ଦିନେ ଥିଲା କୁଖ୍ୟାତ ଆତଙ୍କବାଦୀ, ବୁହାଉଥିଲା ରକ୍ତର ନଦୀ, ଏବେ ହାତରେ ତ୍ରିରଙ୍ଗା ଧରିଛନ୍ତି ସେର୍ ଖାନ
- ସେର୍ ଖାନ ନାଁ ଶୁଣିଲେ ଭୟରେ ଥରୁଥିଲେ ଲୋକେ
- ୧୯୯୮-୨୦୦୬ ଯାଏଁ ସକ୍ରିୟ ଥିଲେ
- ଆତଙ୍କବାଦୀ ହେବାକୁ ବାଧ୍ୟ କରାଯାଇଥିଲା
- ସରେଣ୍ଡର କରିବା ପରେ ୧୩ ବର୍ଷ ଜେଲରେ ଥିଲେ
ଶ୍ରୀନଗର ୨୬/ ୦୧: କେବେ ହାତରେ ଥିଲା ବନ୍ଧୁକ ଆଉ ଅସ୍ତ୍ରଶସ୍ତ୍ର । ଘାଟିରେ ଖେଳାଉଥିଲେ ଆତଙ୍କରାଜ । ନାଁ ଶୁଣିଲେ ଭୟରେ ଥରୁଥିଲେ ସାଧାରଣ ଜନତା । ରକ୍ତର ହୋଲି ଖେଳୁଥିଲା କୁଖ୍ୟାତ ଆତଙ୍କବାଦୀ ସେର୍ ଖାନ । ଏବେ କିନ୍ତୁ ଆତଙ୍କର ସମ୍ପୂର୍ଣ୍ଣ ବିପରୀତ ଦୃଶ୍ୟ ଦେଖିବାକୁ ମିଳୁଛି । ଦିନେ ଜାମ୍ମୁ କାଶ୍ମୀରରେ ଆତଙ୍କବାଦୀ କାର୍ଯ୍ୟକଳାପରେ ଲିପ୍ତ ଥିବା ସେର୍ ଖାନ ହାତରେ ଦେଖିବାକୁ ମିଳିଛି ତ୍ରିରଙ୍ଗା ପତାକା ।
ପ୍ରଥମେ ଆତଙ୍କବାଦୀ କ୍ୟାମ୍ପରେ ଯୋଗଦେବା ଆଉ ପରେ ସାଧାରଣ ଜୀବନକୁ ଫେରିବା ସେର୍ ଖାନଙ୍କ ପାଇଁ ସହଜ ନଥିଲା । ବନ୍ଧୁକରୁ ତ୍ରିରଙ୍ଗା ପର୍ଯ୍ୟନ୍ତ ଯାତ୍ରା ପାଇଁ ଲାଗିଥିଲା ୨୦ ବର୍ଷ । ଜାମ୍ମୁ କାଶ୍ମୀର କିସ୍ତଓ୍ବାଡା ଜିଲ୍ଲାର ସେଗଡୀ ଭାଟା ଗାଁ ର ସେର୍ ଖାନ ଏବେ ସମ୍ପୂର୍ଣ୍ଣ ବଦଳିଯାଇଛନ୍ତି । ସେ ପୂର୍ବରୁ ହରକତ୍ ଅଲ୍ ଜିହାଦ-ଏ-ଇସଲାମୀ (HUJI) ଆତଙ୍କବାଦୀ ସଂଗଠନରେ ଥିଲା । ୧୯୯୮ରୁ ୨୦୦୬ ପର୍ଯ୍ୟନ୍ତ ବେଶ୍ ସକ୍ରିୟ ଥିଲା ସେର୍ ଖାନ । ଘାଟିର ବିଭିନ୍ନ ସ୍ଥାନରେ ଅପରାଧିକ ସାମ୍ରାଜ୍ୟ ବିସ୍ତାର କରିଚାଲିଥିଲା । ପରେ ସେ ସରେଣ୍ଡର କରିଥିଲା । ୧୩ ବର୍ଷ ଜେଲରେ ରହିବା ପରେ ଆତଙ୍କୀ ରାସ୍ତା ବଦଳାଇ ମୁଖ୍ୟ ସ୍ରୋତରେ ସାମିଲ ହୋଇଥିଲା ସେର୍ ଖାନ ।
ସେର୍ ଖାନ କହିଛି ଯେ, ‘୨୦ ବର୍ଷ ବୟସ ହୋଇଥିବା ବେଳେ ପାକିସ୍ତାନୀ ଆତଙ୍କବାଦୀମାନେ ମୋତେ ଅପହରଣ କରିନେଇଥିଲେ । ଅପରାଧରେ ଲିପ୍ତ ରହିବା ପାଇଁ ଚାପ ପକାଇଥିଲେ । ମୋତେ ବାଧ୍ୟ କରାଗଲା ଆତଙ୍କବାଦୀ ହେବା ପାଇଁ । ଅନେକ ଅପରାଧରେ ଲିପ୍ତ ଥିଲି । କିନ୍ତୁ ସୁଯୋଗ ମିଳିବା ପରେ ଅନ୍ୟ ୬ ଜଣ ଆତଙ୍କବାଦୀଙ୍କ ସହିତ ଆତ୍ମସମର୍ପଣ କରିଥିଲି’।
ଆତଙ୍କବାଦୀ କାର୍ଯ୍ୟକଳାପରେ ଲିପ୍ତ ଥିବା କାରଣରୁ ସେର୍ ଖାନଙ୍କୁ ୧୩ ବର୍ଷ ଜେଲ ଦଣ୍ଡାଦେଶ ହୋଇଥିଲା । ଜେଲ ଅବଧି ଶେଷ ହେବା ପରେ ମୁଖ୍ୟ ସ୍ରୋତରେ ସାମିଲ ହୋଇଥିଲେ । ଏବେ ସେ ପତ୍ନୀଙ୍କ ସମେତ ୧୯ ଓ ୧୭ ବର୍ଷର ଦୁଇ ଝିଅଙ୍କୁ ନେଇ ଖୁସିରେ ସାଧାରଣ ଜୀବନ ଅତିବାହିତ କରୁଛନ୍ତି । ଆଉ କେବେ ଆତଙ୍କବାଦର ରାସ୍ତାକୁ ନଯିବାକୁ ପଣ କରିଛନ୍ତି ସେର୍ ଖାନ ।
