି ଦେଇଥିବା ବିଲ୍ଡର । ପରେ କ’ଣ ହେଲା କେଜାଣି ବଡ଼ଗଡ଼ ଥାନା ପୁଲିସ୍ ଚାର୍ଜସିଟ୍ ଦେବା ସମୟରେ ହଂସିକାଙ୍କ ନାଁ କାଟି ଦେଇଥିଲା । କାହା ଚାପରେ ପୁଲିସ୍ ଏମିତି କରିଥିଲା ତାହା ଏବେ ବି ରହସ୍ୟ ଘେରରେ ଅଛି ।
୨୦୧୮ ମସିହାରେ ମଧ୍ୟ ବଡ଼ଗଡ଼ ଥାନାରେ ହଂସିକାଙ୍କ ନାଁରେ ଏକ ମାମଲା ରୁଜୁ ହୋଇଥିଲା । ବଡ଼ଗଡ଼ ଅଞ୍ଚଳରେ ରହୁଥିବା ଜଣେ ଖଣି ବ୍ୟବସାୟୀଙ୍କୁ ଟେଣ୍ଡର କରାଇ ଦେବାକୁ କହି ୩୫ ଲକ୍ଷ ଟଙ୍କା ନେଇଥିଲେ । ହେଲେ କରାଇ ପାରି ନଥିଲେ । ଏନେଇ ସେ ଥାନାରେ ଅଭିଯୋଗ କରିଥିଲେ । ପୁଲିସ୍ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ଏନେଇ ହଂସିକା ହାଇକୋର୍ଟରୁ ଆଗୁଆ ଜାମିନ୍ ପାଇଥିଲେ । କେବଳ ଏହି ୨ଟି ଘଟଣା ନୁହେଁ ଆଉ କିଛି ଠକେଇ ଅଭିଯୋଗ ତାଙ୍କ ନାଁରେ ଥିବା ପୁଲିସ୍ ଜାଣିବାକୁ ପାଇଛି ।
ଅନ୍ୟପକ୍ଷରେ ହଂସିକା ଓ ଅନୀଲ ଗିରଫ ଘଟଣାରେ ଏବେ ସୁଦ୍ଧା ବି କେସ ଡାଏରି (ସିଡି) ଦାଖଲ ହୋଇ ପାରିନି । ସ୍ପେଶାଲ୍ କ୍ରାଇମ୍ ୟୁନିଟ୍ କେସ ଡାଏରି ଦେବାରେ ବିଳମ୍ୱ ପାଇଁ ଉଭୟଙ୍କ ଜାମିନ ଆବେଦନ ଶୁଣାଣି ହୋଇପାରି ନାହିଁ । ଆସନ୍ତା ୧୬ ତାରିଖରେ ଶୁଣାଣି ହେବ ବୋଲି ଜଣାପଡ଼ିଛି । ତେବେ ଧାର୍ଯ୍ୟ ସମୟରେ କାହିଁକି ସିଡି ଦାଖଲ ହୋଇପାରିଲାନାହିଁ, ତାହା ଏବେ ସୃଷ୍ଟି କରିଛି ବଡ଼ ପ୍ରଶ୍ନ । ତା’ଛଡ଼ା ଏହି ଘଟଣାରେ ୧୧ ଜଣ ପ୍ରଭାବଶାଳୀ ବ୍ୟକ୍ତିଙ୍କୁ ସମନ କରିଛି ଆୟକର ବିଭାଗ । ଘଟଣାର ଅଧିକ ତଦନ୍ତ ପାଇଁ ଦୁଇ ଜଣଙ୍କୁ ପୁଣି ରିମାଣ୍ଡରେ ନେବାକୁ ଆବେଦନ କରିଛି କମିଶନରେଟ୍ ପୁଲିସ।
