ଜୟପୁର ସିରିଏଲ ବ୍ଲାଷ୍ଟ ମାମଲାରେ ସମସ୍ତ ଅଭିଯୁକ୍ତଙ୍କୁ ନିର୍ଦ୍ଦୋଷରେ ଖଲାସ କଲେ ରାଜସ୍ଥାନ ହାଇକୋର୍ଟ, ପୂର୍ବରୁ ନିମ୍ନ ଅଦାଲତରେ ମିଳିଥିଲା ଫାଶୀଦଣ୍ଡ…
ନୂଆଦିଲ୍ଲୀ: ଜୟପୁର ସିରିଏଲ ବ୍ଲାଷ୍ଟ ମାମଲାରେ ହାଇକୋର୍ଟ ସମସ୍ତ ଅଭିଯୁକ୍ତଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି । ଏଥି ସହିତ ସଲମାନ ନାମକ ଜଣେ ଅଭିଯୁକ୍ତକୁ ନାବାଳକ ବୋଲି ବିଚାର କରି ହାଇକୋର୍ଟ ତାଙ୍କୁ ଜୁଭେନାଇଲ କୋର୍ଟକୁ ପଠାଇଛନ୍ତି । ସୂଚନାଥାଉକି, ଯେ ଏହା ପୂର୍ବରୁ ନିମ୍ନ ଅଦାଲତରେ ଅଭିଯୁକ୍ତଙ୍କୁ ମୃତ୍ୟୁଦଣ୍ଡ ଦିଆଯାଇଥିଲା, କିନ୍ତୁ ହାଇକୋର୍ଟ ନିମ୍ନ ଅଦାଲତର ନିଷ୍ପତ୍ତିକୁ ଖାରଜ କରି ସମସ୍ତ ଅଭିଯୁକ୍ତଙ୍କୁ ମୁକ୍ତ କରିଛନ୍ତି । ଜଷ୍ଟିସ ପଙ୍କଜ ଭଣ୍ଡାରୀ ଏବଂ ଜଷ୍ଟିସ ସମୀର ଜୈନଙ୍କ ଏକ ଖଣ୍ଡପୀଠ ଏହି ମାମଲାର ଶୁଣାଣି କରିଛନ୍ତି । ଏହାପୂର୍ବରୁ ନିମ୍ନ ଅଦାଲତ ସୈଫ, ସୈଫୁର ରହମାନ ଏବଂ ସରବର ଆଜମୀଙ୍କୁ ଦୋଷୀ ବୋଲି ଘୋଷଣା କରି ସେମାନଙ୍କୁ ମୃତ୍ୟୁଦଣ୍ଡ ଦିଆଯାଇଥିଲା ।
ହାଇକୋର୍ଟ କହିଛନ୍ତି ଯେ, ତଦନ୍ତକାରୀ ଅଧିକାରୀଙ୍କ ଆଇନଗତ ଜ୍ଞାନ ନାହିଁ । ଏହା ବ୍ୟତୀତ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଡିଜିପିଙ୍କୁ ନିର୍ଦ୍ଦେଶ ଦେଇଛନ୍ତି କୋର୍ଟ । ଏହି ଘଟଣାରେ ଅଭିଯୁକ୍ତକୁ ନିର୍ଦ୍ଦୋଷରେ ଖଲାସ କରିବା ପ୍ରସଙ୍ଗରେ କଡା ପ୍ରତିକ୍ରିୟା ରଖିଛନ୍ତି ପୂର୍ବତନ ବିଜେପି ସଭାପତି ସତୀଶ ପୁନିୟା । ପୁନିଆ କହିଛନ୍ତି ଯେ ୧୩ ମେ ୨୦୦୮ ରେ ହୋଇଥିବା ଦଙ୍ଗାରେ ୭୧ ଜଣଙ୍କର ମୃତ୍ୟୁ ଘଟିଥିଲା । ଡିସେମ୍ବର ୨୦୧୯ ରେ କୋର୍ଟ ଅଭିଯୁକ୍ତଙ୍କୁ ମୃତ୍ୟୁଦଣ୍ଡ ଦେଇଛନ୍ତି । କୋର୍ଟ ପ୍ରମାଣକୁ ପର୍ଯ୍ୟାପ୍ତ ପରିମାଣରେ ଗ୍ରହଣ କରିନାହାଁନ୍ତି, ତେଣୁ ଅନୁସନ୍ଧାନର ଦିଗ ମଧ୍ୟ ସନ୍ଦେହ ସୃଷ୍ଟି କରିବାକୁ ଯାଉଛି ।
ସୂଚନାଥାଉକି, ରାଜସ୍ଥାନର ରାଜଧାନୀ ଜୟପୁରରେ ୨୦୦୮ ମେ ୧୩ରେ ସିରିଏଲ ବିସ୍ଫୋରଣର ଏକ ମାମଲା ସାମ୍ନାକୁ ଆସିଥିଲା, ଯେଉଁଥିରେ ମାଣକ ଚୌକ୍ ଖଣ୍ଡା, ବଡି ଚୌପଡ, ତ୍ରିପୋଲିଆ ଗେଟ୍, ଜୌହରୀ ବଜାର ଏବଂ ଚାନ୍ଦପୋଲ ବିସ୍ଫୋରଣରେ କ୍ଷତିଗ୍ରସ୍ତ ହୋଇଥିଲା । ଏହି ଭୟଙ୍କର ବୋମା ବିସ୍ଫୋରଣରେ ସମଗ୍ର ଅଞ୍ଚଳ ଥରି ଉଠିଥିଲା । ଏହି ହୃଦୟ ବିଦାରକ ଘଟଣାରେ ପ୍ରାୟ ୭୧ ଜଣଙ୍କର ମୃତ୍ୟୁ ଘଟିଥିବା ବେଳେ ୧୮୫ ଜଣ ଆହତ ହୋଇଥିବା ସୂଚନା ରହିଥିଲା । ଏହା ବ୍ୟତୀତ ସୁରକ୍ଷା କର୍ମୀଙ୍କ ଦ୍ୱାରା ଏକ ଜୀବନ୍ତ ବୋମା ମଧ୍ୟ ଉଦ୍ଧାର କରାଯାଇଥିଲା, ଯାହାକୁ ବୋମା ନିଷ୍କାସନ ସ୍କ୍ବାର୍ଡ ସହାୟତାରେ ନିଷ୍କ୍ରିୟ କରାଯାଇଥିଲା । ଏହି ବୋମାକୁ ରାମଚନ୍ଦ୍ର ମନ୍ଦିର ନିକଟରେ ଲଗାଯାଇଥିଲା ।
